Чайаачынаң айғазарға килістіре орында орныхча
11.10.2023
Хабарлар
![Чайаачынаң айғазарға килістіре орында орныхча Чайаачынаң айғазарға килістіре орында орныхча](/upload/iblock/dc5/qzsoijbo0mhsakp5bcfpr2jbt1wl6yv7.jpg)
Хызыл лента хыплаан соонаң
«Культура» нацпроект. 9 октябрьда Нымырттығ посёлокта тиксі тыхтағ тоғызы соонаң олған искусство школазы азылды
Нымырттығ посёлоктағы олған искусство школазы 40 чыл мының алнында пӱдірілген. Ол 1983 чылда пастағы ӱгренҷілеріне ізиин асхан. Аннаң сығара тиксі тыхтағ тоғызы иртірілбеен. Аны пӱӱл март айдаң «Культура» нацпроектче нааҷылирға тыыныбысханнар. Чылығ пирҷең системаны, канализацияны, чарытхыны пӱкӱлее алыстырғаннар, тура хырын нааҷылааннар, фойеде паза уроктар иртірчеткен 20-ҷе кабинетте тыхтағ тоғызын иртіргеннер (ағас ізіктерні пластикке алыстырғаннар, полға линолеум часханнар), иргі кӧзенектер орнына пластик турғысханнар. Ікі хадыллығ тура саңай пасха кӧрімніг турыбысты. Амды анда чарых, истіг паза чылығ. Подвалда даа чарытхы пар. Прай пу тоғысха 19,9 миллион салковай хорадылған.
Чахсы кибір хоостыра наа тураның ізиин азар алнында хызыл лентаны хыплирға киректелче. Олған искусство школазының тоғынҷылары пастап хызыл лентаны тура алнында тарт салған полғаннар, че наңмыр чабысханда, аны фойе алнынзар кӧзірібіскеннер. Аны аарлығ аалҷылар, Хакасия пазы Валентин Коновалов, культура министрінің тоғызын толдырчатхан Светлана Окольникова, Саяногорск город пазы Евгений Молодняков, хыплааннар.
– Пӱӱл піс 11 искусство школазын нааҷылапчабыс. Таныхтирға кирек, «Культура» нацпроект Россия президенті Владимир Владимирович Путиннің чахии хоостыра чуртасха киріліп, ӧткін толдырылча. Наа, чарых турада тоғынарға хаҷан даа истіг. Нымырттығ посёлоктағы искусство школазында тӧстелгеннең сығара тиксі тыхтағ тоғызы иртірілбеен полған. Федеральнай, регионның паза муниципальнай бюджеттернің ахчазына ол тоғыс толдырыл парды. Амды материально-техническай базаны алғыдар сурығны пӧгербіс. Нааҷылалған тураны сибер хайраллирға кӱстенербіс, – чоох тутхан Валентин Олегович.
Анаң школаның директоры Светлана Важенова улуғ аалҷыларға экскурсия иртірген, тыхтағ тоғызында ниме иділ парғанын кӧзіткен.
– Пӱӱнгі кӱнде пістің школада 4 – 16 частығ 206 олған ӱгренче (Нымырттығ посёлокта 1200 – 1300 пала чуртапча), – чарытхан школа директоры Светлана Вадимовна Баженова. – Выпускниктерібіс колледжтерде, вузтарда тирең піліс алған соонаң пеер тоғынарға айланчатханнары тың ӧріндірче.
![](/news/photo_2023-10-10_11-11-47.jpg)
Искусство школазының тастындағы кӧрімі
Экскурсия соонаң піс, хабарҷылар, ӱгретчілернең танызып, чоох алысхабыс.
– Мин Хакасия культуразының саблығ тоғынҷызы Ольга Владимировна Понятинаның иң пастағы выпускниктерінің пірсі полчам. Ол ам даа тоғынча, палаларны ӱгретче, – чоохтаан хоос искусствозынҷа ӱгретчі Мария Александровна Лопатина. – Пу школаның иркінін чибіргі чыл мының алнында алтаам, андада 5-6 класста ӱгренчеткем. Пастап музыканаң айғазарға сағынғам, че хоостиры кӧңніме улам кір парған. Пис чыл ӱгренгем. Анаң Новосибирсктегі хазна архитектура-хоос академиязынзар кіріп алғам. Аны «Архитектор» специальностьча тоосхам. Новосибирсктӧк аймах организацияларда пис чыл архитектор полып істенгем. Нымырттығдағы олған искусство школазында тӧртінҷі чылы тоғынчам. Минзер олғаннар тӧрт частығдаң чӧрчелер. Че хоосты хайди орта сырлирын, кӧлекнең килістіре тузаланарын олар 11-12 частығда ла чахсы оңарып пастапчалар.
Мария Александровна олғаннарынаң хада сіліг хоостар чайирға Ким суғ хазынзар сыхча, Ымай тас посёлоксар чӧрчелер. Таныхтирға кирек, Саяногорск саринда чир-чайаан уғаа сіліг, аннаңар анда хайда даа хайхастығ тоғыстар чайирға чарир. Искусство школазы даа пӧзік харайғайлар паза сылағай хазыңнар аразында турча. Мында хайдағ даа чайаачынаң айғазарға иң киліcтіре орын тіпче ӱгретчі.
М.А.Лопатинаның ӱгренҷілері регион паза хазна синіндегі, чоннар аразындағы марығларда сыбыра араласчалар, сыйыхтығ орыннар алчалар.
– Палаларым школа соонаң аймах колледжтерде, академияларда пілістерін алғытчалар. Кӧзідімге, Алёна Строкова Санкт-Петербургта мультипликаторға ӱгренче. Ӱгренҷілерім ідӧк Хызылчардағы Суриковтың адынаң хоосчылар училищезінзер кірчелер, – таныхтаан Мария Лопатина.
Нымырттығ посёлоктағы олған искусство школазында ідӧк сарнирға, теелбектенерге, кӧг тиріглерінең (фортепиано, баян, гитара) ойнирға ӱгренчелер.
– Мин вокал урогын апарчам. Пу пӧлік школада 2006 чылда тӧстелген, – чоохтаан ӱгретчі Елена Николаевна Стеценко. – Ӱгредиим хоостыра дирижёр-хоровик полчам, Саратовтағы музыка училищезін тоосхам. Минің чеенім Светлана Лукьянова Нымырттығдағы искусство школазын тоосхан соонаң Саратовтағох консерваторияда ӱгренген. Олох консерваторияда завуч полча. Хызым Татьяна Стеценко ідӧк пістің школаны тоосхан, анаң Саратовсарох парған, консерваториязар кіріп алған. Олох городта чуртирға халған, областьтағы Шниткенің адынаң филармонияда дирижёр полып істенче паза консерваторияда ӱгретчі полча. Оолғым Михаил Стеценко Нымырттығдағы искусство школазында хоосчаа ӱгренген. Соонаң Хызылчардағы Суриковтың адынаң хоосчылар училищезін тоосхан. Ам Хызылчардох дизайнер полып істенче. Іди пістің искусство школазы сылтаанда прай палаларым чайаачы чолын таллап алғаннар.
Елена Стеценко позы Саратовта тӧреен-ӧскен. 1998 чылда Хакас чирінзер харындазы Сергей Курамшинзер ааллап килген. Харындазы андада Сойан-Сус ГЭС-та инженер полып тоғынчатхан. Хакасия Елена Николаевнаның кӧңніне тың кір парған, аннаңар мында халарға чаратхан. Іди ол Нымырттығ посёлоктағы олған искусство школазынзар килген.
Елена Николаевна – кӱстіг ӱгретчі. Аның ӱгренҷілері Ағбандағы искусство колледжінзер оой кіріп алчалар. Александра Якулькова поғдархазы полча. Ол Минсуғдағы культура паза искусство колледжінде эстрада-джаз пӧлиин тоосхан. Ам пӧзік ӱгредиин Кемеровтағы хазна культура институдында алча.
– Піс аймах марығларда сыбыра араласчабыс. Казахстандағы Астаназар, Калининградсар, Хазанзар, Ярославльзар, Екатеринбургсар чӧргебіс паза Сибирьдегі городтарның фестивальларында сыбыра араласчабыс, сыйыхтығ орыннар алчабыс, – ӱлескен вокал ӱгретчізі.
Мероприятие соонаң олған искусство школазынзар палалар ӱгренерге чыылыс сыхханнар. Ол арада піс пір чайаачы хызыҷахнаң чоохтазып алғабыс.
– Мин искусство школазынзар ӱс чыл чӧр парирбын, – теен 9 частығ хызыҷах Арина Тигунова. – Хореография пӧлиинде ӱгренчем паза фортепиано клазына чӧрчем. Ам ӧӧн школадағы уроктар соонаң пеер килдім. Фортепианонаң кӧп кӧг ойнап полчам. Мин искусство школазынзар чӧр сыхханда, іҷе-пабам фортепиано ал пиргеннер, аннаңар мында ӱгренчем паза ибімде хоза ойнапчам. Пу школаа чӧрерге кӧңніме кірче, мында наа пілістер пирчелер, ӧӧрелерім кӧп. Школа тастынаң даа, істінең дее уғаа сіліг.
Пӱӱл март айда школа тыхтағ тоғызына чабыл парғанда, искусстваа тартылчатхан чайаачы олғаннар посёлоктағы 1№ школазар ӱгренерге чӧргеннер. Амды, нааҷылалған школада ӱгреніп, улам пӧзік чидіглерге чидерлер.
Сомнар Станислав Побеляевти
Автор :
Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде