Тоғазығ. Хакасия пазы Валентин Коновалов республикадағы муниципальнай пӱдiстернiң наа табылған пастарынаң тоғасхан

Киӌее, ӱртӱн айының 21-ӌi кӱнiнде, Хакасия пазы Валентин Коновалов республика правительствозы туразында аал чöптерiнiң наа табылған пастарынаң тоғазығ иртiрген. Тоғазығда iдöк Хакасия пазының пастағы орынӌызы тоғызын толдырчатхан Татьяна Курбатова, орынӌызы тоғызын толдырчатханнар Михаил Побызаков, Юрий Курлаев паза Сергей Комаров араласханнар.

– Алғыстапчам сiрернi пу нандырығлығ тоғысха табылғанынаң! – алғыстаан Валентин Коновалов пу табығларда утып алған аал чöбi пастарын. – Сiрер чонға иң чағын полчатхан ӱлгӱзер, чуртағӌылар прай сурығларнаң, хоптарнаң иң пурун сiрерзер айланчалар. Аннаңар сiрернiң тоғызыңар «сахар нимес, хуруп парған хатығ халас» тиирбiс.

Республика пазы аал устағӌыларының кöбiзi хати табылғанын, оларның чахсы опыды парын таныхтаан. Наа устағӌыларға, тiзең, республика ӱлгӱлерi хайди даа хабазарлар тiп чоохтанған.

– Мин ол пöгiннi министерстволар паза ведомстволар алнында турғысчам, оларзар хорыхпин айлан турыңар, – теен Валентин Коновалов. – Чолыңар азых ползын! Пiстiң ааллар öткiн тилiзiн!

Наа табылған аал чöптерi пастарының адынаң Ағбан пилтiрi поселоктың пазы Нина Леонченко чоох тутхан.

– Сiрер сын чон губернаторы полчазар, анзын ирткен табығларның салтарлары кöзiткен, – таныхтаан ол. – Iдöк чонға туза ағылып тоғыныңар, пiс, тiзең, хаӌан даа хости поларбыс.

Мының соонаң тоғазығ олаңай чоохтазығ оңдайынаң парған. Хакасия пазы аал чöбi пастарын, оларны хайдағ сурығлар сағыссыратчатханын, истiп алған. Аал устағӌыларының хайзы сидiксiнicтернi пöгерiне полыс пирердеңер сурыныстары парох полған. Кöзiдiмге, Асхыс чоғархы аал чöбiнiң пазы Александр Окунев, Хакасия пазы полызиинаң наа школаны пӱдiрер сурығ тибiреп сыхханын таныхтап, олох туста кирек пiчiктернi тимнирiне ахча кöмес чидiспинчеткенiнеңер искiрген. Пасхазының даа ахчанаң полыс пирерге айланыстары пар полған. Валентин Коновалов прай сурыныстығ пiчiктернi тоғазығ соонаң ағаа читiр пирерге сурынған.

Iдöк кöп аалларның сидiк сурии чоллар полча, оларны иптирiне аал чöптерiнiң ахчазы чидiспинче, программаларға даа кiр полбинчалар осхас. Валентин Коновалов ол сурығны кiчiг паза ыраххы аалларға хабасчаң программа полызиинаң, андар хоза кöстег – чолларны иптирi – кирiп, пöгiбiзерге чарир тiп таныхтаан.

– Пазағы чыл тиксi Россияа аар полар, федеральнай бюджет амох дефициттiг. Нименең ол палғалыстығ полчатханын пiс прайзыбыс пiлчебiс, – теен Хакасия пазы Валентин Коновалов. – Че пiс региондағы программаларны тыыдарбыс ла. Кöзiдiмге, аалларда чарытхы турғызарына, чолларға ахчаны сала кöп позыдарбыс. Пiлдiстiг, прай кирексiнiстернi пöгiбiсчең пicтiң оңдайыбыс чоғыл, че пiс кӱстенербiс.

Республика устағӌызы аал чöптерi пастарын iдöк öткiн тоғынарға хығырған. Гранттар марығларында аралас турарға, пос бюджедiнзер ахча кирерiнӌе тоғынарға.

– Пiстiң ööн пöгiнiбiс – бюджеттернi посха сыданар ит салары, – кöстег турғысхан Хакасия пазы. – Анзына кöп оңдайлар пар (олох чирлернi санға алары, туризмнi тилiдерi), ööнi – оларны чуртасха кирерi.

Тоғазығны тоозып, Валентин Коновалов аалларӌа чöр турарын, чоннаң тоғазығлар иртiрерiн узарадарға молӌаан.

Сом Дмитрий Сунчугашевти