«Арығ кии» ӱчӱн нандырығлығлар турғызылар
27.10.2023
Хабарлар
![«Арығ кии» ӱчӱн нандырығлығлар турғызылар «Арығ кии» ӱчӱн нандырығлығлар турғызылар](/upload/iblock/122/3uix0pczt6a97mn6tnvkou5smf2jwfpq.jpg)
Ӧӧркі Чӧп. Хакасияның Ӧӧркі Чӧп президиумы 25 октябрьда теестегі чыылиин иртірген
Чағынғы сессияда республика депутаттары Хакасия правительствозының «Арығ кии» федеральнай проектті чуртасха кирерінҷе полномочиелері хоостыра чарадығ аларлар. Килістіре закон проекті Ӧӧркі Чӧп президиумының чыылиинда ӱзӱрілген.
Прай мероприятиелернің толдырығҷызы Хакасияның чир-чайаан ис-пайы паза экология министерствозы полча. Ол министерство квоталар турғызар объекттернің переченьін тӧстир, кізі хазиина ӱрегні паалир паза киизер тасталчатхан ниме-ноо квоталарын чарадыға алар. Кии пуртахталчатханын санаҷаң оңдайларға паза турғызылған квоталарға тӧстене, министерство автомобильлер, ЖКХ объекттері, транспорт инфраструктуразы паза социальнай объекттер киизер пуртах ниме-нооны позыдарын хызырарынҷа мероприятиелерні иртір турар. Хакасия пазының Ағбанда паза Харатаста киизер тасталчатхан пуртах ниме-нооны хызырарынҷа мероприятиелер планын федеральнай правительствозар, андартын чарадығ алып аларына, ысчаң полномочиелері пар полар.
– «Арығ кии» программада араласханы республикаа экология сидіксіністерін пӧгіп аларына, ӧӧнінде кии пуртахталчатханын, федеральнай ахчаны тартып алҷаң оңдай, – чоохтаан экологияҷа, чир-чайаан ис-пайынҷа паза чир-чайааннаң тузаланарынҷа комитеттің кнезі Ольга Городкова. – Килер чылның чайғызына киині пуртахтапчатханнар ілезіне сығарылар тіп пӧгінілче. Аның соонаң «Арығ кии» программаҷа мероприятиелер чарадыға алылар. Ол санда чурт-коммунальнай комплексті чахсыландырары, хара таснаң одынчатхан тураларны пасха оңдайларға киріп. Пазағы хаалағ – федеральнай проектті чуртасха кирҷең чирлерні алғыдары. Андар Ағбаннаң Харатас ла кірбезін, Ағбан-Харатас агломерациязындағы пасха даа муниципальнай пӱдістер кірзін.
Таныхтирға кирек, Ағбан паза Харатас пӱӱл 1 сентябрьдаң сығара «Экология» национальнай проекттің «Арығ кии» федеральнай проектінің араласчызы полыбысханнар. Проекттің кӧстее – киизер пуртах ниме-ноо тасталчатханын ікі хати хызырыбызары. 2024 чылға федеральнай бюджеттің проектінде Ағбанда паза Харатаста «Арығ кии» проектті чуртасха киреріне 4 миллиардча салковай кӧріл парған.
Сӧп-сап суриин пӧгерге
Региондағы операторның тоғызындағы сидіксіністер Хакасияның Ӧӧркі Чӧбінің 8 ноябрьда иртер сессиязында «правительство чазы» тузында ӱзӱрілер. Мындағ чарадығ алылған президиум чыылиинда.
Республика правительствозын ӧткін арах хайынарға паза региондағы операторны кӱстирге алнындағы Ӧӧркі Чӧп депутаттары даа хығырған полғаннар. Ол сурығ комитеттернің алғыдылған чыылығларында паза «правительство частарында» пір ле хати кӧдірілбеен. Аны ӱзӱреріне муниципальнай пӱдістернің паза региондағы операторның кізілері хығыртылҷаңнар.
Хакасия правительствозына паза «Аэросити-2000» ООО региондағы операторның устаана сидіксіністі пӧгерінҷе чӧптер пирілген. Ол чӧптернің санында – орындағы пос устаныс органнарына хатығ коммунальнай сӧп-сапты чыырына площадкаларны тимниріне субсидиялар пирері, чарадылбинчатхан орыннарда сӧп-сап тасталғанын чох идеріне ахча кӧрері паза регоператорның полызығлары ӱчӱн чуртағҷыларға турғызылған тарифтерні тӱзірерінҷе чӧптерні тимнирі.
Че «Аэросити-2000» ООО устаанаң тӱзімніг чоохтазығ пӱдіріп аларға оңдай табылбаан. Аннаңар республиканың читінҷі хығыртии парламентінің депутаттары халғанҷы сессияда «Сығарыстың паза тузаланыстың артхан-халғанынаңар» республика законынзар тӱзедіглерні кирібіcкеннер. Оларның пірсі Хакасия правительствозына регоператорның статузын чох итчең оңдайны чарадыға аларынҷа полномочиелер пирген.
Пу кирек хоостыра Ӧӧркі Чӧп кнезінің орынҷызы – экономика политиказынҷа, промышленностьча, пӱдірігҷе паза транспортча комитеттің кнезі Леонид Быков сағыс-кӧрізінең ӱлескен:
– Хакас Республиканың Регионнаң устирынҷа кіннің искіриинҷе, сентябрь айға ла региондағы операторның тоғызынаңар 700 хомай ӱндезіг санға алылған. Піс кӧрчебіс, пу сурығ республика чуртағҷыларын ам даа тың сағыссыратча. Сӧп-сап сурии социальнай сетьтерде хомай нимедеңер иң удаа пазылчатханнар санына кірче. Сурығны пӧкчең сын оңдайларны табарға кирек, олар сидікcіністерні пӧгеріне хабазарлар паза пістің республика чуртағҷыларының кирексіністеріне нандырарлар.
Сом авторни
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде