«Кӱнніг Хакасия»
03.11.2023
Хабарлар
Кӧзідіг тузында
Кӧзідіг. Л.Р.Кызласовтың адынаң Хакас национальнай чир-суғ ӱгренҷең музейде пістің республикабыстың сіліг орыннары суурылған сомнар кӧзідии азылған
Іди адалча пу кӧзідіг. Сомнарны сығарған «Резолют» креативнай агентство. Пу ынағ ӧмеде нинҷе-де ле кізі тоғынча. Олар – продюсер Игорь Саннэ, сценарист Елена Саннэ, блогер Александра Солнечная, видеооператор Александр Иванов, сомҷы Елена Чучумакова паза оператор Валерий Козыренко.
Кӧзідігде – Хакас чирінің сіліг орыннары суурылған чӱс азыра ӧңніг сом. Оларда Оғлах тағларны, Хуртуйах тасты, Ивановскай кӧллерні паза пасха даа чапсых, хайхастығ чирлерні кӧріп аларға чарир.
Постарының тоғыстарынаңар чоохтап пиргеннер Елена Саннэ, Александра Солнечная паза Елена Чучумакова.
– Піс пастап тынағ кӱннерінде Хакасияҷа пірее хынығ чирлерзер пар килчеткебіс, – чоохтап пастаан Елена Саннэ. – Анаң ол чирлердеңер таныстарға, нанҷыларға чоохтап, сағын салғабыс – пістің орындағы чон, мында чуртап, пос чирінің сілиинеңер, аның тархынынаңар чахсы пілбинче. Ыраххыдаң килген туристтер нинҷе-де кӱнге прай даа Хакасияда пол парыбысчалар, че пістің чуртағҷылар, соона ла салдырып, кӧп ниме кӧрбинчелер, аннаңар піс кӧбізін пістің кізілерні, тынағ кӱннерінде ибде одырбин, пірее чапсых чирлерзер пар килерге кӧӧктірчебіс.
Анаң Еленаа пасха хыстар хозылғаннар, прайзы пос кӧңнін читірген. Пастағызын олар постарының тоғыстарын сайтха сығар турғаннар. Кізілер чахсы ӱндескеннер. Іди ӧткін ӧме «Кӱнніг Хакасия» проект сағынып алған. Анда тынағ кӱннеріндегі туризм чорыхтарынаңар искіргеннер. Іди тӧрт чыл аразына 35 кӧзідіг сығарғаннар. Гранттар мариинда аралазып, ахча утып алчалар. Сценарийлерні Елена Саннэ пасча. Аның хада хонғаны Игорь Саннэ, продюсер полып, ахча саринаң полызығ таапча. Кӧзідігде, ӧӧнінде, Елена Чучумакованың сомнары. Ол, тайға чирлерінде чорыхчыларнаң хада чӧріп, абаларға даа учурап парчатханын чоохтаан.
Анаң, прай нимені сайтха сығарып, интернет пастыра чоохтазығ апарча блогер Александра Солнечная.
Пӱӱл олар федеральнай грант утып алғаннар. Аның оңдайы хоостыра алты ролик сығарарға кирек, ідӧк сомнар марығларын паза кӧзідіглерін иртірерге. Сағам сомнар марии онлайн иртче. Анда олаңай даа кізілер аралас поларлар. Олар Хакас чирін паза кізілерні суурған сомнарны сайтха сығарзыннар. Сомнар телефоннар даа пастыра суурылған ползыннар.
Олар ідӧк грант ахчазына Хакасиядаңар хысхаҷах кинолар суурчалар, Абаза городтаңар паза Чалбарт хайадаңар кинолар парох. Кӧбізін чииттерге паза олғаннарға кӧрілген кинолар. Оларны интернетте прай таап аларға чарир. Киноларның тузы 10 на минутаҷа.
Чайаачы кӧңніліг устар кізілерге оой чидіп алар чирлердеңер чоохтапчалар, анда кічіг палалар даа, улуғ частығлар даа аралас поларлар.
«Піс «Тынағ кӱннеріндегі чорыхтар» чӧрімні чуртасха кирчебіс, – тееннер хыстар. – Аннаңар прайзын хығырчабыс – одырбаңар ибде, пос чирінің cіліг орыннарынҷа чӧріңер, сомнарға суурыңар паза кӧңніңернең ӱлезіңер!»
Сом Дмитрий Сунчугашевти
Автор :
Илья Топоев
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде