Пӱдiрiглер. Ағбанда теннис корты тимге сыхты

Халғанӌы пис чыл аразына республикада спорт объекттерi саны пiлдiрте хозыл парған. Оларның кöбiзi «Демография» нацпроекттiң «Спорт – чуртас синi» федеральнай программазы хоостыра пӱдiрiлдi. Iдöк город-аймахтарға чахсы хабазығ пирче «Чонға кирек иң артых проект» марығ. Аны иртiрче Хакасияның национальнай паза территориальнай политика министерствозы. Муниципалитеттер, пу марығда аралазып, наа спорт объекттерiн пӱдiрерге кӱстенчелер. Кöзiдiмге, пылтыр Алтай аймаандағы Хойбал аалда хоккей ачығы тимге сыххан. Пiрееде город-аймахтарға спонсорлар спорт инфраструктуразын нааӌылирға полысчалар.

Ағбандағы «Тепсей» физкультура-хазых комплексiнiң устағ-пастаа, тiзең, пiрдеезiне iзенмин, пос кӱзiнең теннис кортын пӱдiрiбiскен. Наа объект комплекс хыринда орныхча. Аның улии – 18х36 метр. Ол улуғларға паза кiчiглерге кöрiлген. Хорадығлар синi – 7 миллион салковай. Спорт пӱдiриин 7 сентябрьда пайрамни асханнар. Мероприятиеде Ағбанның устағ-пастаа, «Тепсей» комплекстiң öмезi араласханнар. Чалама хыплалған соондох чыылған чон улуғ теннисте кзiн сынирға чӱгӱрген. Сизiнгенде, кöбiзi ракетканы пастағызын на холында тутхан, аннаңар кiзiлер меспектi ырахха сабызарға сидiксiнгеннер.

Ағбанда улуғ теннисче секция тоғынчаттыр, итсе, ол хазнани нимес. Тренер Александр Пушкиннiң таниинаң, андар 50-ӌе кiзi чöрче. Ööнiнде палалар. Секцияның позының залы чоғыл. Чылығ туста теннисисттер «Саяны» спорткомплексте ойнапчалар, соохтар турыбысса – «ВСК» компанияның спортзалында. Ол Советскай орамадағы 209 № турада орныхча. Олғаннар марығларға Минсуғзар пар килчелер. Хонӌых городта палалар улуғ теннис cекциязына тикке чöрчелер. Минсуғдағы спортсменнердең иң улуғ чидiге Евгений Чиженок читтiр. Пiр туста ол 16 часха читкелек теннисисттернiң аразында Россияның 16 иң чахсы спортсменi санына кiрген. Хакасияда улуғ теннисче пос чемпионнары полар ба, чуртас кöзiдер. «Тепсей» комплекстiң устағ-пастаа секцияны 2024 чылда часхызын тоғындырарға пöгiнче. Аның ӱчӱн тöлирге килiзер.

Пӱӱлгi кӱскӱзiн Ағбанның чуртағӌыларына соохтар полғанӌа кортта тикке ойнап алар оңдай пирiлер. Пос ракетказы чох полза, аны арендаа алып аларға чарир. Англияда тöстелген спорт кöрiмiнде кӱстерiңнi cынирға сағынчатсаңар, 8(3902)202-201 телефонӌа сығдырадыңар. Чоохтирға кирек, «Тепсейде» аймах спорт кöрiмнерiн тилiдерге хынадырлар. Пу чалғыс учреждение, хайда кёрлингнең айғазарға чарир.

Спорттаңар чоохтаза, улуғ теннисте пiстiң спортсменнердең тоғыр хатығластар кирiлбеен. Россия теннисисттерi аймах марығларда тöремiл араласчалар. Кöзiдiмге, пу наада ирткен США-ның азых чемпионадында ойнааннар Даниил Медведев, Андрей Рублев, Карен Хачанов, Роман Сафиуллин, Аслан Карацев, Павел Котов, Александр Шевченко. Медведев финалда саблығ Новак Джоковичке утыр салған, кӱмӱс призёр полыбызып, ол 1,5 миллион доллар холға кирген. Iдöк чемпионаттың азах меедiнде Вера Звонарёваа оң полбаан. 39 частығ спортсмен Лаура Зигемунднаң хада пiрiгiп, Габриэла Дабровскинiң паза Эрин Рутлиффтiң дуэдiнең тоғыр ойнааннар. Звонарёванаң Зигемундха чиңiс тударға кöмес ле читпиндiр. 

 Сом Альбина Чистогашевани