600 азыра кізі хығыртылар
11.10.2023
Хабарлар
![600 азыра кізі хығыртылар 600 азыра кізі хығыртылар](/upload/iblock/b0b/6s1zb04d8orkxqmxxx6a3elinkzqw6ts.jpg)
Хакасия пазының орынҷызы – хығыртығ комиссиязының кнезі Юрий Курлаев паза республиканың чааҷы комиссары Николай Видяйкин брифинг иртіргеннер
Брифинг. Хакасияның чааҷы комиссариадында пӱӱл октябрь-декабрьда срочнай чааҷы службазына хығыртығ пасталчатханына чарыдылған брифинг ирткен
Аны иртіргеннер Хакасия пазының орынҷызы – республиканың хығыртығ комиссиязының кнезі Юрий Курлаев паза Хакасияның чааҷы комиссары, подполковник Николай Видяйкин.
Юрий Николаевичтің искіриинең, пӱӱл апрель-июльда чааҷы службазына хығыртар пӧгін прай толдырыл парған, хығыртылған ооллар ам чааҷы частьтарында служба иртчелер. Хазии хоостыра пір дее призывник нандыра айландырылбаан.
Россия президентінің пӱӱл 29 сентябрьда алылған «2023 чылның октябрь-декабрьында Россия Федерациязының кізілерін чааҷы службазына хығыртардаңар паза хығыртығ хоостыра чааҷы службазын иртчеткен кізілерні чааҷы службазынаң позыдардаңар» 735 № Указы хоостыра паза Хакасия пазының – Хакасия Правительствозы кнезінің «2023 чылның октябрь-декабрьында 1996 – 2005 чылларда тӧрееннерні чааҷы службазына хығыртардаңар» 42-ПП № Чарадии хоостыра, 1 октябрьдаң Хакасияда Россияның Тирігліг кӱстерінзер 18 – 27 частығ Россия кізілерін чааҷы службазына теестегі хығыртар тоғыс пасталыбысхан.
Пӱӱл республикадаң чааҷы службазына 600 азыра кізі парар.
Россияның Тирігліг кӱстерінзер республиканың призывниктері піди ызыларлар: сухопутнай войсколарзар – 34 %, чаа-хан тигір кӱстерінзер – 27%, стратегия кӧстегліг ракеталығ войсколарзар – 17 %, национальнай гвардия федеральнай службазынзар – 19 %, кии-десант войсколарынзар – 7%, пасха войсколарзар паза органнарзар – 7 %.
Призывниктер чааҷы службазын Россияда иртерлер, наа субъекттер чирлерінзер паза СВО апарылчатхан зоназар хығыртығҷа чааҷылар ызылбастар.
Призывниктерге паза оларның паба-іҷелеріне Россияның арачыланыс министерствозының искіріглер сайтында хығыртығдаңар толдыразынаң искіріг пар: «Призывниктерге» чардыхта («Призывникке памятка» подраздел) «Призывниктең чааҷаа теере» тузалығ искіріг. Ідӧк искіріг аларға Хакасияның чааҷы комиссариадының «ізіг линия» телефонына (8-3902-334-13-08) алай чааҷы санында турчатхан муниципальнай пӱдістернің чааҷы комиссариаттарының «ізіг линияларынзар» сығдырадып.
Чааҷы комиссары Николай Видяйкиннің чооғынаң, Хакасияның муниципальнай пӱдістерінде 13 хығыртығ комиссиязы тӧстелген, ідӧк республиканың хығыртығ комиссиязы тоғынча. Хығыртығ комиссияларының чыылии алнында призывниктернең психологияҷа таллағ иртірері кӧріл парған.
Призывниктернің хазии, ӱгредии, чааҷы специальнозына тимненізі хоостыра паза психологияҷа таллағ салтарларын санға алып, хығыртығ комиссиялары мындағ чарадығлар аларлар:
– чааҷы службазынаң позыдардаңар алай отсрочка пирердеңер;
– Россияның Тирігліг кӱстерінзер чааҷы службазына хығыртардаңар, ідӧк чығҷаң пунктсар ызарға чааҷы комиссариаттарынзар килер кӱнні искірердеңер.
Хакасияның чааҷы комиссариадының чығҷаң пунктында прай призывниктерге чааҷы кип-азаа, ізіг ас-тамах, банк карталары, сим-карталар, ідӧк несессерлер (гигиена ниме-ноо чыындызы) пирілче. Служба иртер орынзар прай чолға призывниктер азыранҷаң рационнар аларлар.
Тирігліг кӱстерзер ызылчатхан кізілерні хайди даа дактилоскопияҷа хазна санына алары иртірілче.
Кізілернің нерва-психологиязы пик полчатхан синін орталадар, профессияҷа паза психологияҷа службаа чарапчатханнаңар чарадығ алылғанның санын сыныхтир пӧгіннең, призывниктерні хоза сыныхтапчалар.
Хығыртылған кізілерні чааҷы службазын иртер орыннарзар октябрьның ортызынаң ызып пастирлар. 100 азыра призывник службаны Центральнай чаа округындағы войсколарда иртер. Физическай паза сағыс-кӧрізі хоостыра иң тимде призывниктер кии-десант войсколарынзар паза национальнай гвардия войсколарынзар алыларлар.
Октябрь-декабрьдағы чааҷы службазына хығыртығ тузында Россияның Тирігліг кӱстерінзер чааҷы службазын иртерге ызылчатхан призывниктерге алынҷа электроннай карталар пирер тоғыс узарадылар. Олар арачыланыс министерствозының искіріглер базазынзар кирілерлер.
Сағам кізілерге искіріглер повесткаларнаң паза чахығлығ пічіктернең читірілерлер. Электроннай оңдайнаң искіріглер 2024 чылның 1 январьынаң пиріл сығарлар. Хығыртығ тузында эпидемиялардаң тоғыр прай мероприятиелерге тудынарлар. Чааҷылар, хығыртығҷа служба иртібісселер, тузында иблерінзер айланарлар.
Юрий Курлаевтің хоза искіриинең, Хакасиядаң хығыртылған призывниктернің 5 % чааҷы службазын республикада иртер.
Сом чааҷы комиссариадыни
Автор :
Тимнеен Николай Султреков
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде