Олар – хакас тілінің таңдағызы
06.10.2023
Хабарлар
Хыспира Сагатаева Екатерина Котюбееванаң, Татьяна Миндибекованаң паза Елизавета Чебодаеванаң хада
Сыйыхтас. Хакасияның ӱгредіг паза наука министерствозының чыылығлар иртірҷең залында «Минің тӧреен тілім» республика марииның чиңісчілерін паза оларның ӱгретчілерін чеестееннер
Пу марығ 2021 чылдаң сығара тӧртінҷі класс ӱгренҷілері аразында часхызын иртірілче. Аның тӧстегҷілері – республиканың ӱгредіг паза наука министерствозы, Н.Ф.Катановтың адынаң Хакас национальнай гимназия-интернады. Пӱӱл марығда прай республикадаң, ол санда кічіг паза ыраххы ааллардаң, 97 олған араласхан. Оларның аразынаң 9 пала сыйыхтығ орыннарға турысхан паза чиңісчі полыбысхан.
Марығда ӱс номинация полған. Олғаннар, «Постаңар чоох», «Минің кӧстегҷім» паза «Минің родымның кибірлері» темаларҷа видео суурып, марығ чарғыҷыларына ысханнар. Таныхтирға кирек, постаңар чоохтир номинацияда иң кӧп араласчы полған паза пӱӱл, Ӱгретчі паза ӱгредіг кӧстегҷізі чылында, «Минің кӧстегҷім» номинация пастағызын на кирілген.
Сыйыхтас, Россия синінде чарлалған Ӱгретчілернің улуғ неделязына чарыдылып, иртірілген. Анда Хакасияның школаларында хакас тілін ӱгренерінҷе программаны тӱзімніг апарчатхан, ідӧк тӧреен тілні хайраллирына улуғ хозым итчеткен ӱгретчілерні паза ӱгредіг кӧстегҷілерін таныхтааннар. Оларға ӱгренҷілерінең хада Хакасияның ӱгредіг паза наука министерствозының алғыстас пічіктерін, араласчылар сертификаттарын, дипломнарны паза сыйыхтарны ӱгредіг паза наука министрінің тоғызын толдырчатхан Анатолий Бутенко, аның орынҷызы Юрий Сагалаков, ӱгредіг паза наука министерствозындағы халыхтар чӧбінің кнезі, Хакасияның Улуғлар чӧбінің нандырығлығ хачызы, Россия чоннары ассамблеязының республикадағы пӧлиинің кнезі Любовь Аёшина, ӱгредіг паза наука министерствозының наука паза национальнай ӱгредіг пӧлиинің устағҷызы Ольга Доможакова читіргеннер. Ідӧк ӱгретчілер В.М.Торосовтың адынаң Хакас книга издательствозының директоры Андрей Иптышевтің холынаң алынҷа сыйыхтар алғаннар. Чайаачы сыйых полғанох – Хакас гимназиязының 9 класс ӱгренҷізі Артемий Котожеков хакас сарыннарын толдырған.
Анатолий Бутенко, олғаннарны паза ӱгренҷілерін алғыстапчатханда, ікі тіл пілчеткен кізі пай полча тіп таныхтаан. Ол сыйыхтасха чыылысханнарны хакас тілін ӱгренчеткеннері, хайраллапчатханнары ӱчӱн алғыстаан. Ідӧк ӱгренҷілернің іҷе-пабаларына чылығ сӧстер читірген. Тӧреен тілні пала иң пурун сӧбіреде истіп пастапча нооза. Паза амғы туста Хакасия правительствозы саринаң тілні хайраллирына паза тилідеріне кӧп хайығ айландырылча тіп чоохтаан – чылдаң чылға хакас тілі апарылчатхан олған садтары паза школалар саны ӧзіп одырча, хакас тілінең учебниктер, пособиелер паза пасха даа литература сығарылча. Аннаңар палаларға тӧреен тілні ӱгренеріне постарының кӱcтерін не саларға халча.
«Постаңар чоох» номинацияда пастағы орынға Алина Боргоякова турысхан. Ол Асхыс аймааның Оңхак аалында ӱгренче. Аның ӱгретчізі – Наталья Николаевна Чертыкова. Ол ӱгредіг киреенде 42 чыл істен парир.
Наталья Чертыкова ӱгренҷізі Алина Боргоякованаң хада
Наталья Николаевна Алина хакас тілін уғаа чахсы пілче тіп таныхтапча. Аның іҷе-пабазы Илимор аалдаң кӧстірлер. «Оңхакта хакас тілі чітче, іҷе-пабалар ағаа тың хайығ салбинчалар. Алина піске кӧзідім полыбысхан. Сӧбіреде улуғлары хакас кибірлеріне тудынчалар, палаларын оларға ӱгретчелер. Анзы мині хайхатхан паза ӧріндірген», – чоохтапча Наталья Чертыкова. Позынаңар чоохты Алина іҷезі полызиинаң тимнептір. Хакас чонның кип-азаан школа музейінең алтырлар. Пала-пархазының кӧгенеен школаа ветеран Валентина Васильевна Иптышева сыйлап пиртір. Ол кӧгенек иргі оңдайнаң тігілген осхас. Амды хызыҷахтарға, пірее мероприятие иртчетсе, аны кизіртібісчеттірлер.
Ирткен чылда Наталья Николаевнаның ікі ӱгренҷізі пу марығда араластырох, сыйыхтығ орыннарға турыстырлар. Алина пӱӱл утып алғанына ӧрінче. Паза хайди за? Школада аның иң хынған предмеді – хакас тілі. Ідӧк хоостар хоостиры аның кӧңніне тың кірче. Ол ибдегі киректерні хынып итче паза іҷезіне туңмаларын кӧрерге полысча.
«Минің кӧстегҷім» номинацияда пастағы орынны Екатерина Котюбеева холға кирген. Ол Пии аймааның Хызыл хара суғ аалынаң. «Минің чонымның кибірлері» номинацияда Татьяна Миндибекова утып алған. Ол ідӧк Хызыл хара суғдаң. Хызыҷахтарны марыға Хыспира Борисовна Сагатаева тимнеен. Ол ӱгретчі полып 45 чыл істен салған. Пасталығ класстар ӱгретчізі «Минің тӧреен тілім» марыға прай клазын тимнеен. Пис паладаң ікізі чиңісчі пол парған, пірсі – Елизавета Чебодаева – «Постаңар чоох» номинацияда призерлар санына кірген.
Хызыҷахтар ідӧк хакас тілі предмедіне хынчалар. Паза ӧӧрелер чібекнең хоостир кружокка чӧрчелер.
Олғаннар алнында чоох тутчадып, Юрий Сагалаков амғы туста телевидениеде, книга издательствозында паза пасха даа орыннарда хакас тілін чахсы пілчеткен специалисттер уғаа кирек тіп таныхтаан. Аннаңар даа тіл ӱгренеріне прай оңдайлар пирілчеткенде, оларнаң тузаланарға кирек.
Сомнар Альбина Чистогашевани
Автор :
Татьяна Кыштымова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде