Тöдiр пазынмастар
![Тöдiр пазынмастар Тöдiр пазынмастар](/upload/iblock/fd0/xeub3g6iab3parvf0ady2m1ztlhuluo8.png)
Хазых чуртас. Пiстiң хазнада ГТО нормативтерiн толдырарында кiчiг палалардаң пасти улуғ частығларға теере араласчалар
Киӌее Ағбандағы В.И.Чарковтың адынаң олимп резервi училищезiнiң стадионында кiчiг спорт пайрамы полды. Пеер пiстiң республиканың прай даа аймахтарындағы ортымах школаларның, Ағбандағы, Абазадағы, Харатастағы спорт школаларының ӱгренӌiлерi ГТО нормативтерiн толдырар марығда аралазарға чыылысханнар. Полған на командада 14 ӱгренӌi саналған.
– Аарлығ нанӌылар, ӱгренӌiлер! Спорт пайрамынаң алғыстапчам. Хакасияда чыл сай ГТО нормативтерiн толдырӌаң наа спорт ачыхтары тузаланысха кирiлчелер. Пу тоғыс тохтабас, узарадылар. Спортнаң айғасханы хазых чуртас чолын таллап алғанын киречiлепче, – ӱгренӌiлернiң тиксi республика cинiндегi арға-мöрiйiн асхан Хакасия пазы Валентин Коновалов.
Анаң сöс пирiлген Хакасияның физическай культура паза спорт министрi Сергей Кочанға. Ол прай палаларны наа ӱгредiг чылы пасталғанынаң чылығ алғыстаан паза, аймах марығларда аралазып, чиңiстер тударға, тöреен чирiбiстi пöзiк чидiглернең сабландыр турарға алғаан. Сергей Владимирович спорт пайрамына чыылысхан улусты мындағ öрiнiстiг саннарнаң таныстырған: ирткен чылларда Хакасиябыс ГТО комплексiнiң нормативтерiн толдырарынӌа тиксi хазна синiнде 62-ӌi орында полған полза, амды 36-ӌы орында саналча.
– Хада-пiрге тудынып, хазых чуртасха кöп кiзi тартып алзабыс, пу кöзiдiмнi уламох пöзiк синге кöдiрiп аларбыстар, – iкiнӌiлес чох чоохтаан Хакасияның физическай культура паза спорт министрi Сергей Кочан.
Хаӌан ГТО нормативтерiн толдырар арға-мöрiй пайрамни азылғанда, аның араласчылары Хакасия пазы Валентин Коноваловнаң хада сомға суурынып аларға чаратханнар. Ол туста пiс Ағбандағы В.И.Чарковтың адынаң олимп резервi училищезiнiң устағӌызы Денис Кокояковнаң хада стадион марығлар иртiрерiне хайди тимнелгенiн кöргебiс. Арға-мöрiй чарғыӌылары постарының орыннарында пастырыс чöрчеткеннер, ӱгренӌiлернi сағыпчатханнар.
– Пеер Хакасиядағы школаларның пасталығ класстарынаң пасти спорт школаларының ӱгренӌiлерiне теере чыылыстылар. Иң улуғлары 24 частығ поларға кирек. ГТО нормативтерiн толдырыбысханнарға алтын, кӱмӱс, хола медальлар пирiлче. Оларға частары хоостыра чыл сай нормативтернi толдыр турарға чарадылча, – чоохтапча каратеӌе чоннар аразындағы спорт узы, училище директоры Денис Кокояков.
Пiс тохтабысхабыс. Iкi хызыӌах ниик атлетиканаң айғасчатхан спортсменнер чӱгӱр чöрчеткен чолда тур тастабыстыр. Марығлар пасталарына ам даа ирте. Че олар азынада тимненiп пастабысхан осхастар.
– Хайдаң килгезер? – сурыбысты Денис Васильевич.
– Ширадаңмыс. Ирткен чылда таштыптағылар эстафетаны маңат чӱгӱрiбiскеннер, амды пiс оларның кöзiдiмнерiн ас парыбызарға кирекпiс, – махачыланчалар Шира чирiнең килген хызыӌахтар.
– Таштыптағылар уламох чахсы тимнен салған поларлар, – чир-суғӌыларымның алнын аларға харасчам.
– Пiс тее тöдiр пазынмаспыс, – öдiске халбинчалар олар. Оолағастар, тiзең, турникте тартынарға тимненчеткеннер. Прайзы даа чахсы пiлче, командалар кöп, че пастағы орын пiр ле. Аннаңар тöдiр пазынарға чарабас.
Cом Альбина Чистогашевани
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |