Матырларыбысха сабланыс хаҷанға даа
01.11.2023
Хабарлар
Чааҷылар паза юнармеецтер «Кизек чаалазығларда чуртастарын пир салған Хакасияның оолларына» хумартхы тас тӧзінзер сабаллығ гирляндалар апарчалар
Хумартхылас. Ирткен субботада республиканың прай муниципальнай пӱдістерінде кизек чаалазығларда паза Украинада иртірілчеткен ӧнетін чаа операциязында чуртастарын пир салған чааҷыларны хумартхылааннар
Хайди пістің газетада искірілген, кизек чаалазығларда паза СВО-да чуртастарын пир салған чааҷыларыбысты хумартхылир кӱн прай Хакасияда иртірілер. Іди ирткен субботада Ағбанның тимір чол вокзалы алнындағы ачыхта «Кизек чаалазығларда чуртастарын пир салған Хакасияның оолларына» хумартхы тас хыринда траур митингі ирткен, хумартхы тассар чахайахтар салылған.
Мероприятиеде республика правительствозының, Ӧӧркі Чӧбінің, Ағбан город устағ-пастааның, ветераннар пірігістерінің, «Боевое братство» пірігістің региондағы пӧлиинің кізілері, юнармеецтер паза олаңай чуртағҷылар араласханнар. Ідӧк чаалазығларда чат халған чааҷыларның паба-іҷелерін, туған-чағыннарын, тигірибде молитвалар хығырған соонаң, автобустығ пу орынзар ағылғаннар. Мероприятиеде ідӧк ибзер отпускка алай имненерге килген ӧнетін чаа операциязы араласчылары полғаннар.
Хайди искірген мероприятиені апарчатхан тоғынҷы, пістің чааҷыларыбыс Кореяда, Вьетнамда, Египетте, Эфиопияда, Венгрияда, Чехословакияда, Даманскай олтырыхта, Афганистанда, Лаоста, Алжирде, Камбоджада, Анголада, Мозамбикте кизек чаалазығларда араласханнар. Амды Украинада иртірілчеткен ӧнетін чаа операциязында пістің чааҷылар махачы чааласчалар.
«Час ханат» эстрада студиязының олғаннары патриот кибелістерін хығырғаннар, «С чего начинается Родина» сарынны толдырғаннар. Анаң Россияның паза Хакасияның гимннері толдырылған соонда траур митингі пасталған. Чоох тутхан Хакасия пазының тоғызын толдырчатхан Юрий Курлаев:
– Кизек чаалазығларда чуртастарын пир салған чааҷыларның аттарын піске пу стела сағысха кирер оңдай пирче. Амды ағаа хоза піс ӧнетін чаа операциязында чуртастарын пир салған чааҷыларны, чеестеп, хумартхылапчабыс. Пӱӱл мындағ мероприятиелер республиканың прай город-аймахтарында иртірілчелер. Мының алнында мындағ митинг Ағбанда ла иртірілҷең. Пеер чат халған чааҷыларның туған-чағыннары прай муниципалитеттердең килҷеңнер. Ам ӧнетін чаа операциязында чуртастарын пир салған чааҷыларның аттары орамаларға, олар ӱгренген школаларға, пасха даа ӱгредіг заведениелеріне пирілче. Оларны піс аарлапчабыс, ам Чааҷылар сабланызы аллея пӱдірер пӧгін тудылча. Хакасия правительствозы адынаң СВО-даң айланмаан чааҷыларның паба-іҷелеріне, ӧкіс халған ипчілеріне, туған-чағыннарына хомзынызыбысты читірчем. Амғы пістің пӧгінібіс – чуртазын пир салған полған на матырны хаҷан даа ундутпасха. Олар пістің амғы чуртазыбыс ӱчӱн постарының чуртастарын пир салғаннар. Пістің оолларыбысха хумартхылас паза сабланыс хаҷанға даа.
Чечнядағы чаалазығлар араласчызы, милицияның отставкадағы полковнигі, Ағбан город пазының орынҷызы Владимир Крафт, чалыннығ чаалазығлар ирткен чааҷылар алнында паза чат халған матырларның туған-чағыннары алнында пазын тӧбін тӱзіріп, ӧтіг чоох тутхан:
– Пӱӱнгі танығлығ кӱнде піс мемориал алнында чыылызып алдыбыс, ол піске хумартхылас, чобағ паза чааҷыларға алғыстас тании полча. Оларны хаҷан даа уңдутпаспыс, оларның аттарын полар тӧллерге хайраллирбыс. Ачырғастығ, чідіріглернең хада пісті чир-суғҷыларыбыс ӱчӱн поғдархас піріктірче. Оларның полғаны ла махачы чааласхан. Ада чир-суубысха хынып, олар аны арачылирға сыбыра тимде полғаннар. Ізіг точкаларны ирткен, чааны кӧрген прай кізілерге алғыс паза улуғ аарлас сӧстерін читірчем. Постарының оолларын, харындастарын, хада хонғаннарын, пабаларын чідір салғаннар алнында пазым тӧбін тӱзірчем.
Піс ам даа оой нимес тустарда чуртапчабыс. Кӧбізінің туғаннары андалар, СВО-далар. Аннаң піс кӱннің сай сағыссыраснаң паза ізеніснең сағбалар сағыпчабыс. Киевтегі нацисттер режимі пістің хазнаа, чоныбысха хорғыс ағылып пастабысханда, Донбасстағы орыс чонны иреелеп сыхханда, уғаа оой нимес чарадығ алылған. Ӧнетін чаа операциязын иртірерге олар постары пісті кӱстеп алғаннар. Олар Россияа пасха оңдай артыспааннар.
Амды пістің оолларыбыс приказтар паза чааҷы пӧгіннерін толдырчалар. Олар тиксі чиңіc тудар ӱчӱн, Чир-суубыс ӱчӱн, прайзыбыс ӱчӱн, таңдағы чуртас ӱчӱн постарының чуртастарына айабинчалар. Алғыстығ хумартхылас чарып турзын, пістің хынызыбыс оларның аттарын чарыт турзын...
Митингте ідӧк чоох тутхан Ағбандағы епархияның абызы Александр Ильин. Аның чооғынаң, 1990 чыллардағы чиит тӧлні «чідір салған тӧл» тіп санаҷаңнар. Че, хайди амғы чуртас кӧзітче, ол тайма сағыс полған. Ол тустардағы тӧллер, Чир-суубысты арачылап, махачы чааласчалар, олар ідӧк Россияның турыстыра ооллары полчалар...
Ӧнетін чаа операциязында чуртастарын пир салған чааҷыларның туғаннары, оларның сомнарын тудынып, хомзынчалар
Чаалазығларда чуртастарын пир салған матырларны сағысха киріп, пір минута сым турары чарлалған соонда автоматтығ чааҷылар, тигірзер атып, салют иткеннер. «Встанем!» сарын толдырылған, парад кип-азахтығ чааҷылар паза юнармеецтер хумартхы тас тӧзінзер сабаллығ гирляндалар салғаннар, чыылысхан чон, андар соон сӱрістіре пастырып, чахайахтар салған.
Сомнар Альбина Чистогашевани
Автор :
Николай Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
