Махачы чааҷыларыбыснаң хадабыс
08.09.2023
Хабарлар
«Русское лето. ZаРоссию» фестиваль алғым иртче
Фестиваль. Ағбанда «Русское лето. ZаРоссию» федеральнай фестиваль алғым ирткен
Пӱӱл фестиваль пістің хазнаның 26 городында таныхталча. Ағбанда ол «Чиңіс» культура кінінде пасталған. Анда 10.00 иртеннең сығара кинолар кӧзіткеннер. «Невыдуманная история маленького города», «Отважные. Про любовь», «Быть воином» – пістің чир-суубысты неонацисттердең арачылапчатхан махачы матырлардаңар фильмнер.
Саблығ режиссёр-документалист Олеся Шигинаның киноларының ӱзіктері аның чуртазынаң, чӱрек ачиинаң пик палғалыстығ. Аның оолғы ӧнетін чаа операциязына пос кӧңнінең парыбысхан. Олеся, палазына сағыссырап, пір орында одыр полбиныбысхан. Ол, машиназына одырып, фронтсар ойлатхан.
Пастағы чорығы соонаң Олеся Шигина «Отважные. Про любовь» фильмін суурыбысхан. Анда хорғыстығ ӱзіктер кӧрерге чарир: изел парған туралар, имнег учреждениелері, школалар, чара чачырасха чох пол парған ааллар. Пір ӱзікте оолғының соонҷа СВО-зар парған иреннің чооғы пирілче. Паба хормачыланча: «Кем палама иртен бутерброд тимнеп пир турар? Аннаңар аның соонҷа парғам». Аданаң оол пілінчелер, полған на бутерброд оларның чуртазында халғанҷызы пол парарға айабас.
Ідӧк Олеся Шигинаның фильмінде махачы ипчілердеңер кӧзіділче. Олар Донбассар ирлерінің соонҷа парғаннар. Хайзының апсаа ізі чох чіт парған, че, андағ даа полза, ипчілер хада хонғаннары палғалысха сығарлар тіп ізенчелер, аннаңар иблерінзер нанминчалар. «Хайди мин хынғанымны мында артыс саларбын?» – тіпче ипчілернің полғаны ла. Ідӧк фронтта пастағы хынысты таап алған чиит хыстардаңар ӱзіктер пирілче.
«Чиңіc» культура кінінде иртчеткен кинофестивальда Олеся Шигинаның хызы Виринея араласхан. Ол ідӧк Донбасста полған, андағы хорғыстарны пос хараанаң кӧрген, анаң хоостар чайап салған.
– Ӧнетін чаа операциязы пасталыбысханда, минің харындазым контракт пазыбысхан. Андада мағаа уғаа аар пілдірген. Мин кӱннің сай ағаа сағыссырапчам. Піс тың чағын полғабыс, чахсы пілісчеңміс. Харындазыма хынызымны позымда тудын полбин, мин чаа операциязынаңар хоостар чайап сыххам. Іди «Уголь земли русской» проект тӧреен. Минің пӧгін пар – хоосчыларны, графиктерні Россия чааҷызының кӱзін искусство пастыра кӧзідерге кӧӧктіріп алары.
Виринеяның проектінде 9 тоғыс. Че чиит хоосчы ізенче, аның нанҷылары ағаа хозыларлар, анаң олар хоза кӧзідіг азарлар.
Кӱнӧрте «Русское лето. ZаРоссию» фестиваль Ағбандағы Культура паза тынағ паркында узарадылған. Прайзы даа пілче, Хакасияның ӧӧн городы спорт ӱлӱкӱннерін алғым иртіредір. Фестиваль тузында парктың футбол чазызында муниципальнай учреждениелернің спартакиадазы ирткен. Анда тиксі 9 команда араласхан, полған на ӧмеде сигізер кізі.
– Чиңіс тудары – спартакиаданың ӧӧні нимес. Пір ӧмеде пілізіп тудынары – ол ӧӧні. Ідӧк пӱӱн прайзының кӧңні чарых, анзы ідӧк уғаа чахсы. Таңда, тізең, піс наа кӱстіг пазох тоғысха сығарбыс. Фестивальны иртірерге кӱн дее чахсы тур пирді, – таныхтаан Ағбан город пазы Алексей Лёмин.
Культура паза тынағ паркында аймах площадкалар тоғынған. Чайаачыларға даа анда орын табылған. Олғаннар, мастер-класстарда аралазып, сыйыхтарнаң таныхтатханнар. Ідӧк тадылығ ас-тамахтарны амзап аларға чарир полған. Фестивальның аалҷыларын пирогтарнаң, вареньенең, мӧӧтнең, чейнең сыйлааннар.
Олох туста Н.Г.Булакиннің адынаң «Ағбан» спорткомплекс алнындағы ачыхта кӱс ойыннары ирткен. Анда городтың иң кӱстіг иреннері ілезіне сығарылған. Олар 150 кг теере штанганы кӧдіргеннер, хол пазысханнар, пір тонна тимір тирігні иңнілеріне артынып пас чӧргеннер, полғаны ла 120-лер килограмм тимір «чемоданнарны» ікі холнаң хаап чӧрген, 80 килограмм тимір «тӧгені» ӧӧр кӧдіргеннер, соонаң 1,5 тонна азыра автомобильлерні cӧӧртееннер. Прай даа марығларда иң кӱстіг Евгений Носиков полған.
Пауэрлифтингче спорт узы Владимир Муравлёв пір тонна тирігні паза саарбахтарны хаап парир
Пуох ачыхта город чуртағҷылары пауэрлифтингче спорттың саблығ устары Владимир Муравлёвнаң паза Пётр Мартыненконаң хынып сомға суурынчатханнар.
Ідӧк позығлығ чардыда чалаас азахтығ турчатхан чииттерні кӧрерге хынығ полған. Ол сынағны иртірчеткен ирен тідінминчеткен оолларның паза хыстарның хулахтарына пис минутаҷа ниме-де сыбыхтап турған. Анаң на олар позығлығ чардызар чалаас азахтығ турчатханнар.
– Ибде іди турарға кӱстенгем, че минің пір дее киліспеен. Аның ӱчӱн тасхар чалаас азахтығ пас чӧрҷеңмін. Мында ол сағызым толды. Ирен мағаа хатырынмасха, пос салынарға, амырадынарға кирек тіп хулаама чоохтаан, – ӱлескен Ағбандағы 10№ школаның 9 класстағы ӱгренҷізі Катя Пудова.
Спорткомплекс алнындағы ӧӧн сценада, тізең, пістің махачы чааҷылардаңар позының кибелістерін поэт паза драматург Мария Ватутина хығырған. Анаң чон алнынзар «Камеди Вумен» шоуның «чылтызы» Надежда Ангарская сыххан. Ырҷы Хакасияда пастағызын на полған. Сарыннар толдырған аразында ол хормачыланыбыс таа турған паза кӧрігҷілерні хада плесет саларға хығырған.
Иирде ӱлӱкӱн Россияның чон ырҷызы Олег Газмановтың паза «Эскадрон» группаның концертінең тоозылған. Аны кӧрерге «Ағбан» спорткомплекс алнынзар чон улам кӧп чыылыс парған. Москвадағы ырҷы прайзына таныс «Господа офицеры», «Вперед, Россия», «Солдаты России» паза пасха даа сарыннарын толдырған.
Таныхтирға кирек, хазнада «Русское лето. ZаРоссию» фестиваль Президенттің культура пастағлары фонды, Чон фронты паза Россияның Халых палатазы хабазиинаң иртірілче.
Сомнар Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
