Хакасияның сыйыхтары ӧрініс сыйлаан
28.09.2023
Хабарлар
![Хакасияның сыйыхтары ӧрініс сыйлаан Хакасияның сыйыхтары ӧрініс сыйлаан](/upload/iblock/049/e8pfvy1vjrhf09nae31c6m7ipyo6t223.jpg)
Полызығ. ЛНР-дағы Червонопартизанск городтың культура учреждениелерінзер Хакасия ысхан музыка оборудованиезі читкен
Хайди искірче Луганск Чон Республиказындағы Свердловск городтың паза Свердловскай аймахтың администрациязы, Червонопартизанск городтың культура учреждениелерінзер Ағбаннаң ызылған аарлығ таарлағ читкен.Анда музыка аппаратуралары паза кӧг тиріглері, прай нап-наадаң. Ол полызығ Хакасияның паза Свердловсктың аразында пірге тоғынардаңар иділген чӧптезіг хоостыра читірілген.
Червонопартизансктағы Лениннің адынаң Культура туразына, хайда 6 кружоксар паза 16 чаайаачы пірігіссер 426 ӱгренҷі чӧрче, мероприятиелерні иртіреріне профессиональнай музыка оборудованиезі пирілген.
«Пістің Культура туразында аппаратура уғаа иргі, аны тӧреміл тыхтирға килісчең, че піс пар нимебісті аарлаҷаңмыс. Пӱӱн, тізең, піcтің городха танығлығ кӱн – пістің амды наа аппаратурабыс пар. Аның полызиинаң піс городтағы прай мероприятиелерні улам пӧзік синде иртір турарбыс, – ӧрінізінең ӱлескен учреждение директоры Елена Бородина. – Полызығ паза хабазығ ӱчӱн Хакасияның культура министрі Светлана Окольниковаа, тиксі Хакас Республикаа паза прайзына, кем пу сыйыхха пос хозымын иткен, алғыс сӧстерін читірерге сағынчам».
Червонопартизансктағы олған искусствозы школазының хореография, музыка, театр паза хоос пӧліктерінде ӱгренчеткен 152 пала амды ӱгреністе нап-наа пианинонаң, синтезаторнаң, бас-гитарларнаң паза хоостаҷаң материалларнаң тузаланарлар.
Ӱгретчілер пос часказына паза сағынған сағыстар толчатханына киртін полбинчатханнар. Школада ам даа СССР тузындох алылған кӧг тиріглерінең тоғынчалар нооза. Халғанҷы 30 чылда нааларны аларына ахчалығ оңдай чох полған.
«Сыйых чіли піс кӧг тиріглерін ағыл килгебіс. Ол Хакасия правительствозынаң сығара. Оборудованиені благотворительнай концерттең чыылған ахчаа алып алғабыс. Ол концерт Донбасс чуртағҷыларына чарыдылған», – чоохтап пирген Хакас Республиканың Россияның наа регионнарынаң палғалыс тударынҷа кізізі Сергей Ромашов.
Чарыс айында Червонопартизанск город кӱнін таныхтир. Хакасиядаңң килген сыйыхтар культура учреждениелерінің ӱгренҷілерін не ӧріндірбес, олар прай город чуртағҷыларына ӧрініс сыйлирлар.
Сом ЛНР-дағы Свердловск городтың паза Свердловскай аймахтың администрациязы порталынаң алылған
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде