Сенаторға Александр Жуковты тапханнар
13.10.2023
Хабарлар
Наа табылған сенатор Александр Жуков (ортызында)
Ӧӧркі Чӧп. Хакас Республиканың Ӧӧркі Чӧбі ікінҷі теестегі нимес сессияа чыылысхан
Хакасияның сигізінҷі хығыртии Ӧӧркі Чӧбінің депутаттары чарыс айының 11-ҷі кӱнінде сессияа чыылысханнар. Теестегі нимес сессияның кӱн суриинда сурығлар кӧп полбаан – пис ле. Оларның аразында иң ӧӧні Россияның Федерация Чӧбінзер Хакас Республиканың Ӧӧркі Чӧбінің кізізін табары полған.
Таныхтирға кирек, пу сессия кӧп чыл соонаң хатап онлайн режимде кӧзіділ сыххан. Аннаңар, сессияны азып, Ӧӧркі Чӧп кнезі Сергей Сокол искірген.
– Амды сессияны кӧні трансляцияҷа Ӧӧркі Чӧптің сайтында паза ВКонтакте социальнай сетьте Ӧӧркі Чӧптің официальнай страницазында кӧріп аларға чарир, – чарлаан ол.
Сессия тоғызында Хакасия пазы Валентин Коновалов, республикадағы министерстволарның паза ведомстволарның кізілері, пірее муниципальнай пӱдістернің пастары араласханнар.
Сессияның пастағы сурии – Татьяна Овчарукты хати мировой чарғыҷаа турғызардаңар – чапчаң кӧріл парған. Депутаттар Овчарукты пір ӱннең Ағбан пилтірі аймаандағы 1№ чарғы участогының мировой чарғыҷызына турғызыбысханнар.
Анаң ӧӧн сурығның теезі читкен. Итсе, мында даа улуғ таңнастар чох полған. Россияның Федерация Чӧбінзер сенаторға пір ле кандидатура сығарылған – мының алнында сенатор полған Александр Аркадьевич Жуковтың («Единая Россия»). Ол 2019 чылдаң сығара Федерация Чӧбінде Хакас Республиканың Ӧӧркі Чӧбінің кізізі полып тоғынған.
Сенаторға Александр Жуковты хати табар чӧпнең конституционнай законодательствоҷа, хазна пӱдіриинҷе, законностьча паза правопорядокча комитеттің наа устағҷызы (хоза танығ – ӱр чыллар пу комитетнең устаан Светлана Могилина амды Ӧӧркі Чӧп аппарадының устағҷызы полыбысхан) Галина Елистратова сыххан. Пасха кандидатуралар сығарылбаан.
Че Александр Жуковтың кандидатуразын ӱзӱрерінде Ӧӧркі Чӧп депутады Олег Иванов чоох пирерге сурынған. Мының алнында бюджетче комитетнең устаан кізі, трибунаа сығып, Жуковтың кандидатуразы ікінҷілестіг тіп искірген. Аның чооғынаң, Жуковтың идінҷек тоғызы кӧп сурығ сығарча. Анда «коррупцияа тӧӧй хоос» сығысча тіп чоохтанған паза пу искірігні республиканың право хайраллаҷаң органнарынзар официальнай айланызы чіли санирға чарлаан. Олег Иванов ідӧк сенаторны табар сурығны соондағы сессияа артыс саларға чӧпнең сыххан.
Пасха депутаттар Жуковтың алнын алғаннар, Иванов, «чылығ орнын» чідір салып, хатап олаңай суум-саам кӧдірче тіп. Салтарында Ӧӧркі Чӧп Александр Жуковтың кандидатуразынҷа бюллетеньнер полызиинаң чазыт ӱн пиріс иртірерге чарат салған.
Ӱн пирісте пу сессияа килген прай 45 депутат араласхан. Жуковтың ӱчӱн 39 депутат ӱн пирген, тӧрт депутат – тоғыр, ікі бюллетень ардадылғанға саналған. Андағ оңдайнаң, Александр Жуков Россияның Федерация Чӧбінзер хати табылған. Депутаттар ідӧк Жуков сенаторға табылғаны хоостыра аның депутат полномочиелерін азынада тохтадардаңар чарадығ алғаннар.
Теестегі сурығ – «Хакас Республика чирінде чуртағҷыларның алынҷа категорияларына чир участоктарын тикке пирердеңер» Хакас Республика Законының 2-ҷі статьязынзар паза приложениезінзер алызығлар кирердеңер» закон проекті.
– Пу закон проекті Россия президентінің чахии полча, ол ӧнетін чаа операциязының араласчыларына хабазарына кӧстелген, – чарытхан Ӧӧркі Чӧп кнезі Сергей Сокол.
Президенттің чахиинҷа Хакасия правительствозы тимнеен закон проектінең ис-пай паза чир хайызығлары министрінің тоғызын толдырчатхан Дмитрий Панарин таныстырған. Закон проектінҷе чир участогын амды тикке пир турарлар:
– ӧнетін чаа операциязының араласчыларына, хайзылары Россия Матыры атха турысханнар алай, СВО-да аралазып, орденнернең сыйыхтатханнар;
– СВО-да чуртастарын чідірген чааҷыларның сӧбірелеріне.
Чир участоктарын СВО араласчызы чуртаан орны хоостыра муниципальнай пӱдістер пирерге киректер.
Паза депутаттар пу сессияда Ӧӧркі Чӧптің тоғызына теелчеткен законодательнай акттарзар алызығлар кирерін ӱзӱргеннер. Ол тӱзедіглерҷе Ӧӧркі Чӧптің хайзы тоғыс оңдайлары алысча. Кӧзідімге, парламент устағҷызына амды Ӧӧркі Чӧп президиумынзар хайдағ комитет-комиссиялар кнестерін кир турарға чӧпнең сығар право пирілче. Ідӧк Ӧӧркі Чӧп кнезінің пастағы орынҷызынаң пасха олаңай орынҷызы (комитетнең алай комиссиянаң устабинчатхан) пар полар. Хайзы депутаттар ол алызығлардаң тоғыр полғаннар.
– Нимее ол декоративнай должностьтығ наа орынҷы кирек? – сурған Олег Иванов.
– Кнес орынҷылары комитеттернің тоғызын хайығда тут турарлар, – чарытхан Сергей Сокол. – Ол алызығ Ӧӧркі Чӧп тоғызын тӱзімніг идер кӧстегнең кирілче. Правительствода алынҷа сурығларны хайығда тутчатхан орынҷылар парох нооза. Регламент, хайзынҷа піске амды тоғынарға килісче, пӱӱнгі кирексіністерге нандырбинча.
Салтарында закон проекті кӧбізі ӱннең алыл парған. Мыннаң теестегі нимес сессия тоозыл парған.
Сессия соонаң Ӧӧркі Чӧп кнезі Сергей Сокол хабарҷыларнаң кӧп нимес чоох алызып алған. Иң не пастап ол Александр Жуковты Федерация Чӧбінзер табылғанынаң алғыстаан, ол иң чахсы сенаторларның пірсі полчатханын таныхтаан.
– Андағ паалаға Александр Аркадьевич ӱр чыллар политикада тоғынып турысхан, – теен Ӧӧркі Чӧп кнезі. – Пӱӱн мындағ чарадығ алылғанына мин ӧрінчем. Федеральнай синде мындағ сенаторнаң тоғыс, ол санда республиказар ахча кирерінҷе, тӱзімніг парар тіп сағынчам.
Сергей Сокол инвестициялар паза федеральнай программалар хоостыра республика бюджедін толдырарға кирек полчатханын таныхтаан. Тӱрчедең республика бюджедін тӧстирінҷе тоғыс пасталыбызар. Анзында эксперт чӧптері полызар тіп искірген ол.
– Хакасияның Ӧӧркі Чӧбінде аймах-пасха отрасльларнаң паза ағырсымнығ сурығларнаң тоғынҷаң 20-ҷе эксперт чӧбі тӧстелер, – чоохтаан Ӧӧркі Чӧп кнезі.
Эксперт чӧптерінзер депутаттар паза отрасльларның, муниципальнай пӱдістернің кізілері кір турарлар тіп кӧрілче. Кӧзідімге, бюджетче эксперт чӧбінзер республиканың прай муниципалитеттерінің кізілері кирілер осхас.
– Полған на аймахтың, городтың кізізі бюджеттің саннарын кӧрер, бюджет ахчазын ӱлестіреріне теелер оңдайлығ полар, – чарытхан Сергей Сокол. – Бюджетче тоғыс прай азых полар, прайзы кӧрер паза оңарар.
Сом Альбина Чистогашевани
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде
