Пайрам. Асхыс аймаандағы Пилтiр аалда наа олған площадказы пайрамни азылған. Ол «Чонға иң тузалығ проект» республика марии хоостыра идiлген

Пайрамнығ мероприятиеде Хакасияның национальнай паза территориальнай политика министрi Лев Сафьянов, Асхыс аймаа пазы Абрек Челтыгмашев, Пилтiр аал чöбi пазы Виталий Капустин араласханнар. Площадканы азарын олған-узах чидiкпин сахтаан. Оларны «Лунтик» мультфильмнiң матырлары харыстаастар Вупсень паза Пупсень чылығ удурлааннар.

Олған площадказын пӱдiрерiнде кöп кiзi араласхан. Оларға алғызын читiрерге Виталий Капустин сыххан.

– Пӱӱн олғаннар адынаң площадканы пӱдiрген улусха алғызым читiрчем. Iкi чыл мының алнында мында ачых чир полған, изелчеткен тура орныххан. Пiс Абрек Васильевичнең мында чöргенiбiсте, ол пу орында парк пӱдiр саларға чöп пирген. Че мин ахчабыс читпес тiп нандырғам. Ол, тiзең, аймах администрациязы полыс пирер тiп нандырған. Абрек Васильевичтiң паза депутаттар чöбiнiң кнезi Александр Сергеевич Челтыгмашевтiң кӱстенiзiнең мында иң пастағызын спорт площадказы пӱдiрiл парған. Аннаң сығара пу орында тоғыс «хайнап» сыххан. Ирткен чылда спорт площадказы пӱдiрiл парғанда, пiс республиканың национальнай паза территориальнай политика министерствозынзар айланғабыс. Марығда аралазып, ӱзiнӌi орынға турысхабыс. Пазағы чылда пiс паркты хайди адирынӌа марығ чарлабызарбыс, – таныхтаан Виталий Павлович. Чооғын тоозып, ол проекттi чуртасха кирерiнде араласхан кiзiлерге алғыстастар читiрген.

Абрек Челтыгмашевтiң таниинаң, аал чöбi пазы, аймахтағы паза Ööркi Чöп депутаттары кӱстенiзiнең мында истiг парк тöстелче. Че прай тоғыстар спорт площадказын пӱдiрерiнең пасталған. Ол республиканың спорт министерствозы полызиинаң турғызылған. Аның соонаң пу орында ниме хоза пӱдiрерге сурығ турыбысхан. Чöптескен соонаң аны сиденнебiзерге чарадығ алылған. Национальнай паза территориальнай политика министерствозы полызиинаң мында олған площадказы пӱдiрiл парған. Пу орын аал чуртағӌыларын паза аалӌыларны пiрiктiрзiн. Че толдырӌаң тоғыс ам даа кöп, аннаңар аал чöбiне проекттерде öткiн аралазарға кирек. Орындағы пос устаныстар марииның сыйых чыындызында 3 миллионӌа салковай кöрiл парар. Пилтiр аалдағы ТОС-ха анда öткiн аралазарға киректелче.

Пайрамнығ мероприятиеде iдöк Лев Сафьянов чоох тутхан.

– Пилтiр аал чöбi улуғ тоғыс толдырған сылтаанда мында истiг орын пӱдiрiл парған. Пӱӱл пiстiң мариибыста кöп аал чöбi араласхан. Iди 74 муниципалитеттiң 34-i марығ чиңiсчiзi полыбысхан. Асхыс аймаанда алты аал чöбi сыйыхха турысхан. Iди аймахсар хоза 6 миллион артиинаң салковай кiрген. Пилтiр аал аннаң андар тилiзiн, öңнензiн. Чуртағӌыларның кöп сағызынаң пiстiң мариибыста аралазыңар. Палаларзар айланып, пу олған площадказын хайраллазыннар тiп сурынчам, – чоохтаан Лев Александрович.

Чооғын тоозып, Лев Сафьянов олған площадказын пӱдiрерiнде öткiн араласхан кiзiлерге алғызын паза сыйыхтар читiрген.

Алғыстастар тоозыл парғанда, хызыл лентаны хыплир тус читкен. Андағ оңдай Виталий Капустинге, Лев Сафьяновха, Абрек Челтыгмашевке, национальнай паза территориальнай политика министерствозы пöлиинiң пастых орынӌызы Ольга Тидеге пирiлген. Площадканың iзии азыл парғанда, олған-узах андар чӱгӱрген. Нымахтар матырлары оларға аймах ойыннар иртiр пиргеннер.

Хайди таныхтаан национальнай паза территориальнай политика министрi Лев Сафьянов, Пилтiр аал чöбi, «Чонға иң тузалығ проект» марығда аралазып, ӱзiнӌi орынға турысхан, 1 миллион салковай утып алған, ағаа хоза 700 муң артиинаң салковай паза аал чöбi 100 муң салковай хосханнар олған площадказы пӱдiриине. Аймах администрациязы пирген ахчаа олған площадказы сиденнелген, аал чöбi ахчазына чир участогы тӱзедiлген. Че итчең тоғыс ам даа кöп халған. Пилтiрдегi олған площадказы пӱӱл тиксi республикада сигiзiнӌi проектi пол парды. Киӌее iдöк Томыӌахтар аалда нааӌылалған спорт площадказы тоғынып пастаан.

Сом Ольга Тидени