Ниик атлетиканаң айғасханы кӱс хосча
27.10.2023
Хабарлар
![Ниик атлетиканаң айғасханы кӱс хосча Ниик атлетиканаң айғасханы кӱс хосча](/upload/iblock/b22/19szu5lx8n56rcunzgbv32lwt2z03gyn.jpg)
Тренер Татьяна Сагалакова
Спорт. Татьяна Сагалакова 2013 чылдаң ниик атлетикаҷа тренер полып іcтенче
Пістің хазнада 30 октябрьда Тренер кӱні таныхталча. Ӱлӱкӱн 1999 чылда тӧстелген. Пастағнаң Россияның спорт паза хоос гимнастиказының федерациязы сыхтыр. Ӧӧн пӧгін – тренер тоғызына хайығ айландырары. Спортсменнер пӧзік чидіглерге тренерлері устаанынаң читчелер нооза. Хакасияда ӱлӱкӱнні ідӧк илееде кізі таныхтир, оларның санында чиит специалист Татьяна Сагалакова.
Татьяна Робертовна Ағбаннаң. Аның хыс фамилиязы – Муртаева, ол шор чонның хызы. Пабазы Асхыс аймаанаң полтыр, іҷезі пеер Кемеров облазынаң кӧстір. Тренер чоохтапча:
– Cӧбіреде ӱзӧлеңміс, ікі пиҷем пар. Спортнаң пірдеезі айғаспаан. 12 час толғанда, физкультура ӱгретчізі Павел Владимирович Сафронов ӧӧремні ниик атлетика спорт школазынзар ызыбысхан. Анзы, тізең, секцияда позына ирістіг полбазын тіп, мині хада алып алған. Прай ниме тикке, ноо чӧрбеске. Кізілер мағаа киртінминчелер, че кічігде хомай чӱгӱр чӧрҷеңмін. Іди дее полза, тренировкаларны иртірбеҷеңмін. Мында пастағы тренерім Ольга Борисовна Кашкарёваның хозымы улуғ. Ол палаларнаң чахсы чоох алысча. Аның устаанынаң тыып парыбысхам. Кӱс алынып алғанда, марығларда аралазарға кирек.
Хайди таныхтаан чир-cуғҷыбыс, ниик атлетика секциязынзар килген палалар пастап хысхаҷах дистанцияларға чӱгӱрчелер. Андағ оңдайнаң олғаннар чӱгӱріcке кӧнікчелер, олох туста тренерлер кічіг спортсмен соонаң хайдағ дистанцияда узын сынир тіп кӧрчелер. Спринтерлернің паза марафонецтернің мышцалары пасхалалчалар нооза. Татьяна узун дистанцияларны чӱгӱрерге чайалған. Ол чооғын узаратча:
– Ікінҷі тренерім полған Сергей Николаевич Кашкарёв. Аның холында узымны таптап, пір чарым, ӱс километрге чӱгӱр сыххам. Сергей Николаевичнең ӱр тоғынарға киліcпеен. Тренерімні спорт школазының директорына турғыс салғаннар. Маңнанминчатханнаңар, ол пістің ӧмені Иван Васильевич Корниенкоға пирібіскен. Иван Васильевичтің устаанынаң ӧӧнінде чарым марафоннарда араласчаңмын. Амға теере пу иң хынчатхан дистанциям. Он пис километрге чӱгӱрерге ідӧк кӧңніме кірче. Пір хати марафонда кӱзімні сынаам. Марығ Железногорскта ирткен. Спортсменнернің чоох пар: «Марафон отыс пизінҷі километрдең пасталча». Анзы орта полтыр. Отыс пизінҷі километр соонаң чодаларымның сиирлері тартыл сыххан. Сағынғам, сыдаспаспын. Салтарында марафонда хола медаль холға киргем, часнаң тиңнернің аразында – кӱмӱс медаль.
Татьяна Робертовна, спортсмен чіли, ниик атлетиканаң 11 чыл айғастыр. Улуғ марығларда халғанҷы класстарда ӱгренчеткенде паза студент тузында араласхан. Иң улуғ чидии – тағлығ кроссча Россия мариинда пизінҷі орынға сыхханы. Тағлығ чӱгӱріс – оой нимес дисциплина. Че ол чир-суғҷыбыcтың кӧңніне кіртір. Тренерлер абахай хысты Хызылчарзар ал чӧрҷеңнер. Анда ол чарым марафоннар чӱгӱрҷең. Че азаанаң кинеп парғанда, чиит хыс марығларда аралас полбиныбысхан. Татьяна Сагалакова – ниик атлетикаҷа Россияның спорт узына кандидат.
Чир-суғҷыбыс Хакас хазна университедін тоосхан. Ӱгредии хоостыра физкультура ӱгретчізі полча. Тренер тоғызына ол 5-ҷі курста ӱгренчеткенде кірген. Амғы туста Татьяна Робертовна 50 паланаң тоғынча. Ағаа хоза, кічіг олғаннар пар. Ӱгренҷілерінең Николай Кирилловты таныхтирға кирек. Ол 2006 чылда тӧреен. Пӱӱл январьда чиит спортсмен Сибирьнің первенствозында, 3 километр чӱгӱріп, Хакасияа хола медаль ағылған, стипль-чезте кӱмӱс призер полыбысхан. Стипль-чез – ниик атлетиканың дисциплиназы. Спортсменнер ӧнетін турғызылған ханалар азыра атығып 2 алай 3 километр чӱгӱрчелер. Чайғызын оларға ідӧк суғлығ оймах азыра сегірерге килісче. Июньда Татьяна Робертовнаның ӱгренҷізі Иркутскта ирткен Сибирь марииндох стипль-чезте ікінҷі орынға сыххан. Ізестіг спортсменнер полчалар Александр Пирожковнаң Илья Головкин. Пирожков – Хакасия первенствозының чиңісчізі, Головкин – призер. Хакас тренер таныхтапча:
– Минің кӧрізімнең, cпециалист чіли, пӱӱл ле турыстыра салтарлар кӧзітчем. Ноғадаңар? Ікі чыл тоғын салған соонда декретке парыбысхам. 2018 чылдаң прай тоғысты хатап пастирға киліскен. Декабрьда 33 час толар, аннаңар санапчам: прай ниме алнында.
Ағбандағы ниик атлетикаҷа Олимп резерві cпорт школазында істенчеткеніме поғдархапчам. Ниик атлетика манежі тимге сыхханда, истіг оңдайларда тоғынчабыс. Аның пӱдірии он чыл парған. Амды пір cаңай нинҷе-нинҷе дисциплинаҷа тренировкалар иртче. Кічіглер секцияа неделяда ӱс-тӧрт хати чӧрчелер, улуғ арах палалар – 6 хати. Тынағ кӱн – позырах.
Татьяна Робертовна спортнаң чуртапча тізе, саба полбас, неке. Хада хонғанынаң даа ол сборларда танызып алтыр. Андрей Артемьевич Сагалаков боксча Россияның спорт узы полча. Сӧбіре пазы УФСИН-да істенче. Ынағ ирепчінің ікі хыс. Софьяа – 8 час, Ксенияа – 6 час. Хызыҷахтар теелбектенерге хынчалар. Улуғ хызын тренер ідӧк ниик атлетика секциязына чӧргісче.
Амғы туста Татьяна Сагалакова ӱгренҷілерін региондағы турнирге тимнепче. Ол ноябрьда иртер. 2024 чылда Хакасия ниик атлетикаҷа Cибирьнің чемпионадын паза первенствозын удурлир. Чооғының халғанҷызында чир-суғҷыбыс теен:
– Ниик атлетиканы «Спорт королевазы» тіп адапчалар. Анзы тиктең нимес. Пу спорт кӧрімінең айғасчатханнарның хуйағы паза хазии пик поладыр. Спорт школазынзар палаларны тоғыс частығдаң алчабыс. Че ас нимес кізі, cекциязар саарбах тузында киліп, чахсы салтарлар кӧзітче. Спортсменнің хазии читсе, ол илееде тус марығларда аралас полар.
Cом Татьяна Сагалакованың архивінең
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде