Олғаннар ӧрінзіннер, кинделер хығырзыннар
25.10.2023
Хабарлар
Библиотека чыындызын интерактивнай техника пайытхан
«Культура» нацпроект. Ағбанда пастағы модельнай олған библиотеказы тимге сыхты
Пістің хазнада нацпроекттер 2019 чылдаң чуртасха кирілчелер. Олар регионнарға наа объекттер пӱдірер, нааҷылир оңдай пирчелер. Пу кӱннерде тиксі тыхтағ тоғыстары соонаң Ағбанда модельнай олған библиотеказы ізиин асты. Ол Торосовтың орамазы, 18 № адресче орныхча. Учреждениені нааҷылирына 13,6 миллион салковай парыбысхан. Федеральнай бюджеттең 5 миллион салковай позыдылтыр, 8 миллион салковай – муниципалитеттің хорадығлары. 600 муң салковай республика бюджедінең пирілген.
Танығлығ кирекке чарыдылған мероприятиеде Хакасияның Ӧӧркі Чӧп кнезі Сергей Сокол, республиканың культура министрінің тоғызын толдырчатхан Светлана Окольникова паза Ағбанның пазы Алексей Лёмин араласханнар. Хайди чоохтаан Алексей Викторович, Хакасияның ӧӧн городы «Культура» нацпроектте ӱзінҷі хати араласча. Мында Ағбанның библиотека системазын махтирға кирек. Аның ӧмезі республиканың культура министерствозы полызиинаң, проекттер тимнеп, федеральнай ахча киріп алча. Тоғынҷыларның кӱстенізінең муниципалитетте ӱс модельнай библиотека пар. Пастағызы – «Ровесник». Ол саарбахтарға паза чииттерге кӧрілген. Ікінҷізі Индіркі Сограда тоғынча. Амды олған библиотеказы тузаланысха кирілді. Модельнай библиотека ол кинде хайраллалҷаң на орын нимес, аны культура кіні тіп адирға чарир. Олғаннарға мында аймах мастер-класстар, ойыннар иртіріл турарлар.
Ӧӧркі Чӧп кнезі Сергей Соколны нааҷылалған объект чапсыттыр. Ол таныхтаан:
– Культураа ахча хайди даа позыдарға кирек. Чуртас пір орында турбинча нооза. Ол наа тоғыс оңдайларын кирексіпче. Амды олған библиотеказы наа тыныс алып алар тіп ікінҷілес чоғыл. Кинделер чыындызы пай полтыр, оларның санында аймах чыстарнаң таныстырҷаң кинде пар. Андағ ниме пастағызын на кӧрдім. Аны очы оолғыма хайди даа кӧзідербін.
Культура министрінің тоғызын толдырчатхан Светлана Окольникова кӧп чылығ сӧс библиотека тоғынҷыларына, Россияның культура министерствозына читірген. Светлана Анатольевнаның чооғынаң, модельнай библиотекалар – нацпроекттің ӧӧн кӧстеглерінің пірсі. Наа оңдайларда библиотека ӧмезіне тоғынарға хай-хай иcтіг полар. Наа технологияларнаң, амғы оборудованиенең тузаланып, олар хығырығҷыларны хынығ проекттернең ӧріндірерлер.
Пайрам тузында Ағбанның устағ-пастаа пӱдірігҷілерні алғыстаан. Библиотеканы «Дельта» ООО нааҷылаптыр, аннаң устапча Сергей Демёхин. Ідӧк таныхтатханнар «МебельДела» компания паза идінҷек Григорий Варламов.
Мероприятиенің халғанҷызында аалҷыларға экскурсия иртірілген. Кізілерні полған на пӧлік чапсытхан. Пір зал «Фишка» клубха кӧрілген, ікінҷізі «Кубик» адалчаттыр. Анда сӧбіренең кинделер хығырарға чарир. Ідӧк библиотекада интерактивнай лабиринт пар. Кинде чыындызы 2300 экземплярға хозыл парған. Олғаннарның кӧңніне кірер 4 D оңдайлығ кинделер.
Чоохтирға кирек, 2024 чылда пістің республикада хоза ӱс модельнай библиотека азылар. Аннаңар искірче Хакасияның культура министерствозының пресс-службазы. Проекттер мариинда ағбандағылар, боградтағылар паза абазадағылар чиңіс тутханнар.
Сом Ағбан город устағ-пастаа сайтынаң
Автор :
Тимнеен Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
