Артых полчатханнарын хатап киречілеп пирділер
01.11.2023
Хабарлар
![Артых полчатханнарын хатап киречілеп пирділер Артых полчатханнарын хатап киречілеп пирділер](/upload/iblock/9db/d0zz3pp4ofk7vs9fsvwa4m13o6yr4bzf.jpg)
«Тӧреен тілім – хакас тілім» марығның чиңісчілері (сол саринаң) Елена Пастаева паза Татьяна Кыштымова
Сыйыхтас. Н.Г.Доможаковтың адынаң национальнай библиотекада «Тӧреен тілім – хакас тілім» республикадағы пірге диктанттың чиңісчілерін чеестееннер. Анда сыйыхтығ орыннарға пазох «Хакас чирі» газетаның тоғынҷылары турыстылар
«Тӧреен тілім – хакас тілім» республикадағы пірге диктант 2018 чылдаң иртірілче. Ол Хакас тілі кӱніне чарыдылча, пӱӱл, тізең, ідӧк Ӱгретчі паза ӱгредіг кӧстегҷізі чылына. Диктант араласчыларына филология наукаларының кандидады Лариса Чебодаеваның «Чӱректерібіс чабых нізе» чооғының ӱзігі хығырылған. Аны ӱртӱн айының 5-ҷі кӱнінде республикада 315 кізі пасхан, 178 кізі – Н.Г.Доможаковтың адынаң национальнай библиотеканың сайтында. Дипломнар паза кубоктар иң артыхтарына ла пирілген. Артыхтары, тізең, «Хакас чирі» газета редакциязының тоғынҷылары полыбысханнар! Пастағы орынны ӱгредіг паза наука пӧлиинің хабарҷызы Татьяна Кыштымова алып алған, ікінҷізін – корректор Елена Пастаева.
Татьяна Святославовна диктант чиңісчізі пастағызын на полбады. 2019 чылда ол, пу чӧрімде аралазып, ідӧк иң артых полыбысхан.
– Диктант пазар чӧрімде пӱӱл ікінҷізін араластым, пастағы орынны ідӧк ікінҷі хати алдым. Мин позым позыма тӧреен тілімні чахсы пілчеткенімні киречілеп алдым. Анзы мағаа поғдархастығ паза ӧріністіг. Мындағ чӧрімні иртірчеткен организацияларға прайзына алғызым читірчем, – таныхтаан чооғында чиңісчі.
Елена Алексеевна, тізең, диктант пазарында пастағызын на араласты. Пу пастағы сыйыхтығ орын аның халғанҷызы полбазын.
Ирткен чылда «Тӧреен тілім – хакас тілім» республикадағы пірге диктанттың сыйыхтығ орыннарын ідӧк пістің газета тоғынҷылары холға киргеннер. Пастағы орында Алёна Тодозакова пол парған, ікінҷі орында – газетабыстың ӧӧн редактор орынҷызы Наталья Сюптерекова паза ӱзінҷі орында – Алёна Тодозакованың хызы Диана.
Пӱӱлгі диктантта ӱзінҷі орында Софья Куюкова пол парған. Ол Таштып аймаандағы Пыдырах аалдаң, 8-ҷі класста ӱгренче. Хызыҷах сыйых аларға Ағбанзар кил полбаан.
Ӱгренҷілер аразында Ирина Саражакова чиңісчі полыбысхан, cтуденттер аразында – Дарья Чепчигашева, наука тоғынҷылары аразында – Роман Киргинеков, «Элегантный возраст» номинацияда – Валентина Карамашева. Ідӧк иң кічіг араласчаа сыйых пирілген. Аны Асхыс аймаандағы Оңхак аалның кічіг чуртағҷызы Мария Кутукова алған. Хызыҷахха 10 час.
Ідӧк муниципалитеттерде артых полыбысхан чуртағҷыларны таныхтааннар. Олар – Нина Чебочакова (Асхыс аймаа), Эльза Чебодаева (Пии аймаа), Кристина Сульбирекова (Таштып аймаа), Маргарита Топоева (Ағбан город), Роза Кирилюк (Алтай аймаа), Светлана Килижекова (Ағбан пилтірі аймаа), Любовь Спирина (Шира аймаа).
Пу чиңіс тутханнарның кӧбізі ӱгретчі полып тоғынча алай библиотекада істенче. Асхыс аймааның чиңісчізі Нина Егоровна Чебочакова Асхыстағы лицей-интернатта 20 чыл азыра хакас тілі паза литература ӱгретчізі полған. Ӱр ниместең ол интернатта воспитатель полыбысхан. Аалдаң килген олғаннарнаң чоох алызарға хынчам тіпче ол.
– Ӱс чулдағыларнаң, ылырсыдағыларнаң, кызластағыларнаң, чоғархы киндірлігдегілернең чоохтазарға чапсых. Олар ибде мал-хус аразында хайынчалар, тӧреен тілнең арығ чоохтасчалар. Андағларнаң хынығ. Пірге диктантта, тізең, пастағызын на аралазарға килісті. Тоғыстаң ӧнетін сурынып, библиотеказар парғам. Пазағы чылда Ағбанзар килер сағыс пар. Н.Г.Доможаковтың адынаң библиотекада диктант пас кӧрерім килче, – чоохтапча Нина Егоровна.
Пии аймаандағы Улуғ Нонып аалдағылар пірге диктантты пазарға орындағы библиотеказар чыылысханнар. Чӧрім араласчылары аразында хакас тілі ӱгретчізі Эльза Чебодаева полған. Пии аймаанда ол артых полыбысхан.
– Мин диктант пазарында ідӧк пастағызын араластым. Чоохтың ӱзігі піске аудио пастыра хығырылған, анзынаң кӧмес аар пілдірген. Ӱгретчі хығырған полза, ниик поларҷых сағынчам. Мағаа, хакас тілі ӱгретчізіне, сыйыхтығ орын алып алғаны ӧріністіг. Позымның пілістерімні тыыдып алдым, – ӧрінізін чазырбинча Эльза Алексеевна.
«Тӧреен тілім – хакас тілім» пірге диктанттың тӧстегҷілері Хакасияның национальнай паза территориальнай политика, культура министерстволары, «Хакас чирі» газета редакциязы паза Н.Г.Доможаковтың адынаң национальнай библиотека полчалар. «Хакас чирі» газетаның ӧӧн редакторы Радион Сунчугашев, cыйыхтығ орыннарға турысханнарны паза номинациялар чиңісчілерін алғыстап, алынҷа сыйыхтар читірген: 2024 чылның чарым чылына газетаа пазыныс, «Ноға-ноғаҷахтар» журнал паза «90 чыл чоннаң хада» кинде.
Сом Албина Чистогашевани
Автор :
Оксана Сунчугашева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде