Тағдағы ачыхты иптебіскенде, арт-площадка пол парған
27.10.2023
Хабарлар
Хакасияның национальнай паза территориальнай политика министрі Лев Сафьянов Таштып аал чӧбінің пазы Рустам Салимовты Аарластығ пічікнең таныхтаан
Чон ӧрінізі. Таштып аалда пу кӱннерде «Сӧбіре» арт-площадка азыл парған. Тынанҷаң наа орынны аал чӧбі пу чайғызын пӱдірерге пастаан
«Сӧбіре» ачых орындағылар «Кӧӧленіс таа» адапчатхан тағда орныхча. Аның ӱстӱнең прай аал паза ибіркі чирлер чахсы кӧрінче. Площадка тӧстир алнындох андар кізілер машиналығ киліп турҷаңнар, чииттер дее чыылысчаңнар (анзы артыс салған сӧп-сапнаң кӧрінчеткен, волонтерлар оларның соонҷа арығлаҷаңнар. – Авт.).
Амды анда тадар ибі осхас кӧрімніг беседка турғызылған. Аны табығлар тузында хайдағ-да кізілер кӧйдірерге маңнанғаннар, че ол хатабох тыхталған. Аның хыринда ідӧк чилеңместер, одырчыхтар, баннерлер, замоктар ілҷең тиріг турғыс салғаннар. Ибіре пӧзік нимес тимір сиден. Іди олаңай тағыҷахтың ӱстӱн аал ӱлгӱзі сіліг орынға айландырыбысхан. Уғаа истіг чир. Хайығ тартча ағастаң киртілік сӧбіре скульптуразы – ипчінең ирен холларында ыңааҷахты тутчалар, ортызында чӱрек оңдайынаң ӱт иділік. Пӱдірігҷі – Таштыптағы идінҷек Дмитрий Круговых. Пӱдіріге аал чӧбі чонға кирек иң артых проект мариинда 1,3 миллион салковай утып алған, аны чыл сай Хакасияның национальнай паза территориальнай политика министерствозы иртірче. Хоза 200 муңны Таштып аймааның устағ-пастаа, 200 муңны Таштып аал чӧбі, 150 муңны аалның идінҷектері пиргеннер паза 150 муңны – спонсорлар. Тиксі саназа, 2 миллион салковай хорадыл парған.
Хызыл чаламаны Хакасияның национальнай паза территориальнай политика министрі Лев Сафьянов, Ӧӧркі Чӧп депутады Василий Шулбаев, Таштып аал пазы Рустам Салимов хыплааннар. Анаң ахсағаллар Марат Боргояков паза Елена Барашкова, наа пӱдірігні ирбен от ызынаң ибіріп, кӧп чыл турарға, чонны ӧріндірерге алғааннар.
– «Сӧбіре» площадканы піс прай аал чӧбі ӧмезінең, одырып, сағын таап алғабыс, – чарытхан Рустам Хайратдинович. – Алғыстапчам республика пазын, марыға ахча пирчеткен ӱчӱн, национальнай паза территориальнай политика министерствозын, аалларыбысты сіліглирге паза чахсыландырарға оңдай пирчеткен ӱчӱн, аал чӧбінің ӧмезіне, Таштыптағы чоллар хонии пӱдіриинде араласхан ӱчӱн. Сағынчам, тынанҷаң наа орын чон кӧңніне кірер, ол хоных хон салғаннарға, сӧбіреліглерге килістіре ачых. Сӧбіре – ол кибірлерге тудынчатхан, чуртас ӧзені.
«Сӧбіре» арт-площадка
Пайрамға килген чон алнында хакас ипчілернің «Кӱн Ари» ӧмезі паза Софья Горбунова сарыннар толдырғаннар. Анаң, арт-площадка азылғанына чарыдып, Рустам Салимов наа ла тӧстелген Токояковтар сӧбірезін алғыстаан, сыйыхтар читірген. Хакас оол Сергей орыс хыс Мариянаң 2019 чылда танызып алғаннар. Хыс Таштыпсар Новосибирсктең туғаннарынзар килтір, Сергей ол туста ағаа харах тастабыстыр.
Министерство, аал чӧбі пӱдірігде араласханнарны, олаңай тоғынҷыларны, идінҷектерні алғыстас пічіктерінең таныхтааннар. Аал чуртағҷылары, тізең, Рустам Салимовха ағас хоос сыйлап пиргеннер, кистінде айланыс пас салтырлар: «Аарлығ Рустам Хайратдинович! Сірерге улуғ алғызыбыс читірчебіс, пістің аал сілии ӱчӱн, прай чӱрек-паарнаң аалға хынчатханыңар ӱчӱн, кӧп істенчеткеніңер ӱчӱн. Сірер пісті чайаачы кӧңніңернең, махачы тудынчатханынаң, пӧгіннеріңні толдырчатханынаң аптапчазар. Наа чайаачы сағыстар, кӧп кӱс, ізестіг арғыстар хыриңарда ползын тіп алғапчабыс...»
Депутат Василий Иванович Шулбаев, сӧс тутчатханда, теен:
– Халғанҷы ікі чылға Таштып аалның бюджеді пис хати ӧс парыбысхан, 100 миллионға чит парып. Иң пастап чоллар, транспорт, хорғыс чох чӧріс сурығлары пӧгілче. Аал чӧбі саринаң кӧп сағыс сығарылча, анзы уғаа чахсы. Амды аалларның тиксі тилізінҷе хазна программазында аралазарға тимненіс парча, кирек киліс парза, Таштып аймаана 1 млрд 700 млн салковай пирілеріне ізенчебіс.
Аймах чуртағҷылары ідӧк ізенчелер, устағҷыларға киртінчелер.
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
