«Россияның хабарҷылар пірігізінің» Хакасиядағы пӧлии» халых организация «Сын кізілер ‒ Илбек хазна» коррупциядаң тоғыр марығ иртірче. Ол мындағох аттығ социальнай проект чуртасха кирілчеткені хоостыра чарлалған.

Марығның ӧӧн пӧгіннері ‒ ӱгренҷілерге коррупциядаң тоғыр кӱрезерге кирек полчатханынаңар чоохтиры, оларны, ӱлгӱ пирчеткен оңдайларнаң тузаланып, оғыр иткеніне орта хайарға ӱгредері, олғаннарның чайаачыларын тилідері.

Марығда Хакасияның тиксі ӱгредіг учреждениелерінің ӱгренҷілеріне аралазарға чарир. Ол 2023 чылның 1 октябрьынаң 1 ноябрьына теере иртірілер. Салтарлары 9 декабрьға чарлал парар, пуох тусха чиңісчілерні сыйыхтирлар.

Марығ иртірер оңдайлар:

1. Хоос, плакат, видеоролик марығның кирексіністеріне нандырарға паза ахча хысханынаң, кӱҷӱрлестең, чонны чӧндіргенінең, ӱлгӱ парынаң тузаланғанынаң паза пасха даа сайбағлардаң тоғыр искірігліг поларға кирек.

2. Марыға ызылған тоғыстар кізілернің кӧңнін кӧдірерге, сизіндірерге, сайбағлар идерінең хайраллирға, чарыда чоохтирға киректер, пір сӧснең, агитациялығ, пропаганда апарчатхан поларға киректер. Тоғыстарда хынығ полта, килістіре танығларнаң тузаланылғаны, чапсых хоостар полза, уламох чахсы полар.

3. Хоостар, плакаттар тимнирінде хайдағ даа хоос оңдайларынаң тузаланарға чарадылча, олар ӧңніг алай ах-хара даа ползыннар.

4. Чиңісчілернің тоғыстары Хакасияның билбордтарында паза СМИ-ларында сығарылар.

Тоғыстар толдырарына кирексіністер:

1. Хоос А3 форматтаң, плакат А2 форматтаң кічіг полбасха кирек.

2. Видеороликтер узуны 1,5 минутадаң артых нимес поларға, качествозы 360 рх тӧбін полбасха кирек. Формады ‒ MPEG4, FullHD, AVI.

3. Аудиофайллар узуны 1,5 минутадаң артых нимес поларға кирек, формады ‒ MP3.

4. Тоғыс анкета-заявканаң хада ызыларға кирек.

Марыға ызылған тоғыстарны «Россияның хабарҷылар пірігізінің» Хакасиядағы пӧлии» халых организациязының кізілері кірчеткен жюри паалир. Олар тоғыстарның марығ кирексіністеріне паза иртірер оңдайларына килісчеткеніне хайығ айландырарлар. Полған на номинацияда ӱс сыйыхтығ орын полар. Чиңісчілерге, сыйыхтығ орынға турысханнарға дипломнар паза танығлығ сыйыхтар читірілер.

Марыға тоғыстарны паза анкета-заявканы konkursszhr@mail.ru электроннай адресче алай ба Ағбан г., Щетинкин ор., 34 адресче «Хакасия» газетаның редакциязынзар ызарға чарир.