Москвада – Ӱртӱн тойы
06.10.2023
Хабарлар
Карина Шулбаеванаң Георгий Таскараков
Ӧткіннерібіс. Москвада чуртапчатхан хакас чир-суғҷылар пірігізі «Москва-24» телеканалның проектінде араласхан
Ол проект «Мое имя – Москва» адалча. Анда Россиядағы пірее чонның кізізі позынаңар, ағаа хазнаның ӧӧн городында чуртас хайди пілдірчеткеннеңер кӧрізінең ӱлесче. Пу кӱнге телеканал чуваштарны, азербайджаннарны, черкестерні, белорустарны, кумыктарны, алтайларны, буряттарны паза пасха даа чоннарны суур салған.
Пістің чир-суғҷыларыбыс пу проектте аралазарынаң Георгий (Харатай) Таскараков айғасхан. Тӧреен чирінде аны чахсы пілчелер, ол А.М.Топановтың адынаң Хакас национальнай драма театрында тоғынған. Кічіг чир-суу – Пыдырах аал.
Ӧткін чиит ӱлесче:
– Телевидениедең минзер наа ла айланғаннарында, сурығ пол килген – хайда передачаны суурарбыс. Москвада пістің пос рестораны чоғыл. Анаң минің пазыма хандыра сағыс кір килген, мин теем: «Пу чағында хакас чон Ӱртӱн тойы ӱлӱкӱнні таныхтир, чир-чайаанзар сығып алып, анда піcтің кибір-чозахтарыбысты суурып аларға чарир». Пастағызын ӧӧн матыр мин поларға кирек полғам, че нинҷе-де тус пазынаң хыс кирек тееннер. Ӧӧн сурығларны прай мағаа пӧгерге киліскен: афиша иттіргем, хакас национальнай кӧг тиріглерінің кӧзідиин тимнеем. Хырғыстарнаң чоохтазып, хой сохтырыбысхам, хан пызырыбысхам, кибір хоостыра хой пазын иң аарлығ аалҷаа читіргебіс. Камералар алнында пістің чииcтерібісті тимнеебіс – чарбалығ ӱгре, тоғырамҷы, сохачы, орамҷых. От азыраҷаң кибірні, хакас ойыннар кӧзіткебіс. Ікінҷі кӱнінде піс Айана Чебодаеванаң музыка школазында хакас тахпах-сарыннарны, теелбектерні толдырғабыс паза сас тойы хайди иртчеткенін кӧзіткебіс.
Поғолар паза хакас кип-азаан пирген ӱчӱн Хакасиядағы чир-суғҷыларыбысты алғыстабызарға сағынчам – Евгения Костякованы, Вячеслав Кученовты, Надежда Табурчинованы, Елизавета Баскучекованы. Таныстар пастыра самолетнаң ыс пиргеннер. Олар хабас пирбеен ползалар, піс уйан кип-азахтығ суурынарҷыхпыс.
Сом Георгий Таскараковтың архивінең
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде