Маллар ӧлчеткені істезілче
13.10.2023
Хабарлар
![Маллар ӧлчеткені істезілче Маллар ӧлчеткені істезілче](/upload/iblock/51e/kgeqd1khnxiyra6kvjwzmkcmm2fgtwwg.jpg)
Кӱн сурии. Хакасия пазы Валентин Коноваловтың чарадиинҷа Боград аалда аймах синінде сағыбаан саай режимі кирілген
Хакасияның аал хонии паза ас-тамах министерствозы искіриинең, Боград аалда алынҷа тӱнӱктерде маллар чуғынҷах ағырығдаң ӧлчеткені таныхталған. 15 інектең хан паза 4 інектің пуруннарын чайған суғ сыныхтаға алылған. Олар Хакасияның мал имнее лабораториязынзар ызылғаннар. Азынада искірігҷе, малларға чуғынҷах узелковай дерматит диагноз турғызылған. Пу ағырығны киречілир паза хоза істезіглер иртірер ӱчӱн, сыныхтаға алылған пробалар Владимир городтағы мал-хустың хазиин хайраллаҷаң федеральнай кінзер ызылған. Ветеринар имнег службазының тоғынҷылары тиксі киректелчеткен тоғыстарны толдырчалар.
Нодулярнай алай узелковай дерматит – ол інек мал паза пасха аңнар ағырчатхан аар чуғынҷах ағырығ. Мал, пасхаҷыл вирусты хаптырып, ағырыға саптырча. Аның теерізінде cістер сыхча. Ағырығ уғаа чуғынҷах, аннаңар мал аразында табырах тарапча. Теер ағыриин хаптырған малларның 4 – 95%-і ӧл парча.
Пу ағырығ кізее хорғыстығ нимес. Пӱӱнгі кӱнге аның малдаң кізее чухханы пір дее таныхталбаан. Че, андағ даа полза, ағырығ малнаң палғалысчатса, арачыланыс кип-азаан кизерге киректелче. Сылтағ – кізі, ағырығ малның вирузын хаптырып, ағаа тарир оңдай пирчеткені. Салтарында, тізең, чуғынҷах ағырығ алғым чирге тарап парыбысча.
Хакасия пазы Валентин Коновалов аймах cиніндегі сағыбаан саай режимін кирердеңер чарадығда хол салыбысхан.
Хакасияның аал хонии паза ас-тамах министерствозында пу сурыға чарыдылған чыылығ ирткен. Министр Сергей Труфановтың чооғынаң, Боград аймаандағы ветеринар службазының тоғынҷылары, ағырығ сығысхан орынзар парып, анализтерге пробалар алып алғаннар паза Владимир городсар ызыбысханнар. Пӱӱнгі кӱнге істезіг пічіктері килгелек.
– Ол маллар аразында тарапчатхан узелковай дерматит полар тіп сағынчабыс. Пӱӱнгі кӱнде ағырығ тарабас ӱчӱн Россияның аал хонии сыныхтаа устанызы прай кирек тоғысты апарча. Республикада Россияның аал хонии паза ас-тамах министерствозының, ветеринария департаментінің, Россельхознадзорның тоғынҷылары тоғынчалар. Боград аймаа хайығда. Боградтаң парчатхан прай чоллар чабыл парғаннар. Анда МВД, Россельхознадзор, ветеринар службазы тоғынҷылары турчалар, – теен Сергей Труфанов.
Хакасияның хазна ветеринар инспекциязының устағҷызы Гульнара Керимованың чооғынаң, узелковай дерматит тилем учурабинчатхан ағырығлар санында. Мының алнында Хакасияда пу ағырығ сығыспаан. Табырах тарапчатхан ағырығдаң ӧӧнінде чиит маллар ӧлчелер. Ағырығ паза ағырығдаң ӧлген мал саны пілдістіг нимес. Амғы туста орындағы пос устаныс органнарының паза ветеринар службазының тоғынҷылары мал санын санапчалар.
– Ағырығ тарабас ӱчӱн, ол сығысхан орыннаң маллар, ит, сӱт сығара тартылбасха кирек. Ол орынзар кізілерге чӧрерге чарадылбинча. Ағырығ кізее чухпинчатса даа, анда пол килгеннер ағырығны тарадарлар. Прай чуртағҷыларға малларны сығарарға, ит, сӱт, мал сығара тартарға чарадылбинчатханнаңар искіріг пиріл парған. Ағырығ тарабас пӧгіннең чарыс айының 6-ҷы кӱнінде прай тоғыстар пасталған. Позырах кӱнде чуртағҷыларнаң чыылығ иртірілген. Мал тутчатхан полған на кізінең чоохтасхабыс, – таныхтаан Россельхознадзор устанызы пастығының орынҷызы Геннадий Ульчугачев.
Сом Аал хонии паза ас-тамах министерствозы сайтынаң
Автор :
Тимнеен Оксана Челтыгмашева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде