Хакас театрында – «Мастер паза Маргарита»
13.10.2023
Хабарлар
Мастер (Максим Султреков), Маргарита (Александра Тахтобина)
Тун ойын. А.М.Топановтың адынаң Хакас драма театрында Михаил Булгаковтың саблығ романынҷа турғызылған спектакльны кӧзітчелер
Театрның ӧӧн режиссёры Тимур Казнов хайхастығ ойынны тимнепчеткені ӱрӱктірбеен. Аның сағынған сағызы чахсы киліс парарына ізенгебіс. Пылтыр Тимур Тамерланович Ф.Зеллернің пьесазынҷа «Паба» спектакльны турғысхан. Ол даа ойында «чылтырах» хайхастар толдыра. Аннаңар пӧзік устығ режиссёр пістің улуғ опыттығ, сценада киртістіг ойнапчатхан артисттернең хада «Мастер паза Маргаританы» даа турыстығ тимнебізер тіп ікінҷілес чох полған.
Михаил Булгаков саблығ романын 12 чыл пасхан, хайда-да наа матырлар хосхан, хайзы-да кизекті хыйа алған, кӧп хати алыстырған, холнаң пасхан тоғыстарын ӧртеенҷе парғанох. Аның Мастері – хыйға, пӧзік чайаачылығ, че олох туста чуға хуйахтығ, амыр писатель. Хакас театр турғысхан спектакльда аны Хакасияның саблығ артизі Максим Султреков чахсы ойнапча. Маргарита полча артист Александра Тахтобина. Маргарита Мастерге прай чӱреенең хынча, аның ӱчӱн Хуу хатха даа айлан парарға паза харасхы, тарғынҷах подвалда даа хызылып чуртирға тимде.
Пӱӱл Иркутсктағы «Пай кӧл талисманы» фестивальдаң айланған соонда Хакас театрының хореографтары Анат паза Анастасия Быдышевтер сценада артисттерні учухтыр чӧрерге дее тимделерін искірген полғаннар. Булгаковтың романында, тізең, Маргарита город ӱстӱнҷе учухча. Аннаңар наа ойында теелбек устарының сағыстары толған – Маргарита сценадаң уғаа пӧзік ӧӧрлепче, кӧрерге дее хайхастығ, че олох туста артисттің чуртазы ӱчӱн чочыныстығ.
Бегемот аттығ хоосханы Хакасияның саблығ артизі Арлекин Толмачёв хынығ ойнапча. Театрның тікчең цеғының устары ағаа килістіре кип-азах тимнебістірлер. Бегемот сала ла cын сынынаң тиң нимес, килкім тӱрінҷекнең ойнап парыбысча алай «тырғахтарынаң» стенені тырбахтап сыхча.
Воланд сыбырағҷыны чиит артист Николай Бельтереков ойнапча. Аның даа костюмы махалығ. Иң пурнада узуны 7 метр хара плащы харахха тасталча. Сыбырағҷы кӧрігҷілерзер сала чағын пастырза, аның харахтары хорғыстығ ағарчалар. Артист ойынға ӧнетін андағ линзалар кис салтыр, кӧрерге изі чох полза даа, че сыбырағҷының омазын киртістіг чайирына тың килістіре. Николай Бельтереков ойын тооза харахтарын тыплатпинча тіп пілдірче. Кӧрігҷілер залында хости одырчатхан ипчілер, Воландтың харахтарынзар кӧріп, хайдағ хорғыстығ тіп сыбыхтасчатханнар.
Аппағас кип-азахтығ прокуратор Понтий Пилат хакас сценада ідӧк морсымнығ кӧрінче. Аны артист Сергей Доможаков чалтырама ойнапча, ӱні дее килістіре, хойығ. Ол философ Иешуаны (артист Анат Быдышев) паза аннаң хада ікі оолны ӧлімге айағ чох чарғылабысча. Че аның ӱчӱн тың ачырғанча.
Пу чапсых ойында Алиса Толмачёваны хайди даа таныхтирға кирек. Ол суғлар паза сӱзӱннер сатчатхан садығҷының даа, Воландтың свитазына кірчеткен вампирнің дее омаларын хандыра кӧзітче.
Булгаковтың романында хайхастар толдыра, оларны спектакльда даа кӧрерге чарир. Ойындағы хайхастарның пірсі – матырының омазын толдырып, Алиса Толмачёва суғлығ улуғ «стаканзар» сегірібісчеткені, анаң суғ алтында теелбектенчеткені. Аны кӧре, тың ӱрӱкчезің. Ағаа хоза, Алиса Терентьевна сіліг сарнапча.
Спектакльда театрның прай артисттері араласча. Андағ даа полза, хай піреезі ікі-ӱс матырның омазын чайирға маңнанча. Кӧзідімге, артист Виктор Сагалаков Крысобойны, Лиходеевті паза Алхимикті ойнапча, Россияның саблығ артизі, Хакасияның чон артизі Геннадий Чаптыков Кайфа паза Босой полча, Николай Бельтереков ӧӧнінде Воландты ойнапча, че олох туста Афраний поларға маңнанча. Чиит хыстар Дарья Тачеева, Карина Ултургашева, Анастасия Быдышева, Камилла Кокова, Алина Гетманова пастап официанттарны ойнапчалар, анаң медсестралар полыбысчалар.
«Мастер паза Маргарита» ойынны хакас сценада турғызарға пір чыл чарым парыбысхан. Сценарийні пылтыр пазып пастааннар. Пӱӱл март айдаң сығара репетициялар парған.
Ойын ӱс час парча. Ол пір антракттығ. Аны республиканың полған на чуртағҷызына кӧріп аларға кирек, уламох улуғ класстардағы ӱгренҷілерге. Олар М.Булгаковтың «Мастер и Маргарита» романын школа программазынҷа иртчелер нооза. Спектакльны пос хараанаң кӧріп алза, ХХ чӱс чылдағы писательнің пай тілі, тоғызы улам пілдістіг пол парча.
Сом Равиль Дзязькони
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
