Артисттерібіс тилекей культуразынаң танысчалар
06.10.2023
Хабарлар
Хакасияның культура министрі Светлана Окольникова «Кӱн сузы» ансамбль араласчыларынаң хада
Пресс-конференция. «Кӱн сузы» ансамбль «Россия – Неаполь. Вулкан искусств» Россия искусствозының фестивальында араласхан хоостыра Хакасияның культура министерствозында тоғазығ полған
Пу фестиваль «Культурная миссия в Италии» чуртаста пик сиип парған проектче иртірілген. Пресс-конференцияда Хакасияның культура министрі Светлана Окольникова, ансамбльның балетмейстері Наталья Апуневич паза артисттер араласханнар.
– Пістің чииттер Хакасияны ла нимес, ідӧк тиксі Россияны мындағ аарластығ культура мероприятиелерінде сабға сығарчатханнары уғаа ӧріністіг паза поғдархастығ. Италияда кӧп чыл хада тоғынған нанҷыларыбыс илееде. Піс оларнаң хада Россиядағы паза чоннар аразындағы фестивальларда удаа тоғасчаңмыс. Италиядағылар Хакасияның артисттеріне хаҷан даа ӧрінчелер, оларны чидікпин сахтапчалар. «Кӱн сузы» ансамбльның араласчыларын хырығ озаринзар позыдарға хорыхпаам. Олар прай чирде постарын турыстығ тудынчалар, полған на ачыхта чахсы теелбектенчелер, тоғысха тӱгеде пирінчелер, майығысты даа пілбинчелер, – чоох тутхан культура министрі Светлана Анатольевна.
Анаң артисттер Италиязар чорых хоостыра сағыстарынаң ӱлескеннер.
– Пісті аалҷылар туразының ээзі чылығ удурлаан, – чоохтаан ансамбльнаң хада прай даа ыраххы чорыхтарҷа чӧрчеткен артист Айлаң Хапхына. – Ол тура музей осхас уғаа сіліг. Аалҷылар туразының ээзі – олаңай кізі нимес, университет профессоры. Ол піске городтың орамаларынҷа экскурсия иртірген. Чуртағҷылар кӧзенек ӧтіре піске хол сапханнар, изеннескеннер, піс хайдаң килгенібісті сурғаннар. Піреезі чуртынзар даа кирген. Піс кип-азах тікчең, теер истеҷең устарда ааллаабыс. Ідӧк хоосчыда полғабыс. Аның хоостары ікі хадыллығ тураа толдыра. Ідӧк Неаполь кӧңніме кірген. Турабыстаң сығара Везувий вулкан паза талай кӧрінген. Неаполитанскай заливте саны чох кимелер, яхталар, корабльлар, лайнерлер чӱс чӧрчелер.
– Уғаа чахсы! – хозылған культура министрі Светлана Окольникова. – Таныхтирға сағынчам, «Ӱлгер» ансамбльның устағҷызы Кучен Ай Чарых Сайын ӧмезінзер ыраххы ааллардағы хакас тілін матлама пілчеткен оол-хыстарны аладыр. Аннаңар чиит артисттер самолётха даа одырбаан полғаннар. Амды олар тиксі Россияҷа, хырығ озаринзар учух чӧрчелер. Аннаңар мағаа, министрге чіли, национальнай артисттерібіс тилекейдегі культуранаң танысчатханы ӧӧні пілдірче.
Пресс-конференцияда ідӧк позының кӧңнін Сибен Арығ Читі Пӱӱр искірген.
Ол «Кӱн сузынаң» хада хырығ озаринзар нандырығлығ чорыхха пастағызын на чӧрген.
– Мағаа пасха сценада тоғынарға пасхаҷыл пілдірген. Ибдегі сценаа ӱгрен парғам. Неапольда чайаачы узымны толдыразынаң кӧзідерге кӱстенгем. Андағы кӧрігҷілер пісті уғаа чахсы удурлааннар. Концерт соонаң, піссер пастырып, махтааннар. Ідӧк олар піске Италияның пасха даа городтарында культурабысты кӧзіт пирерге чӧп пиргеннер. Ансамбльнаң хада хырығ озаринзар учух пар килгеніне уғаа ӧрінчем, – теен Сибен Арығ.
– Йа, мин дее Италиядағы сценаны таныхтирҷыхпын, – хозылған «Кӱн сузының» артизі Радж Мандаржап. – Пістің хакас сценада мониторлар, пӧзік технологиялығ оборудование пар. Анда ол саринаң сала уйан. Ағаа хоза, фестиваль тузында тасхархы киинің ізии 25 градусха читкен. Хости талай орныхча, сыхтығ кииде тынҷаа даа чоғыл. Сцена сала иніс чирде турча, аннаңар, теелбектенчеткенде, пісті талай саринзар ла тартчатхан. Италиядағылар пісті позыдарға хынмааннар. Оларнаң хада сомға кӧп суурынғабыс.
Тилекейдегі оой нимес туста пістің артисттер хырығ озаринзар піди тӱзімніг пар килгені, хазналар аразында культура «тахтазы» пик турчатханы тың ӧріндірче.
Сом Аскар Артамоновти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
