Оларның махачызы прайзына кӧзідім полар
06.10.2023
Хабарлар
Хакасия пазы Валентин Коновалов паза тимір чол бригадазының командирі Андрей Баринов хумартхы тассар чахайахтар салчалар
Хумартхылас. Киҷее Ағбанда орныхчатхан 5-ҷі тимір чол бригадазының площадьында CВО-да чуртастарын пир салған тимірчолҷы-чааҷыларға чарыдылған мемориал азылған
Тимір чол бригадазының площадьында иснең чабылған хумартхы тас ибіре чааҷылар стройда турғаннар, аалҷылар даа кӧп полғаннар. Андар ӧнетін чаа операциязында чуртастарын пир салған чааҷыларның туған-чағыннары килгеннер. Андағы прай кізілер, ол санда чааҷылар даа, чахайахтар тутханнар.
Россияның паза Хакасияның гимннері толдырылған соонда бригаданың командирі, полковник Андрей Бариновха сӧс пирілген.
– Пу пістің бригаданың чааҷыларына, Ағбан городтың прай даа гарнизонына уғаа танығлығ кӱн полча. Піс ӧнетін чаа операциязында чуртастарын пир салған махачы чааҷыларға чарыдылған хумартхы тас асчабыс. Андағ оңдайнаң піс оларны, чеестеп, сабландырчабыс. Олар амғы пістің чуртазыбыс, Чир-суубыстың пос алынҷа чуртазы ӱчӱн чуртастарын пир салғаннар. Оларның алнында пазыбыс тӧбін тӱзірчебіс. Сабланыс матырларға хаҷанға даа! Бригаданың кӧп чааҷызы ам даа СВО зоназында чаа пӧгіннерін толдырча, – теен бригада командирі.
Аның соонда Хакасия пазы Валентин Коновалов чоох тутхан:
– Украинада фашизм пазын кӧдіріп, Донбасстағы пістің чонны иреелеп сыхханда, пістің хазнаа ӧнетін чаа операциязын пастирға киліскен. Амды СВО-да пістің чааҷыларыбыс амыр чуртас ӱчӱн, хазнабыстың пос алынҷа чуртазы ӱчӱн махачы чааласчалар. Анда чуртастарын пир салған матырларға піс пӱӱн пу мемориалны асчабыс. Ізенчем, оларның махачызы чиит чааҷыларға, прайзына даа кӧзідім полар. Матырларыбысты піс хаҷан даа ундутпаспыс. Чуртастарын пир салған чааҷыларның паба-іҷелеріне мындағ турыстыра ооллар ӧскір салғаннары ӱчӱн алғызым читірчем.
Хумартхылас митингінде ідӧк чоох тутханнар Ағбан город пазының орынҷызы, милицияның отставкадағы полковнигі Владимир Крафт, хумартхы тасты турғызарға хабасхан «Сбербанк» ПАО-ның Ағбандағы пӧлиинің устағҷызы Cергей Анисимов, СВО-да чуртазын пир салған Богдан Фотиннің іҷезі Наталья Олейникова. Хумартхы тасты Хакасия пазы Валентин Коновалов паза тимір чол бригадазының командирі Андрей Баринов асханнар.
Чааҷы офицер хумартхы тас алнындағы чылтыста Успас отты тамысхан. Ол туста чааҷылар, автоматтардаң тигірзер атып, чуртастарын пир салған матырларны хумартхылап, салют позытханнар. Анаң пір минута сым турары чарлалған.
Ӱс чааҷы сабаллығ гирлянданы, строевой хаалағнаң кӧӧлҷе апарып, хумартхы тас тӧзінзер салғаннар. Устағҷылар, чыылысхан чон мемориалзар чахайахтар cалғаннар.
Валентин Коновалов, Андрей Баринов паза даа пасха устағҷылар чааҷы частьта чуртастарын пир салған чааҷыларның паба-іҷелерінең, туған-чағыннарынаң чоох алысханнар.
Сом Альбина Чистогашевани
Автор :
Николай Султреков
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
