Таштып аймаандағы Мадыр аалда iкi машина турғысчаң модульнай наа öрт ӱзiрӌең депо азылғаны öрт ӱзiрӌеңнерге паза орындағы чуртағӌыларға улуғ öрiнiс ағылды.

Пӱӱл февральда Иркутсктағы «Металл-строй» ООО-наң 29 млн 106 муң салковайға хазна чöптезии идiлген. Пӱдiрiг тоғызы июньда пасталған. Ӱc ай аразына пӱдiрiгӌiлер прай кирексiнiстерге килiстiре модульнай öрт ӱзiрӌең депоны кöдiрiбiскеннер.

Тураның улии – 280 квадрат метр. Андар кiрчелер: iкi машинаа кöрiлген гараж, тоғынӌыларның орны, тынанӌаң орын, котельнай паза санузел.

Мадырдағы модульнай öрт ӱзiрӌең депо Хакасия пазы Валентин Коновалов 2022 чылда чуртасха кирген öрт ӱзiрӌең хадағның тилiс пöгiнi хоостыра пӱдiрiлген. Олох пöгiнӌе Ширада тöрт машинаа гаражтығ öрт ӱзiрӌең депо пӱдiрiлче.