Пос киреене хабазығ читірілче
25.10.2023
Хабарлар
![Пос киреене хабазығ читірілче Пос киреене хабазығ читірілче](/upload/iblock/1ee/coxvpcvsgne6e1i47jggrm08en893trn.jpg)
Хакасия пазы Валентин Коновалов паза аның орынҷызы тоғызын толдырчатхан Юлия Исмагилова Александр Шохиннең (сол саринаң) чоохтасчалар
Тоғыс чорығы. Хакасия пазы Валентин Коновалов ирткен неделяда Москва городта тоғыс чорығынаң полған. Анда ол Россияның промышленниктері паза идінҷектері пірігізінің президенті Александр Шохиннең тоғасхан паза КПРФ ЦК-зының VІІ Пленумында араласхан
Москвазар тоғыс чорығынаңар Хакасия пазы Валентин Коновалов социальнай сетьтердегі позының страницазында искірген.
Россияның промышленниктері паза идінҷектері пірігізі хазнабыста паза чоннар аразындағы синде пос киреенең айғасчатханнарның сурығларын пӧгерге полысча. Ол промышленностьнаң паза пос киреенең айғасчатханнарны піріктірче, оларға аймах кӧстегліг конференциялар иртірерге, сурығларны ӱзӱрерге паза пӧгерге полысча, ол санда хазна синінде.
Александр Шохиннең тоғазығда промышленность, кічіг паза ортын пос кирее, ідӧк энергетика тилізі ӱзӱрілген.
– 2020 чылдаң сығара минің чахиимҷа Хакасияның экономика тилізі министерствозы промышленностьха хабазарына кӧстелген оңдайларны чуртасха кирче. Піс промышленность тилізінің чыындызын тӧстеп алғабыс паза чыл сай республика бюджедінең аның капиталын толдырчабыс. Ирткен чылдаң пасти ниме-ноо тимнеҷең промышленностьтаң пасха, ідӧк ас-тамах промышленнозына хабас сыххабыс. Ағаа хоза, промышленность предприятиелерінің наа тиріг садысхан хорадығларының 50 процентін айландырарына субсидия тӧлелче. Хакасияның промышленность тилізі чыындызы 5 – 50 миллион салковайны льготалығ ӧдіске пирче, – таныхтаан республика пазы.
Хакасия правительствозы кічіг пос киреене хабазар оңдайлар тӧстепче, ол санда налогтарҷа льготалар пастыра. Іди нииктелген оңдайнаң налог тӧлирінҷе ставка, 2020 чылдох тӱзіріліп, пӱӱнгі кӱнге теере ол синде тудылча: «парыстарҷа» – 1%, «парыстар-хорадығларҷа» – 5%.
Валентин Коновалов Александр Шохинні тоғазығ ӱчӱн алғыстаан паза федеральнай синде промышленностьха паза кічіг дее, ортын даа пос киреене хабазар оңдайларны чахсыландырар пастағларнаң ӱлескен.
Пу тоғазығдаң пасха, Хакасия пазы Валентин Коновалов КПРФ ЦК-зының VІІ Пленумында араласхан. Ол Хакасияның халых паза экономика чуртазына паалағ пирген паза республика правительствозының 5 чыл тоғызы салтарларынаңар искірген.
Валентин Коновалов Хакасияда 2018 чылдаң пасти республиканың ахча суриин иптирінҷе улуғ тоғыс толдырылғанын таныхтаан. Пис чыл аразына хазна ӧдізін айландырарынҷа хорадығлар 6,5 хати хызырылғаннар. Бюджет парызы 2,5 хати ӧскірілген. Хара тас промышленнозынаң кірчеткен парыс 8 хати ӧс парған, алюминийдең – 7 хати. Аал хонии, сығарыс, ниик паза ас-тамах промышленнозы, пӱдіріг паза туризм тиліпче. ЖКХ инфраструктуразын тилідеріне хорадығлар 8,5 хати ӧскірілгеннер, чоллар пӱдіриине, тыхтирына паза алыстырарына – 10 хати, аал хониина – 4 хати.
Сом Валентин Коноваловтың ВК-дағы страницазынаң алылған
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде