Школадаң кöп чайаачы олған сыхча
![Школадаң кöп чайаачы олған сыхча Школадаң кöп чайаачы олған сыхча](/upload/iblock/395/smumus5rxg5pp5qwrtkwbcxxmo60tf7i.png)
«Культура» нацпроект. Алтай аймаандағы Новороссийскай аалда музыка школазы тиксi тыхтағ тоғызы соонаң iзиин асты
Сентябрь айның айас кӱнiнде музыка школазы тастында чон толдыра чыылыс парған. Прайзының кöңнi чарых, уламох аалдағы олған-узахтың. Олар уроктар соонаң пу ӱлӱкӱнге маңзыраанға тööйлер. Ӱгренӌiлер школа формалығ паза рюкзактығ турғлапчатханнар. Чон Хакасия пазы Валентин Коноваловтың килерiн чидiкпин сахтапчатхан. Аал чуртағӌылары улуғ аалӌы килерiне азынада музыка школазынзар чыылыс партырлар.
– Пастағызын пу барак полған. Анаң депутаттар чöбi чарадиинаң мында музыка школазын азарға пöгiн турғызылған. Iди 1985 чылда Новороссийскай аалда музыка школазы тöстелген. Пеер кöг тирiглерi паза парталар алылған, тоғынӌаң кiзiлер килгеннер, – чоохтапча музыка школазының директоры Юлия Кулёва. – Аннаң сығара пос кӱзiнең оох тыхтағ тоғыстары иртiрiл турған. Амды школа тиксi нааӌылалды. Аны ибiре чылығлабысханнар, анаң профлистнең чабысханнар. Пастап чарытхы кӱзiнең чылытчаңмыс, амды модульнай котельнай турғызыбысханнар. Школа iстiнде стенелернi, потолокты, полны прай тӱзедiбiскеннер. Алында ағас рамалығ иргi кöзенектер турғаннар, амды пластикке алыстырылғаннар. Чарытхы эмектерi пӱкӱлее нааӌылалған. Музыка школазының хырын 2018 чылда алыстырғаннар, аннаңар пӱӱл ағаа теңмееннер. Iдöк пис чыл мының алнында школада санузел идiлген.
«Эгида» подряд пiрiгiзi тиксi тыхтағ тоғысты пӱӱл март айда пастаан, анаң июньда тоос салған. Ол «Культура» национальнай проект хоостыра иртiрiлген. Ағаа прай 5 миллион азыра салковай хорадылған. Ахча федеральнай, республика паза аймах бюджеттерiнең позыдылған.
Июль-август айларда наа мебель алылған: парталар, одырчыхтар, шкафтар. Iдöк музыка школазы iкi баянға паза саннығ пианиноға чидiндi. Баяннар 305 муң салковайға тур парғаннар, саннығ пианино – 160 муң салковайға.
Музыка школазында олғаннар ӱс кöстегӌе ӱгренчелер: хор, баян паза фортепиано класстары. Школаа 32 пала чöрче. Итсе, аалда 6 – 17 частығ 350 азыра пала чуртапча. Iдöк хонӌых ааллардаң олғаннар Новороссийскайдағы музыка школазынзар чöрчелер. Баяннаң ойнирға Екатерина Владимировна Белькова ӱгретче, фортепианонаң – Елена Александровна Ковалёва, хорда сарнирға – Наталья Александровна Бахтерева.
– Пу школаны тоосхан ӱгренӌiлер чуртаста чайаачы чолын таллапчалар. Мария Тирунова Москвадағы саблығ öмеде сарнапча. Константин Бахтерев ӱр чыллар Новосибирсктегi искусство школазында тоғынған. Пӱӱнгi кӱнде Ағбанда iстенче. Пiстiң олғаннар Ағбандағы искусство институдынзар ӱгренерге кiрчелер. Iдöк ӱгренӌiлерiбiс республика синiндегi, тиксi Россиядағы паза чоннар аразындағы марығларда чиңiсчiлер паза дипломанттар полыбысчалар, аал паза школа чуртазында сыбыра öткiн араласчалар, концерттер кöзiтчелер. Мин позым даа хаӌан-да Новороссийскайдағы музыка школазының фортепиано клазын тоосхам, – таныхтапча Ю.С.Кулёва.
Школаның иркiнiн алтир алнында Хакасия пазы Валентин Коновалов, культура министрiнiң орынӌызы Николай Евдокимов, Алтай аймаа пазы Ирина Войнова, музыка школазының директоры Юлия Кулёва кибiрли хызыл лентаны хыплааннар. Аарлығ аалӌыларны ӱгренӌiлер улуғ каравайнаң удурлааннар. Хакасия пазы аны амзирға прай палаларны хығырған.
Анаң концерт залында чайаачы олғаннар улуғ нимес концерт кöзiткеннер. Чоннар аразындағы паза тиксi Россия синiндегi марығларда сыбыра чиңiсчi полыбысчатхан Иван Мирончик «Хайхастығ абдыраӌах» кöгнi баяннаң ойнаан. Iкi «чылтызах» Роман Бельков паза Ольга Понкратова, пианинонаң ус ойнап, аалӌыларға Сергей Рахманиновтың «Итальянская полька» кööн сыйлааннар.
– Пӱӱн кöңнiбiс уғаа чахсы. Школабыс öңненче, тилiпче. Ол алында даа уғаа чахсы полған, амды улам öкер пол парды. Ӱгретчiлерiбiс чахсы пiлiс пирчелер. Пу школада Александр оолғым фортепиано клазын тоосхан. Ам Кира хызым олох фортепиано клазында ӱгренче. Пiс мында ынағ чуртапчабыс, удур-тöдiр хаӌан даа полызысчабыс, – öрiнiзiнең ӱлесче iӌе Анна Елизарьева.
Таныхтирға кирек, Новороссийскай аалда наа Культура туразы пӱдiрiлче. Ол iзиин пазағы чылда азар. Аалдағы чуртағӌылар аны iдöк чидiкпин сахтапчалар.
Сом Дмитрий Сунчугашевти
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |