«Искусство хараазы-2023» чӧрім алғым иртер
01.11.2023
Хабарлар
![«Искусство хараазы-2023» чӧрім алғым иртер «Искусство хараазы-2023» чӧрім алғым иртер](/upload/iblock/738/stxug5dwglpwj6lbfwulm0vd6yc1s0sz.jpg)
Культура. Пӱӱл Тиксі Россияның чӧрімі Чоннар пірікчеткен кӱнге чарыдылча, аннаңар ол «Россия піріктірче» хыйғылығ полар. Культура тоғынҷылары чапсых паза пай программа тимнепчелер
«Читіген» театрда
«Читіген» драма паза чон кӧглері театры «Искусство хараазы-2023» акцияны 3 ноябрьда 18.00 – 21.00 частарда иртірер. Анда мындағ ачыхтар тоғынар:
«Пайзаң Иб» ачых
– хоосчы Александр Котожековтың хоостарының кӧзідии;
– сомға национальнай кип-азахтығ суурынҷаң орын;
– хакас чонның ойыннары (хазых, тобит).
Театр фойезі
– «Читіген» театрның 35 чылына чарыдылған сомнар кӧзідии;
– театр бутафориязынҷа мастер-класс, иртірче Надежда Амзаракова;
– театр гримінҷе мастер-класс, иртірче Наталья Жукова.
Кӧрігҷілер залы
19.00 часта – А.Сагатаевтің «Нестрашная история или Маленький Чилбіген» (6+) ойыны, режиссёр Каскар Чаптыков.
Хакасияның ӧӧн библиотеказында
Н.Г.Доможаковтың адынаң Национальнай библиотека ідӧк «Искусство хараазы-2023» Тиксі Россия синіндегі чӧрімге хозылча.
18.00 – 22.00 частарда искусствоны тирең піліп аларға сағынчатхан чуртағҷыларны чапсых ойыннар, квизтер, кӧг паза театр ӧмелерінең тоғазығлар сағыпча.
Ӱлӱкӱннің программазы алғым полар. Аалҷылар Таня Волошанинанаң хада кибелістер хығырарлар, ас-тамах тимнеҷең «кӱресте» аралазарлар, «Устарның кварталында» пос холынаң чапсых ниме-ноолар чайирлар, аймах чоннар теелбектерінің мастер-клазында кӧңнілерін кӧдірерлер. Ағаа хоза, чуртағҷылар Булгаковтың «50» номерліг «изі чох» чуртынзар кірерлер паза «Хоррор-квизте» аралазарлар.
Библиотекадағы чӧрімде сомға суурынҷаң орыннар, аймах кӧзідіглер, ойыннар поларох. Полған на кізі позының кӧңніне килістіре ачых таап алар. Акция библиотеканың прай читі хадылында иртер.
Республиканың олған библиотеказында
Библиотека тоғынҷылары постарының хығырығҷыларына «Чайаачының ханаттарында» ӱгредіг-ӱтертістіг программа тимнепчелер. Ол 3 ноябрьда 14.00 – 17.00 частарда иртер. Олған-узах паза саарбахтар Россияда чуртапчатхан аймах чоннарның культура кибірлерінең танызып аларлар.
Кічіг хығырығҷылар мастер-класста аралазып, чаҷыннаң кӧклӧ идерлер, ідӧк орыс, хакас, тува, татар паза чечен чоннарның ас-тамаан тимнирлер. Ағаа хоза, олғаннар «Хурхеваоба», «Падающая палка», «Хромая курица» ӱтертчең ойыннарда аралазарлар.
«Чоннар культуразы ис-пайы» кинделер кӧзідиине Хакасияда чуртапчатхан чоннар литературазы сығарылар. Анда оларның пай культураларынаңар, кибір-чозахтарынаңар хығырып аларға чарир. Акцияның аалҷылары тӧреен чир-суғдаңар пілістерін кӧзідіп, ойыннар ойнирлар. Олған библиотеказында сомға суурынҷаң орыннар поларох.
Республиканың ӧӧн музейінде
Хакасияның Л.Р.Кызласовтың адынаң чир-суғ ӱгренҷең музейінде «Искусство хараазы-2023» чӧрім 4 ноябрьда 17.30 – 22.00 частарда полар. Ол хараада Национальнай музейде ӱр сахтаан Музей паркы азылар!
Ідӧк программада «Дары родной земли» устар ярмарказы полар, «Обратная сторона. Уникальное путешествие в удивительный мир С3» хайхастығ зона тоғынар. 18.00 часта «Sage DIDGERIDOO» чайаачы иир пасталар. Анда Хакас филармониязының артисттері аралазар.
20.00 часта «Хакасияның пурунғы искусствозы» экспозицияҷа экскурсия иртер.
18.00 – 22.00 частарда «Фуршетное меню» мастер-класс полар, олох туста Н.Ф.Катановтың адынаң Хакас хазна университеді студенттерінің наука паза археология-этнография кружогының «Хакас чазыларының чааҷылары» кӧзідии тоғынар.
20.30 – 22.00 частарда «Коробка» корея кӧг драмазын кӧріп аларға чарир, режиссёр – Ян Джон-ун. 19.00 – 19.50 частарда «Искусство жить» мода кӧзідии полар.
20.00 – 22.00 частарда – DarkLights Deejays бал: скретчинг паза битбокс искусствозы, кӧглер, теелбектер.
18.00 – 22.00 частарда Минсуғдағы культура паза искусство колледжі аймах мастер-класстар иртірер.
Ідӧк аалҷылар пасха даа чапсых мастер-класстарда паза экскурсияларда аралазарлар. «Искусство хараазында» музейде кӧрҷең ниме улам кӧп полар. Кӧзідімге, СВО-да араласчатхан чааҷыларға кирек ниме-ноо тимнирі. Ол мастер-класс «Прай ниме Чиңіске» адалча. Татьяна Корнева «Кӱскӱзін дее хандыра» мастер-класс апарар.
19.00 – 20.30 частарда Расул Гамзатовтың пайрамнығ 100 чазына чарыдылған чайаачы иир иртер.
«Искусство хараазы-2023» акция 22.00 часта «Chili» арт-группаның ӱтертіcтіг кӧзідиинең тоозылар.
Музейдегі чӧрімнің аалҷыларына билеттер паазы: 250 салковай – улуғларға; 100 салковай – ӱгренҷілерге, студенттерге, тынағдағы кізілерге; тикке – І паза ІІ группалығ кинектерге, 6 час толдырғалах олғаннарға, ӧкіс палаларға (опекуннаң хада), кинек палаларға (ӱдес чӧрчеткен кізілернең хада), Россия армиязында срочнай служба иртчеткен чааҷыларға.
Сом «Хакас чирі» газета архивінең
Автор :
Тимнеен Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде