Істезіглерде тынағ чох
20.10.2023
Хабарлар
Чоох тутча Маина Чебодаева, одырчалар Хакасияның Ӧӧркі Чӧп кнезі Сергей Сокол паза ХГУ-ның ректоры Татьяна Краснова
Презентация. Н.Ф.Катановтың адынаң Хакас хазна университедінің библиотеказының хығырҷаң залында наа сыххан книганаң таныстырғаннар
Ол книга-альбом «С берегов Аскиза до берегов Невы» адалча. Аның авторы – искусствоведение кандидады, ХакНИИЯЛИ-ның улуғ наука тоғынҷызы Маина Чебодаева. Пу тоғызында Маина Петровна пістің саблығ ученай Николай Фёдорович Катановтың наукадағы чолын істескен. Книга тилем учурабас паза чапсых сомнарнаң чазалған.
Амғы туста книганы пас саларға ла нимес, че ідӧк аны сығарып аларға кирек полча. Маина Петровна паарсах хылыхтығ спонсорлар полызиинаң алай пос ахчазына іди 30 азыра книга сығарыбысхан.
Пу халғанҷы наука тоғызын сығарарға полыс пирген Россияның Хазна Думазының депутады полған Сергей Сокол. Амды ол Хакасияның Ӧӧркі Чӧбінің кнезі. Аннаңар ХГУ-да иртчеткен мероприятиеде Сергей Михайлович улуғ аалҷы полған.
Презентацияны апарған Россияның саблығ артизі, Хакасияның чон артизі Светлана Чаптыкова. Аның хыс фамилиязы Чебодаева нооза, пу кирекке уғаа килістіре пол парған. Светлана Семёновна, режиссер кізі, мероприятиені позы пасхан сценарий хоостыра иртірген.
Иң пастап залға толдыра одырған чонға «Судьба инородца» киноның ӱзігін кӧзіткеннер. Аны суурған «Хакасфильм» учреждениенің устағҷызы Юрий Курочка паза сценарийні пасхан ГТРК-ның хабарҷызы Марина Канадакова. Ӧӧн рольны, Н.Ф.Катановтың омазын, чайап толдырған Хакасияның чон артизі Геннадий Чаптыков.
Светлана Семёновна ідӧк чоохтаан А.М.Топановтың адынаң Хакас национальнай драма театры саблығ драматург Александр Чапрайның «Рожденный небом» ойынын хайди турғысханын. Ойынның режиссеры – Баатр Колаев, ӧӧн рольны, Н.Ф.Катановты, ойнаан Россияның саблығ артизі Виктор Коков.
Чоохтирға кирек, пістің саблығ ученай Николай Фёдорович Катановтаңар илееде книга чарыхха сыххан. Амды оларға хозылған Маина Чебодаеваның книга-альбомы. Соонаң даа пістің саблығ ученайдаңар тоғыстар сығарына ізеніс пар.
Кино ӱзігі тоозыл парғанда, Хакасияның саблығ артизі Олег Чебодаев (пазох Чебодаев! Ох, кӱлӱк род полтыр! – Авт.) чатханнаң «Албынҷы» алыптығ нымахтың улуғ нимес ӱзігін хайлап пирген. Аны ізіг айа сабызынаң удурлааннар.
Анаң сӧс алған Хакасияның Ӧӧркі Чӧбінің кнезі Сергей Сокол. Ол позының чооғында «Единая Россия» партия Хакасияның культуразына полызарға хаҷан даа тимде тіп таныхтаан. Піске республикабысты паза аның кізілерін сабландырчатхан книгалар кирек. Чуртаста хайдағ-да пӧзік чидіглерге чидерге сағынчатхан чииттер Н.Ф.Катановтаң кӧзідім алзыннар. Аннаңар чалтанмасха кирек, хайдағ даа пирік пӧгіннерні толдырарға!
Сергей Михайловичтің чооғына хозылған ХГУ-ның ректоры, экономика наукаларының докторы Татьяна Краснова. Университетке тиктең нимес Николай Фёдорович Катановтың адын пиргеннер. Хакасияның ӧӧн ВУЗ-ы кӧп хыйға студент сығарча. Пу пӧзік ӱгредіг заведениезінің «Катановтың хығырығларында» чииттер постарының істезіглерінең тӧреміл араласчалар. Халғанҷы чылларда ла 3 муң азыра студент наука тоғызын чарыхха сығарған.
Маина Чебодаева, сӧс алып, чыылған чонны паза книганы сығарарға полысхан кізілерге алғызын читірген. Ам ол Асхыс чирінің тархынын істезерге пастабысхан. Аннаңар ізенчебіс, ӱр дее тус иртпин, піс Маина Петровнаның наа тоғызынаң танызарбыс.
Сом Альбина Чистогашевани
Автор :
Илья Топоев
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде