Нейросетьті хакас тіліне ӱгредеелер
19.10.2023
Хабарлар
![Нейросетьті хакас тіліне ӱгредеелер Нейросетьті хакас тіліне ӱгредеелер](/upload/iblock/082/a2wmhgvjm3brsruuyt80s8u5lw0cg7a3.jpg)
Хакасияның ӱгредіг тилізінің паза квалификация кӧдірерінің институды 23 ноябрьда «Нейросетьті хакас тіліне ӱгретчебіс» акцияда аралазарға хығырча. Ол хакас тілін хайраллир паза тилідер пӧгіннең иртірілчеткен «Пурунғының педагогика ис-пайы ӧсчеткен тӧллерге» наука-практикалығ конференциязының тоғызынаң палғалыстырылча.
Акцияның ӧӧн пӧгіні ‒ нейросетьті хакас тіліне ӱгредерінде хабас пирері. Анзы, тізең, интернетте хакас-орыс тілбесчіні тимниріне хозым полар.
Акцияның иртірілер тузы ікі чардыхха чарыл парған. Пастағы чардығы 10.00-12.00 частарда иртер, ікінҷізі ‒ 13.00-15.00 частарда. Анда аралазарға сағынчатханнарға постарына килістіре тусты таллап аларға чарир.
Аралазар оңдайлар (олар пасха-пасха кӧрімніглер, посха килістiрезiн акция тӧстегҷілерінең піліп аларға чарир):
1. Хакас тілінең компьютерде пазылған текстті тимнеп килерге, чарир постин алай акция тӧстегҷілері пирерлер;
2. Орыс-хакас сöстігінең тузаланып, ікі тілнең пазылған чоохтағларны (хакас тілінең орыс тіліне тілбестиинең хада) компьютерде таблицаа кирерге;
3. Хакас тілінең тимнелген сайттарнаң тузаланып, ікі тілнең пазылған чоохтағларны (хакас тілінең орыс тіліне тілбестиинең хада) компьютерде таблицаа кирерге;
4. Хоос алай публицистика тексттерін хакас тілінең компьютерде таблицаа кирерге. Текстті нинҷе дее тус пазарға чарир, акция кӱнінде пастап, анаң ол тоғысты хайдағ даа кӱнде пос туста узарадарға чарир.
Акцияда чалғысханға даа, хада тоғынчатханнар ӧмезінең дее аралазарға чарир. Пос ноутбуктарын хада алып алза, уламох чахсы полар.
Акция тӧстегҷілері араласчыларға аттары пазылған сертификаттар читірерлер. 10 муң ікі тілнең пазылған чоохтағны translate.khakas@gmail.com электроннай почтазар ыс пирген кізіні акция волонтерларының санына кирерлер, олардаңар «Хакас чирі» газетада пазылар. 100 муң ікі тілнең пазылған чоохтағны translate.khakas@gmail.com электроннай почтазар ыс пирген араласчылар акцияның Аарластығ волонтерлары атха турызарлар. Олардаңар ідӧк газетада хабар сығар.
Акция тӧстегҷілері: Надежда Толмачева, ХакИРОиПК-ның хакас тiлiне ӱгредер методика кiнiнiң устағӌызы, тел. 8-913-053-6773, e-mail: tolm-nady@yandex.ru.
Василий Адёшкин, тел.8-999-223-4851, e-mail: translate.khakas@gmail.com.
Автор :
Тимнеен Татьяна Кыштымова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде