Ööркi Чöп. Хакасияның читiнӌi хығыртии Ööркi Чöбiнiң президиумы халғанӌы чыылиин иртiрген

Чыылығны Ööркi Чöп кнезi Владимир Штыгашев апарған. Кӱн суриинда пiр ле сурығ полған – Хакасияның VIII хығыртии Ööркi Чöбiнiң пастағы сессиязын иртiрӌең кӱннi чарадыға алары. Ööркi Чöп президиумы пастағы сессияны, сöö тартпин, килер неделяда, 22 сентябрьда, иртiрерге чарат салған.

Анаң Владимир Штыгашев пу ирткен пис чылда тоғынған прай депутаттарға пiрге паза тӱзiмнiг тоғынғаннары ӱчӱн алғызын читiрген, ол тоғысты наа Ööркi Чöпте узарадар депутаттарны, чонға туза ағылып, уламох тӱзiмнiг тоғынарға алғаан. Паза Владимир Штыгашев наа Ööркi Чöп республиканың наа тöстелер правительствозынаң хада-пiрге тоғынарына iзенiзiн читiрген.

– Ол тоғыс, иң пурун, республика чуртағӌыларына туза ағыларына кöстеглiг поларға кирек, – таныхтаан Владимир Николаевич.

Владимир Штыгашев Хакасияның читiнӌi хығыртии Ööркi Чöбi, аймах-пасха партиялығ полза даа, Хакасия правительствозынаң iди тоғынған тiп искiрген.

– Тиксi республиканың читiнӌi хығыртии Ööркi Чöбi, законнар сығарӌаң орган чiли, пос пöгiннерiн толдырыбысхан тiп санапчам, – теен президиум чыылиинда Владимир Штыгашев. – Салтарларның пiрсi – бюджет 24 миллиард салковайдаң 52 миллиардха теере öс парғаны. Мында толдырығлығ ӱлгӱ ле нимес, iдöк Ööркi Чöп чахсы тоғыныбысхан.

Президиум чыылиинда тимнеглiг комитет тöстелгенiнеңер искiрiлген. Андар аймах партияларның кiзiлерi кiрче: «Единая Россиядаң» – 5, КПРФ-таң – 3 паза ЛДПР-даң – 1. Тимнеглiг комитеттiң ööн пöгiнi пастағы сессиянаң палғалыстығ сурығларны пöгерi полча. Кöзiдiмге, депутаттарға орыннарны (кем хайда одырарын) кöр cаларға, санаӌаң паза мандатнай комиссияларзар, секретариатсар кемнернi кирерiнӌе чöптернi тимнеп саларға кирек. Iдöк комитет сессияның кӱн суриинзар хайдағ сурығлар кирерiн ӱзӱрiбiзер.

Сом Хакасияның Ööркi Чöбi сайтынаң