Пайрамнығ концерт чонның кӧңнін кӧдірген
01.11.2023
Хабарлар
Хакасияның культура министрінің тоғызын толдырчатхан Светлана Окольникова Город кӱнінең алғыстапча
Культура. Свердловсктың 85 чылына чарыдылған город кӱнінде Хакасия артисттерінің концерті ирткен
Мир ачығында ирткен пайрамнығ концерт город чуртағҷыларының паза аалҷыларының кӧңніне тың кірген паза ундулбас сағыстар артысхан.
Сценада В.Г.Чаптыковтың адынаң Хакас филармониязының таланттығ артисттері сарнааннар. Оларның чарых номерлері кӧрігҷілерні саңай аптааннар. Полған на ырҷы, кӧрігҷілерге пос чӱреенің чардығын сыйлап, ӱлӱкӱнні улам чарых иткен. Мероприятиеде аймах-пасха жанрлығ композициялар истілген.
Свердловсктың адынаң Культура ӧргезі алнында декоративно-прикладной искуcство кӧзідии тоғынған.
Пайрамда аймах-пасха частығ кізілер араласханнар, че Хакасия артисттерінің пӧзік узы паза таланты оларның полғанын на аптап алған.
Хакасияның культура министрінің тоғызын толдырчатхан Светлана Окольникова Свердловск аалҷыларға уғаа чалахай город полчатханын таныхтаан: «Программаны піс ситкіп тимнеебіс, Свердловск чуртағҷыларына піс хайди чуртапчатханыбысты кӧзіт пирер ӱчӱн. Пістің улуғ сӧбірезер наа регионнар хозылғанына піс тың ӧрінчебіс. Паза 85 чыл толчатханы хоостыра Свердловск городха амыр, чахсы чуртас паза тиліс алғирым килче».
Концерттің пастағы чардығы академическай полған, аның соонаң ӱлӱкӱн аалҷылары хакастарның хайлап сарнаанын истіп алғаннар, ӱзінҷі чардығы чир-сууна хынарына чарыдылған. Тасхар чут кӱн турған полза даа, чуртағҷылар мындағ сыйыхха ӧрінгеннер. Чаа оңдайларында мындағ мероприятиелер удаа иртпинче нооза.
Хызылчар крайы губернаторының национальностьтар, религиялар паза казачество киректерінҷе пӧлиинің пастығы Сослан Тадтаев Свердловсксар пастағызын на килген, кӧп нимені ам даа кӧрбеен, че пу танығлығ кӱнде араласчатханына ол ӧрінген. Ол Сибирьдең килген пасха кізілернең хада Свердловск чуртағҷыларын сын узбектер пловынаң сыйлаан.
– Городыңар пайрамнығ чазын таныхтапчатханына піс сірернең хада ӧрінчебіс паза пу ӱлӱкӱнні улам тадылығ, татхыннығ паза чапсых идерібіс килче. Городнаң мин чахсы танысхалахпын, че кізілернің ачых-чарых сырайлары кӧрінче, анзы ӧріністіг. Чоннар кӧп, че Россия пір ле. Чиңіс чапчаң килерін паза пастарыбыс ӱстӱнде амыр тигір турыбызарын алғапчам, – теен Сослан Тадтаев.
Хакасия артисттері сыйлаан концерт программазы соонаң чуртағҷылар паза аалҷылар алыптарның ойыннарын кӧріп алғаннар. Концерт пістің илбек хазнабыс пірге полғанын паза регионнар аразындағы культура палғалыстары тыыпчатханын кӧзіткен.
Сом Свердловск город паза Свердловск аймаа устағ-пастаани
Автор :
Тимнеен Альберт Толмашов
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
