Амыр чуртазыбыс ӱчӱн турысхан
![Амыр чуртазыбыс ӱчӱн турысхан Амыр чуртазыбыс ӱчӱн турысхан](/upload/iblock/e03/k2b7o2wrhfpzmh9wt1mfrxmjpgy8ul63.png)
Хумартхылас. Асхыс аймаандағы Ööк пилтiрiндегi школада Украинада иртчеткен öнетiн чаа операциязында тынын пир салған Александр Атанаевке хумартхылас чардызы азылған
Хумартхылас мероприятиезiнде Асхыс аймаа пазының пастағы орынӌызы Евгений Костяков, Ööк пилтiрi аал чöбiнiң пазы Николай Спирин, Асхыс, Таштып аймахтарынӌа паза Абаза городча чааӌылар комиссары Евгений Чаптыков, школа директоры Игорь Албычаков, матырның туған-чағыннары паза ӱгренӌiлер араласханнар.
Хумартхылас чардызын азарға школа президентi Динара Кичееваа пирiлген. Хайди таныхталған, сын матырлар олаңай чуртаста кöрiнминчелер, че хорғыстығ туста олар, постарының чуртазына айабин, Чир-суубыстың ӱчӱн турызарға хаӌан даа тимделер. Махачы хылиин кöзiткен Александр Атанаевке прай чоныбыс поғдархапча.
Ада чир-суубыс сидiк тузын тобырча. Öнетiн чаа операциязында чааӌыларыбыс Донбасс матырларынаң хада хазнабыстың ӱчӱн махачы чааласчалар. Пӱӱл хысхызын Новгород облазындағы чааӌылар частьының чааӌызы кiчiг сержант Александр Атанаев Чир-суубыстың ӱчӱн чаалазығлар тузында сын чирзер парыбысхан. Позын махачы тудынған ӱчӱн ол хазна сыйиина – Мужество орденiне – турысхан. Ол 34 частығ ла полған. Александр Валерьевичтiң ӱс палазы паба чох халған. Александр Атанаев чааӌы службазын улуғ атығӌы полып апарған. Хайди таныхтаан Игорь Албычаков, Александр Атанаев школа ӱгренӌiлерiне турыстыра кöзiдiм полча. Хумартхы чардызын кöрiп, олар улуғ арғызына поғдархирлар.
Матырның пиӌезi Рада Аскаракованың чооғынаң, Саша школазар хаӌан даа öрчiлiг чöрген, арғыстарынаң ойнаӌаң, чуртазына öрiнӌең. Че Мужество орденiн ол кöксiне хаӌан даа хаптырбас. Рада Анатольевна, олғаннарзар айланып, чуртастарын хайраллирға сурынған.
– Александрның паба-iӌезiне алғызым читiрчем. Олар Ада чир-суубыстың сын матырын öскiр салғаннар. Чиит кiзiнiң чуртазы ӱзiл парғанына чӱрек ағырча. Ӱгренӌiлерзер айланып, таныхтирға сағынчам, матырыбыс тиктең нимес чуртазын пир салғанын хаӌан даа ундутпаңар. Ол Чир-суубыстың ӱчӱн турысхан. Мындағ матыр ооллар пiстiң амыр чуртазыбыс ӱчӱн турысчалар. Олар ыырӌыны пеер позытпинчатхан сылтаанда, пiс атыстарны паза чара чачырастарны испинчебiс. Амыр чуртазыбыс ӱчӱн чааласчатхан чир-суғӌыларыңны хаӌан даа ундутпаңар, – чооғында таныхтаан Евгений Костяков.
Николай Спириннiң сöстерiнең, хумартхы чардызы матырыбысты улуғлапчатханын таныхтапча. Александр Атанаев кiзее полысхах паза хаӌан даа чарых кöңнiлiг полӌаң. Ӱгренӌiлер матырыбысха турыстыра ползыннар.
Евгений Чаптыковтың таниинаң, öнетiн чаа операциязының пастағы кӱннерiндöк Александр iкiнӌiлебин Чир-суубыстың ӱчӱн турызарға парыбысхан. Ол ӱгренӌiлерге кöзiдiм ползын.
Хайди таныхтаан ӱгретчiзi Артём Ултургашев, Саша маңнаныстығ ӱгренген. Аннаң пасха, ол спортнаң айғасхан, школаның халых чуртазында öткiн араласхан. Школада Александр Чир-сууна хынарға ӱгренiп алған, аннаңар Чир-суубыстың хорғыстығ тузында ол фронтсар парыбысхан. Аның хысхаӌах, че чарых чуртазы ӱгренӌiлерге кöзiдiм ползын.
Чобағлығ мероприятиее килген чон, матырыбысты хумартхылап, пiр минута сым турған. Анаң хумартхылас чардызынзар чахайахтар салылған.
Сом авторни
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |