«Хакас чирінең» – иркеҷектерге сыйых
08.09.2023
Хабарлар
Хакасияның национальнай паза территориальнай политика министрі Лев Сафьянов журналны пӧзік паалаан
Презентация. Хакас тілі кӱнінде «Хакас чирі» газетаның редакциязында «Ноға-ноғаҷахтар» («Почемучки») журналның презентациязы ирткен. Ол газетаның иң кічіг хығырығҷыларына кӧрілген хоза сығарызының материалларынаң тимнел парған
Журналның материалларын чыып пӱдірген авторлар «Хакас чирі» газетаның хабарҷызы Наталья Тюкпеева паза Ағбандағы «Кристаллик» олған садының воспитательі Светлана Ахпашева полчалар. Тиксі «Ноға-ноғаҷахтар» журнал редакция кӱзінең тимнелген. Сомҷылар коллажтар чайааннар. Андар чыылған материаллар сығар алнында прай редактураны ирткеннер – оларны корректорлар, номер редакторлары, ӧӧн редактор хығырғаннар. Журналның тасты, істі кӧрімінең ідӧк редакция верстальщиктері айғасханнар.
Пу тусха теере газетада сыхчатхан «Ноға-ноғаҷахтар» хоза сығарыстың кӧрімі, толдырылғаны даа кӧместең алызып одырған. Пастап анда орыс журналлардағы материаллар тілбестеліп тузаланылған ползалар, соонаң аны хакас тілінең палғалыстырар сағыс тӧреен. Ӧӧнінде редакцияның позының материалларын, хоостарын сығарар кӧстег турғызылған. Олған сады воспитательлерінең хада-пірге тоғынып, кічіг палаҷахтарға таптырғастар, хынығ ойыннар тимнел сыххан. Ол туста школа ӱгренҷізі Анастасия Индыгашева хоосчы полған, аның тоғыстары журналда парох, аныңох пір хоозы журналның тастын чазапча. Мындағ оңдайнаң журнал сығарарына прай ниме тимде полған тиирге чарир, че ахча киректелчеткен. «Хакас чирі» газетаның ӧӧн редакторы Радион Сунчугашев Хакасияның национальнай паза территориальнай политика министерствозынзар айланған.
Таныхтирға кирек, министерство хакас тілін тилідеріне кӧстегліг тоғыстарға улуғ хайығ салча. Республикада «Региональная политика» программа тӧстелген, аны хоостыра аймах журнал-книгалар сығарарына ахча кӧріл парған. Хайди чоохтаан национальнай паза территориальнай политика министрі Лев Сафьянов, «Ноға-ноғаҷахтар» журналны сығарар сағыс оларның кӧңнілеріне кірген, прай материалларнаң танысхан соонаң пу пӧгінге ахча пирерге чаратханнар.
Іди республика бюджедінең позыдылған ахчаа «Ноға-ноғаҷахтар» журналның 1 муң экземпляры чарых кӧрген. Ол иң кічіг хығырығҷыларға кӧстелген полза даа, чииттерге дее, улуғларға даа тузалығ полар. Журнал ікі тілнең сығарылған. Анда, чоохты алғыдарынаң пасха, холларның оох моториказын тилідеріне тоғыстар пирілчелер, ас-тамах, аң-хустар, оттар тілбестеглері паза хоостары пар, сӧбірее, кізі пӱдізіне, ӧңнерге, саннарға паза аннаң пасха даа темаларға чарыдылған кӧп хынығ таптырғастар табарға, кибелістер хығырып аларға чарир. Ідӧк журнал сӧбірені пиктиріне туза полар. Кічіг пала чалғызан тоғынмас, харындас-пиҷелерінең, іҷе-пабазынаң, аға-ууҷаларынаң хада. Іди сӧбіре палғалыстары тыып одырар.
Презентацияа хакас тілін, тиксі культуразын тилідерінең палғалыстығ тоғысты апарчатхан, аны хайраллиры ӱчӱн прай чӱреенең сағыссырапчатхан кізілер чыылғаннар. Полғаны ла пу кирекке позының улуғ хозымын итче тіп таныхтирға чарир. Оларның санында Хакасияның национальнай паза территориальнай политика министрі Лев Сафьянов, аның орынҷызы Юрий Чертыков, республиканың ӱгредіг паза наука министерствозының наука паза национальнай ӱгредіг пӧлиинің устағҷызы Ольга Доможакова полғаннар.
Светлана Алексеевна Ахпашева ноға журнал тимнирінде аралазарға чаратханнаңар чоохтаан: «Піс олған садында палаларнаң тоғынчабыс, че оларнаң хакас тілінең пілістерні алғыдар, ӱгренген сӧстерні пиктир тоғыс ибде апарыларға кирегӧк. Журналны тимнепчеткенде, воспитатель кӧрізінең кӧргем, хайди ол ағаа тоғыста полызар. Аңнардаңар алай оттардаңар хоостарны тӧӧй синніг идерге чӧп пиргем, оларны хыплап аларға чарир. Ағаа хоза, журнал чахсы чаҷыннаң тимнелген, аның сылтаанда ӱр тузаланылар».
Хакасияның национальнай паза территориальнай политика министерствозының устағҷылары «Ноға-ноғаҷахтар» журналны пӧзік паалааннар. Министр орынҷызы Юрий Чертыков прай редакция тоғынҷыларын алғыстаан. «Тіл ӱгренчетсе, сӧстер хоостарнаң хада полза, сағыста чахсы халчалар. Журналда пирілген хай пірее оттарның хакас аттарын мин дее пілбинчеткем, аннаңар ол улуғларға даа туза полар. Мыннаң мындар, материаллар чыып, теестегі журналны сығарарға кирек тіп санапчам. Киндее алай журналға ахча пирчетсе, тоғыс чахсы паза алҷаас чох толдырыл парар тіп ізенчезің. Мин пілчем, «Хакас чирінде» турыстығ кізілер істенчелер. Прай орта толдыр саларларына киртінгем. Тоғыс таа ниик парыбысхан, аукцион иртіргенде, журнал сығарар организация пір-ікі ле табыл парған», – ӱлескен сағыстарынаң Юрий Карпович.
Ідӧк журналны пӧзік паалаан паза уғаа кирек полчатханын таныхтаан ӱгредіг министерствозының наука паза национальнай пӧлік устағҷызы Ольга Доможакова.
Редакцияның устағ-пастаа, тоғынҷылары журнал сығарарына улуғ хозым иткен, сидіксіністерні тобырарға полысхан кізілерге ідӧк улуғ алғызын читірчелер.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
