Хакасияда ат манежін пӱдірерлер
04.10.2023
Хабарлар
![Хакасияда ат манежін пӱдірерлер Хакасияда ат манежін пӱдірерлер](/upload/iblock/470/iztp9nyifdpv10w7tephoq075yts154k.jpg)
Хакасия пазы Валентин Коновалов спорт школазының ат хазаазында
Спорт. Пу кӱннерде Хакасия пазы Валентин Коновалов ат спорт школазында пол килген
Республика ӱлгӱлері спорт сферазын улуғ хайығда тутчалар. Правительство тренерлерге паза спортсменнерге хабас пирерге, спорт инфраструктуразын чахсыландырарға кӱстенче. Олох пӧгіннең Хакасия пазы Валентин Коновалов учреждениелернің тоғызынаң танысча. Чорыхтар тузында кӧп ағырсымнығ сурығ сығысча нооза. Ирткен пятницада улуғ пастых ат спорт школазында пол килген. Мероприятиеде ідӧк Хакасияның спорт министрінің тоғызын толдырчатхан Сергей Кочан араласхан.
Таныхтирға кирек, чалаң чӧрер школа (ДЮСШ) Хакасияда иң пурун тӧстелген cпорт организацияларының пірcі полча. Ол 1968 чылда тоғынып пастаан. Аның ӧӧн пӧгіні – олғаннарны хазых чуртасха, спортха кӧніктірері. Амғы туста ДЮСШ-та 160 артиинаң пала. Ӱгредіг тикке апарылча. Спортсменнер тӧреміл чахсы салтарлар кӧзітчелер. Че школа директоры Татьяна Чупина Хакасия пазы Валентин Коноваловха иң пастап школаның чидіглерінеңер нимес, сидіксіністерінеңер искірген. Татьяна Николаевнаның таниинаң, ат спорт школазына хайди даа чабых манеж кирек. Пу сурығ 1970 чыллардаң пӧгілбинчеттір. Ол сылтағнаң спортсменнерге хысхызын тренировкалар иртірілбинче. Школа ӧмезі, спонсорлар таап, 2013 чылда манежті пос кӱзінең пӱдірерге харастыр. Че ахча читпееннеңер, 2016 чылда тоғыстар тохтадылғаннар. Манежтің тимір ханазы кізі хайиин ырахтын тартча.
Спорт министерствозы объектті пӱдірібізер оңдай тілепчеттір. Хайди таныхтаан Сергей Кочан, азынада сананыстарҷа, манежті пӱдірібізеріне 100 миллион салковай кирек. Спонсорлар полызарға тимделер. Кирек киліссе, пӱдіріг 2025 чылда тимге сығар.
Читіре пӱдірілбеен манежте пол килген соонаң улуғ пастыхтарға аттарны кӧзіткеннер. Школада, тӧлліг асхырлардаң паза пиилердең пасха, понилер пар полтыр. Наа кізілерні кӧр салып, адыҷахтар чоо ӧрінгеннер. Морковьнаң азырапчатхан, прай чӱреенең паарсапчатхан аалҷыларға хайди хынмас.
Ол кӱн республика ипподромында ӱс оңдайлығ марығҷа тиксі Россия турнирі ирткен. Ол кибірліг марығ. Анда чыл сай Сибирьнің спортсменнері кӱстерін сынапчалар. Пӱӱл арға-мӧрійде 70 чалаң араласхан. Олар Ағбанзар 8 регионнаң килгеннер. Ат спортында ӱс оңдайлығ марығ олимп дисциплиналары санына кірче. Спортсменнер сіліг чӧріcте, конкурда паза кросста устарын кӧзітчелер. Иң сидік кросс полтыр. Аның тузында чалаңнарға оймахтар, суғлығ кооптар азыра атығарға килісче. Таныхтирға кирек, кросста дистанцияның узуны 4 километрдең асхынах полбасха кирек. Валентин Коноваловты марығ оңдайларынаң ӧӧн чарғыҷы Юрий Голиков (Хызылчар) хысхаҷахти таныстырған.
Мероприятиенің халғанҷызында Валентин Олегович, 16 частығ Алина Полякованы чидиинең алғыстап, саарбахха улуғ нимес сыйых читірген. Спортсмен пӱӱл августта Реванш асхырнаң хада Россия первенствозында кӱмӱс медаль холға кирген. Алина спорт узына кандидат полча, аның тренері – Николай Чупин. Амғы туста саарбах Ағбандағы олимп резерві училищезінде (техникумында) ӱгренче. Хызыҷахтың ӧӧн пӧгіні – cпорт узына нормативті толдырыбызары.
Ат спортынҷа тиксі Россия марии 30 сентябрьға теере парған. Пістің спортсменнер ӱс алтын, ікі кӱмӱс паза пір хола медаль утханнар.
Сом Альбина Чистогашевани
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде