Банк тоғынҷылары телефонҷа сығдыратпинчалар
29.09.2023
Хабарлар
Брифинг иртірерінде араласханнар (сол саринаң) Александр Кочубин, Владимир Алфёров паза Александр Мерзляков
Брифинг. Хакасияҷа МВД-ның пресс-службазында кӱҷӱрлестердең тоғыр кӱрес апарарына чарыдылған брифинг ирткен
Амды полған на кізінің сотовай телефоны пар. Анзынаң удаа нимес, кӱннің сай, кӱҷӱрлер тузаланчалар. Олар кемге дее кӱнде нинҷе-нинҷе хати сығдыратчалар, ағаа піс кӧнік тее пардыбыс. Таныс нимес номерні кӧр салып, кӱҷӱр сығдыратты тіп, хайығ салбинчабыс. Че кӧбізі, ӧӧнінде улуғлар, кӱҷӱрлернең чоохтазып, киртініп, ахчазын оларға ызыбысча.
Андағ сайбағлар cанын хызырар алай тохтадар даа пӧгіннең Хакасияҷа МВД-ның пресс-службазында брифинг ирткен. Анда араласханнар МВД-ның киберсайбағлардаң тоғыр кӱрезіг апарарынҷа пӧлиинің пастығы Александр Мерзляков, Россия Банкының Хакасиядағы пӧлиинің пастых орынҷызы Владимир Алфёров паза регионның МВД-зындағы Халых чӧбінің кізізі Александр Кочубин.
Оларның искіриинең, Хакасияда кӱҷӱрлестер cаны чылдаң чылға ӧзіп ле одырча. Полициязар кӱҷӱрлерге алаахтыртхан, оларға ахчазын ызыбысхан кізілер кӱннің сай айланчалар. Пӱӱл ле андағ 1509 сайбағ cанға алылған. Республика чуртағҷыларына 238274000 салковайға ӱрег иділген. Иділчеткен сайбағларның cхемалары олох халча: «сірернің адыңарға кредит алылча», «ахчаңар чарадығ чох ызыл парир», «ӧӧн киртініс пічиинҷе сірернің адыңарға кредит аларға кӱстенчелер», «банкта кӱҷӱр cхемазын тохтатчабыс, сірер піске хабас пиріңер», «туғаның саайға кір парды».
Александр Мерзляковтың чооғынаң, мындағ сайбағҷылардаң тоғыр кӱрезерінҷе МВД-да ӧнетін пӧлік тӧстелген. Киберсайбағлардаң тоғыр кӱрезерге оой нимес. Ӧӧнінде профилактика тоғызы апарылча. Іди полициядағылар, квартираларҷа, предприятиелерҷе, ӱгредіг, хазых хайраллаҷаң, садығ учреждениелерінҷе чӧріп, чоохтазығлар апарчалар, сайбағҷылардаңар сизіндірчелер. Андағ мероприятиелернің тузазы пар.
Мындағ чоохтазығлар cоонда улуғ частығлар даа кӱҷӱрлер сығдыратчатханын оңар cыхчалар. Іди, Ӧӧн Банктаң сығдыратчатхан полып, ахчаңарны хорғыс чох счётсар ызыбызарға чӧп пирчелер. Пілерге кирек – банк специалисттері пір дее сурығны телефон пастыра пӧкпинчелер. МВД тоғынҷылары, кирек полза, постары килчелер, удостоверениелерін кӧзітчелер. Олар хаҷан даа «ватсап» алай пасха даа мессенджерлернең тузаланминчалар. Кӱҷӱрлер ӧӧнінде пасха регионнардаң сығдыратчалар.
Владимир Алфёров СМИ тоғынҷыларына чоннаң чарыдығлығ тоғыс апарчатхан ӱчӱн алғызын читірген. Аның чооғынаң, кӱҷӱрлер, аймах оңдайларнаң тузаланып, улам ӧткін хайынарға кӱстенчелер, адрестерін алыстырчалар, мессенджерлерде кӱҷӱрлестерін узаратчалар. Ӧӧнінде олар телефоннаң тузаланчалар. Прай Россияны алза, пу чылның пастағы чардығында ла олар чуртағҷыларға 8 миллиард азыра салковайға ӱрег иткеннер. Амды кӱҷӱрлер, пірігіп, алынҷа банк тоғынҷылары полып, кізілерні ахчазын хорғыс чох счётха ызыбызарға чӧптепчелер. Киртіндірерге полып, хайдағ-да официальнай пічіктернің хобырғаннарын ыс пирчелер. Іди олар банк тоғынҷыларының сын аттарынаң даа тузаланчалар.
Амды банктар паза МВД кӱҷӱрлердең тоғыр хада-пірге тоғынарлар, искіріглер базаларынаң ӱлес турарлар. Сайбағҷыларға ызыбысхан ахчаны айландырып аларға сидік полар, че кӱстенерге кирек. Иң пурнада картаны чабызарға кирек, анаң табырах полициязар айланарға. Пірее коммерческай банктар телефонҷа рекламанаң айланчалар, че олар клиентті позының офизінзер хығырчалар.
Брифинг араласчыларының чӧптерін пӱкӱлее алза, олар мындағ поларлар:
– сірерге Ӧӧн Банктаң алай Россия Банкынаң сығдыратчабыс тіп искірзелер, піліңер – ол кӱҷӱрлер. Россияның Ӧӧн Банкы олаңай кізілернең тоғынминча, чуртағҷыларға сығдыратпинча, киртіндірерге пір дее пічіктер ыспинча;
– реклама идіп, пірее банктар сығдыратчалар, че олар хаҷан даа мессенджерлернең тузаланминчалар;
– сірерге, банктың безопасность службазының тоғынҷызы, істезігҷі, финанс алай право хайраллаҷаң организацияның кізізі полып, сығдыратчатсалар, піліңер – ол ідӧк кӱҷӱрлер;
– тың сырбалчатсалар, хорғытчатсалар, ол кӱҷӱрлерӧк полар.
Аннаңар піліңер: таныс нимес кізілер телефон пастыра сірернің счёттарыңнаңар, ахчаңардаңар пілерге кӱстенчетселер алай банк карталарының саннарын сурчатсалар, телефонны табырах ӱзірібізерге кирек, іди кӱҷӱрлер ле сығдыратчалар.
Сом Альбина Чистогашевани
Автор :
Николай Султреков
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 1 | 2 | 3 |
Кӱн таңмазы
Хакасияда
Россияда
Тилекейде
