Пiрге тоғынзабыс, хайдағ даа сидiк пöгiннерге сыданарбыс!
![Пiрге тоғынзабыс, хайдағ даа сидiк пöгiннерге сыданарбыс! Пiрге тоғынзабыс, хайдағ даа сидiк пöгiннерге сыданарбыс!](/upload/iblock/6f0/9f2brr2cr7r88wt9l9txzxyvsdnz2nsx.png)
Инаугурация. Валентин Коновалов Хакасия пазы должнозына кiрiбiскен
Ирткен табығларда, табығӌыларның 63,14 % ӱнiн чыып, чиңiс тутхан Валентин Коновалов пазағы пис чылға Хакасия пазы должнозына официальнай оңдайнаң кiрiбiскен. Законодательствоӌа кöрiл парған инаугурация ӱртӱн айының 18-ӌi кӱнiнде А.М.Топановтың адынаң драма театрында ирткен.
Пайрамнығ мероприятиеде федеральнай ӱлгӱ кiзiлерi, Россияның Хазна Думазының паза Хакасияның Ööркi Чöбiнiң депутаттары, муниципальнай пӱдiстернiң пастары, халыхтарның паза национальнай пiрiгiстернiң кiзiлерi араласханнар. Аарластығ аалӌылар аразында – Россия президентiнiң Сибирьдегi федеральнай округтағы полномочиелiг кiзiзi Анатолий Серышев, Хазна Думазының безопасностьча паза коррупциядаң тоғыр кӱрезерiнӌе комитедiнiң кнес орынӌызы Юрий Афонин, Ағбандағы паза Хакасиядағы архиепископ Ионафан.
Инаугурация залзар флагтар кирiлгенiнең, Россия паза Хакасия гимннерi толдырылғанынаң пасталған. Анаң сöс пирiлген Хакасияның Табығ комиссиязының кнезi Александр Чуманинге. Ол табығлар ирткенге паза сынға саналғанынаңар чарлаан, Валентин Коновалов Хакасия пазына табылғанынаңар искiрген.
Валентин Коновалов, сценазар сығып, присяга алған паза чыылысхан чонзар айланған:
– Пу танығлығ кӱнде, Хакас Республиканың пазы должнозына кiрiп, мин республика чуртағӌылары, Россия Федерациязының президентi алнында улуғ нандырығлығ полчатханымны оңарчам!
Пiс, Хакасия чуртағӌылары, постың кiчiг чир-суубыстың, уғаа пай культуралығ, хайхастығ чир-чайааннығ, iстенiстегi чидiглерiнең саблығ хас-пурунғы чирiбiстiң сын патриоттары полчабыстар! Хакасияны мыннаң мындар тилiдерiне, республика чуртағӌыларының чуртазын чахсыландырарына прай кӱзiм саларбын.
Позының чооғында ол iдöк табығӌыларға алғызын читiрген:
– Мин Хакасияның полған на чуртағӌызына, кем пiстiң таңдағыбыс ӱчӱн сағыссыраан паза табығ участогынзар килген, алғызым читiрчем. Алынӌа алғыс сöстерi табығларда мағаа паза пicтiң командаа хабасханнарға. Улуғ алғыс сiрернiң ӱннерiң ӱчӱн!
Валентин Коновалов ирткен пис чылдағы тоғыстың чидiглерiн таныхтаан. «Хакасия сидiксiнiстердең сығып алғаны – ол республика правительствозының, Ööркi Чöптiң, муниципальнай пӱдiстернiң, полған на чуртағӌының пiрге iстенiзiнiң салтары, ол Россия президентiнiң паза правительствозының хайии паза хабазии» тiп искiрген.
Хакасияның 2030 чылға теере алылған Тилiс стратегиязында кöзiдiл парған ööн кöстеглерге хайығ айландырған. Ол стратегия чуртағӌыларның чахығларына тöстене пӱткен паза аймах-пасха партиялар пiр команданаң тоғынчатханының, республиканың паза федерацияның прай синдегi ӱлгӱлерi пiрге тӱзiмнiг палғалыс тутчатханының кöзiдiмi пол парған.
Валентин Коновалов пiрге тудынып ла, прай кӱстенiстернi пiрiктiрiп ле салтарларға чидерге чарирын таныхтаан:
– Я, пiстiң ам даа кöп сидiксiнiс пар. Пiстiң экономикабыс кӱстiг дее паза чуға даа сарилығ. Че мин киртiнчем, пiрге кӱстенiстернең пiс чуға сариларыбысты кӱстiге айландырып аларбыс, хайдағ даа сидiксiнiстерге сыданарбыс!
Хакасия пазы, чооғын тоозып, республикадағы политика кӱстерiнзер айланған:
– Пӱӱн пiс, пасхалалчатханыбысха хайығ салбин, пiстi пiрiктiрчеткен пöгiнге хайығ саларға кирекпic – Хакасия чуртағӌылары алнында нандырығлығ полчатханыбысха паза оларның чуртазын чахсыландырарына. Мин, республиканың ööркi должностьтығ кiзiзi чiли, Хакасияны тилiтчең киректе прай союзниктерге, чуртасха кöрiстерiбiс паза партияларыбыс пасхалалчатса даа, хабазарбын паза оларнаң пiрге тоғынарбын тiп молӌапчам.
Пiс, Хакасия чуртағӌыларының чуртазын чахсыландырардаңар сағынып, пiр команданаң тоғынзабыс, хайдағ даа сидiк пöгiннерге сыданарбыс. Хада пiс хайди даа салтарға чидербiс!
Киртiнчем, тöреен чирiбiске сын полғаныбыс, пöзiк узыбыс, тiспен icтенiзiбiс Хакасияны паза Россияны öңнендiрер!
Валентин Коноваловты Хакасияның пазы должнозына кiргенiнең алғыстап, алғас сöстерiнең чоох тутханнар Россия президентiнiң Сибирьдегi федеральнай округтағы полномочиелiг кiзiзi Анатолий Серышев, Хазна Думазының депутады Юрий Афонин, Хакасияның Ööркi Чöп кнезi Владимир Штыгашев паза Ағбандағы паза Хакасиядағы архиепископ Ионафан.
Амды, Хакасия пазының инаугурациязы ирт парғанда, республика правительствозы полномочиелерiн суурыбысхан. Анзын закон кирексiпче. Че правительство iдöк тоғынар, наа министрлер кабинедi тöстелгенӌе. Хайди искiрче Хакасия пазының паза Хакасия правительствозының пресс-службазы, килiстiре чарадығда хол салылған. Закон хоостыра хазна ӱлгӱзiнiң толдырығлығ органнарының системазын тöстирiне пiр ай пирiлче.
Сом Дмитрий Сунчугашевти
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |