Аалда чуртирға истiг ползын
![Аалда чуртирға истiг ползын Аалда чуртирға истiг ползын](/upload/iblock/b35/s7hspbm5pcpy7vgmyn318dk9vz0ku1ze.png)
Ӱлӱкӱн. Таштып аймаандағы Кiчiг Арбыт аалда Хакасияның национальнай паза территориальнай политика министрi Лев Сафьянов пол килген
Олаңай чорых нимес, мында Культура туразы хыринда пайрам ирткен. Пастыхтар паза аалдағы чон чыылысхан. Иң чахсы социальнай проект мариинда Арбыт аал чöбi 2022 чылда грант утып алтыр, 2-ӌi чардығына чарыдылған проекттерi «Кiчiг Арбыт аалдағы Культура туразының ибiркi чирлерiн иптирi» адалча. Культура туразы ибiре наа тимiр сиден, сiлiг чарытхы фонарьлары, одырчыхтар, сöп-сап чығӌаң урналар, олған площадказы турғызылғаннар. Паза клуб алнында, тротуар идiп, плитка салылған, пiр сöснең, Культура туразы алнын иптебiскеннер. Таныхтирға кирек, аның алнында Культура туразында алғым тыхтағ тоғыстары идiлген, аннаңар аал чуртағӌыларына уғаа öрiнiстiг андағ алызығларны кöрерге.
Проекттiң iкiнӌi чардығы 2023 чылда чуртасха кирiлген. Арбыт аал чöбi, тоғыстарны тоозарға тiп, республиканың национальнай паза территориальнай политика министерствозының мариинда iкiнӌi хати аралазып, сыйыхтығ орын алып алған. Утып алған ахчаа хоккей, баскетбол, волейбол, мини-футбол ойнаӌаң площадка пӱдiр салғаннар (пӱдiрiгӌi – Хызылчардағы «ЮМАГС» компания). Тоғыстарның пастағы чардығын идiнӌек Виталий Чучалин толдырған. Прай пӱдiрiгнiң iкi чардығына 3 млн 117 муң салковай парыбысхан.
Аал чöбi проекттi чуртасха кирерiнде араласхан кiзiлернi алғыстас пiчiктерiнең сыйыхтаан: идiнӌектер Марина Ачолованы, Артур Кенкельнi паза Константин Султрековты, Кiчiг Арбыттағы культура туразының öмезiн, «Хакасский леспромхоз-2» ООО устағӌызының орынӌызы Ольга Киргинекованы, национальнай паза территориальнай политика министерствозының тоғынӌызы Ольга Тиденi.
Кöп кöстеглiг спорт площадказын азарында хызыл чаламаны Арбыт аал чöбi пазы Сергей Чебодаев, Таштып аймаа пазының орынӌызы Елена Алексеенко, республиканың национальнай паза территориальнай политика министрi Лев Сафьянов хыплааннар. Палалар сах андох олған площадказында ойнап сыхханнар, улуғлар, тiзең, спорт площадказын кöрiп аларға чағын пастырғаннар. Ол хоккей ойнаӌаң коробкаа тööй, аның пӱдiриинеңер хаӌаннаң чоох парған. Ноға? Арбыттағылар – хоккей ойнирға хынчатхан чон. Тренер Сергей Миндибеков iӌе-пабаларға спорт тирiглерiне амох ахча чыырға чöп пирген – шлемге, клюшкаа, конькилерге.
Чиит iӌе Наталья Тахтаракова öрiнiзiнең ӱлескен: «Проекттi чуртасха кирген кiзiлерге арбыттағы iӌе-пабаларның адынаң алғызыбыс читiрчебiс, амды пiстiң палаларыбыстың пос тусты иртiрӌең орын пар! Ағаа хоза спортнаң айғасчаң орын тöстелген, ӱр ниместе Кiчiг Арбытта олған садын нааӌылабысханнар, школаны тыхтапчалар. Аалда андағ чахсы оңдайлар тöстелзе, чииттерге дее чуртирға истiг полар».
Сом авторни
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |