Чайаачы иирлерге улам пай полар
29.09.2023
Хабарлар
Тоғазығ тузында
Пресс-конференция. В.Г.Чаптыковтың адынаң Хакас филармониязының тоғынҷылары хабарҷыларға пӱӱлгі чайаачы сезон хайди иртерінеңер искіргеннер
Тоғазығда араласханнар филармонияның устағҷызы, симфоническай оркестрнің дирижёры Вячеслав Инкижеков, хоос устағҷы Артур Марлужоков паза режиссёр-постановщик Юлия Белогурова. Пӱӱл филармонияның 35-ҷі пайрамнығ чайаачы сезоны, аннаңар культура учреждениезінің тоғынҷылары аны турыстығ апарарға пӧгінчелер.
– Июль айда «Хан сын» ансамбльның артисттері Евгений Улугбашев паза Нина Идимешева Москвада ирткен «Вкусы России» улуғ фестивальда араласханнар, – пресс-конференцияны азып, чоох тутхан В.Г.Инкижеков. – Таныхтирға сағынчам, микрофоннар кинетін тоғынминыбысханда, артисттерібіс сарнирын тохтатпааннар. Андағ оңдайнаң пістің чир-суғҷыларыбыс хазнаның ӧӧн городында постарының пӧзік устарын кӧзіт пиргеннер. Москвадағылар анзына тың хайхааннар.
«Культурная миссия в Италии» проект хоостыра Италияда «Россия – Неаполь. Вулкан искусств» Россия искусствозының фестивальы ирткен. Пу кӱннерде «Кӱн сузы» хакас теелбек ансамбльы андартын айлан килген. Амғы оой нимес туста чайаачы палғалыстар ӱзілбинчелер.
Филармония директорының таниинаң, пайрамнығ чайаачы сезонға тимненіс матлама парча. Хакас чирінзер пастағызын на А.В.Свешниковтың адынаң Орыс академическай хор килче. Ол хазнада иң пурнада тӧcтелген улуғ ӧмее саналча. Мындағ аарлығ сыйыхты пістің республикаа Москвадағы филармония итче. Чайаачы иир 1 октябрьда 16.00 часта Хакас филармониязында иртер. Ікінҷі алғым мероприятие 4 – 10 октябрьда полар. Ол – «Хоровое дирижирование» марығ.
– Піске пу марығ уғаа танығлығ. 4 октябрьда Россияның чон артизі, виолончелист Александр Князев килче. Ол Хакасиядаңар кӧп искен. Пісте ааллаан кӧгҷілер республикадаңар чылығ ӱндесчелер, аннаңар пасха артисттер пеер хынып килчелер, – теен Вячеслав Инкижеков.
Чайаачы сезонда хайдағ концерттер, иирлер иртерін ідӧк чарыда чоохтап пирген Артур Марлужоков. Пылтырғызынаң тиңнестірзе, пӱӱлгі репертуар улам алғым. Мария Янгулованың, Зинаида Аршанованың, Нина Идимешеваның, Евгений Улугбашевтің чайаачы иирлері иртер. «Ӱлгер» ансамбль «Тулаға» программанаң сығар.
Филармония кӧрігҷілерін сарыхтар аймаанаң чапсыдар. Кӧзідімге, «Ночь перед рождеством» моноспектакль полары кӧрілче. Саблығ артист Даниил Спиваковский пістің симфоническай оркестрнең хада ойнир. «Каданс» хор Сергей Рахманиновтың программазын тимнепче. Килчеткен чылда 8 июньда республиканың чуртағҷылары нааҷылалған «Симфония в джинсах» программаны «Саяны» стадионда кӧрерлер.
Хакасиязар гастрольларнаң ырҷылар Владислав Косарев, Георгий Васильев, гобоист Алексей Балашов килерге пӧгінчелер.
Кибірге тудынып, филармонияның артисттері кӧрігҷілерін ӱлӱкӱннернең алғыстирлар. Олғаннарға паза улуғларға Наа чыл интермедиязы тимнелче. Чуртағҷыларның сурынызынаң «Карнавальная ночь» (6+) ойынны хаттирлар. 8 Мартта Хакасияның абахайларына филармонияның иреннері сарыннар ырлирлар. Январь айда филармонияның паза М.Ю.Лермонтовтың адынаң Орыс драма театрының артисттері, Владимир Высоцкийнің сарыннарын толдырып, концерт кӧзідерлер. Олғаннарға «Щелкунчик» театр программазы тимнелче. Ол ойынны оркестр чазир.
2024 чылда 9 февральда пайрамнығ концерт иртер. Чайаачы сезон 15 июньда гала-концертнең чабылар. Анда филармонияның прай ырҷызы аралазар. Республиканың чуртағҷылары иң артых чайаачы иирлерні кӧні кӧзідіг пастыра кӧріп ал турарлар. Ол «ВКонтакте» социальнай сетьтегі филармонияның группазында иртірілер.
Сом Альбина Чистогашевани
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
