Піліс пирчелер, пос чирін аарлирға ӱгретчелер
06.10.2023
Хабарлар
Ағбандағы школа-интернаттың пасталығ класстар ӱгретчізі Алевтина Григорьевна Чебокчинова паза Таштыптағы 16№ училищенің мастері Александр Михайлович Тохтобин
Пайрам. Киҷее М.Ю.Лермонтовтың адынаң Орыс драма театрында Ӱгретчі кӱніне чарыдылған улуғ пайрам ирткен. Анда ӱгредіг киреенде ӱр істен салған, пӧзік чидіглерге читкен ӱгретчілерге, профессиональнай ӱгредіг учреждениелерінің преподавательлеріне cыйыхтар читірілгеннер
Алевтина Григорьевна Чебокчинова Ағбандағы уйан исчеткен олғаннарның школа-интернадында 20 чыл пасталығ класстар ӱгретчізі полып істенче. Тиксі ӱгредіг киреене, тізең, ол 30 чыл азыра пир салған.
– Істеніс чолымны 1989 чылда пастаам. Асхыстағы ортымах школада 10 чыл азыра тоғын салғам, олған садында істенерге киліcкенӧк. Халғанҷы 20 чыл школа-интернатта істенчем. Андар килгенімні ам даа оңнапчам. Ол 2003 чылда 28 августта полған. Воспитатель полып тоғынып пастаам. Мағаа иирдегі смена киліс парған. Хараазына интернатта тӧрт ле пала хонарға халған. Ӱзі пір дее чоохтан полбинчатхан, тӧртінҷізі – сала-сула ла. Піс иирде тасхар арығ киинең тынарға пар килгебіс, анаң оларны азырирға кирек полған. Хайди аннаңар палаларға чоохтап пирерінең сидіксінгем. Анаң холнаң кӧзіт пиргем. Палалар мин оларны азыранарға хығырчатханымны піліп алғаннар. Ол кӱн хараа тооза узубаам. Палаҷахтарны тыңнап одырғам. Амды олар сӧбіреліглер, тоғынчалар. Миннең палғалыс тутчалар, ундутпинчалар, Ӱгретчі кӱнінең алғыстапчалар, – ӧрінізін чазырбинча Алевтина Григорьевна.
Александр Михайлович Тохтобин Таштыптағы 16№ училищеде 33 чыл мастер полып істен парир. Пу тусха ол 10 азыра группа сығар салған, неке. Ол ортымахти 300 азыра студент! Мастер оолахтарны тракторлығ чӧрерге ӱгретче. Хайди чоохтапча Александр Михайлович, тракторлығ чӧрерге ӱгренерге сағынчатханнарның саны чылдаң чылға ӧзіп ле одырча.
– Пӱӱл группазар 25 студент алып алғабыс. Сурыныc пічіктері, тізең, аннаңох кӧп полған. Ӧӧнінде Таштыптағы, Ибігдегі, Мадырдағы олғаннар пу специальностьха ӱгренерге хынадырлар. Ӱгренген соонаң чииттернің кӧбізі армияа парыбысча алай ба аал хониинаң айғазып пастапча. Хайзылары чуртастарын контракт службазынаң палғалыстырчалар, ӧнетін чаа операциязында араласчатханнар парох, – чоохтапча ол.
Александр Михайлович ідӧк училищезер тоғынарға килген чиит специалисттерге кӧстегҷі полча. Оларға тоғысха кӧнігерге полысча. Че, хайди ол чоохтапча, чиит специалисттер СПО-да ӱрге тудылбинчалар. Пір чыл пазынаң cаназыбызып, пасха тоғыс таап алчалар. Ідӧк Александр Тохтобин, училищее наа техника алылған полза, чахсы поларҷых тіпче.
– Училищее халғанҷызын 2003 чылда наа трактор пирілген. Аны Хакасия пазы полған Алексей Иванович Лебедь республиканың правительство туразының алнында піске читірген. Пасха тракторлар, тізең, совет тузынаңох халғаннар. Амғы чииттер оларнаң тоғынарға тың на хынминчалар. Аннаңар піcке наа техника пирілген полза, уғаа чахсы поларҷых. Піс училищеде 20 азыра пас інек ӧскірчебіс. Оларны азырирға от тимнирге кирек нооза. Пӱӱл 300 азыра тӱрім от тимнеп алғабыс, – чооғын узаратча Александр Михайлович.
Ӱгредіг киреенде ӱр тоғын салған, профессионализмі, ӱгредігнің тилізіне улуғ хозым иткен ӱчӱн, пасталығ класстар ӱгретчізі Алевтина Григорьевна Чебокчинова «Хакасияның саблығ ӱгретчізі» атха турысхан, Александр Михайлович Тохтобин, тізең, Хакасия пазының алғыстас пічиин алған!
Танығлығ кӱнде Хакасия пазы Валентин Коновалов ідӧк республика ӱгретчілеріне «Хакасияның істеніс сабланызы» медальлар, «Хакасияның саблығ ӱгретчізі» аттар, Хакас Республиканың Аарластығ пічіктерін, регион пазының алғыстастарын читірген. Прай 60-ға чағын ӱгретчее.
– Аарлығ ӱгретчілер! Прай чӱреемнең сірерні Ӱгретчі кӱнінең алғыстапчам. Сірер Хакасияның паза тиксі Россияның таңдағызын пӱдірерге піске кӱннің сай полысчазар. Сірернің тоғызыңарның салтары сах мындох кӧрінминчетсе дее, регионның социальнай чуртазын, экономиказын тилідерінің тӧстегҷізі полчазар. Ӱгретчі полары – ол уғаа нандырығлығ профессия. Сірер олғаннарға піліс пирерінең пасха, ідӧк оларны Ада чир-сууна хынарға, культураны улуғлирға кӧніктірчезер. Аннаңар сірерге улуғ алғызым читірчем, – таныхтаан Хакасия пазы Валентин Коновалов.
Хакасияның правительствозы ӱгретчілерге хабазарына улуғ хайығ айландырча. Іди пу чылдаң пасти аалларзар тоғынарға парған ӱгретчілерге чурт сертификаттары пирілче. Пу пӧгінге республика бюджедінде 50 миллион салковай салыл парған. Хайди таныхтаан чооғында Хакасия пазы Валентин Коновалов, пу программа аннаң андар алғыдылар. Ідӧк килчеткен чылдаң пасти Хакасияның правительствозы ӱгретчее ипотека аларға пастағы тӧлегнең пирерге полыс турарға пӧгінче.
Хайди искірче Хакасияның ӱгредіг паза наука министерствозы, 2023-2024 ӱгредіг чылында республиканың ӱгредіг киреенде 5 муң 749 ӱгретчі істенче.
Сом Альбина Чистогашевани
Автор :
Оксана Сунчугашева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде