«Россия» чоннар аразындағы кöзідіг азылды
04.11.2023
Хабарлар
Кöзідіг Чон пірікчеткен кӱнде пасталчатханнаңар пасча Хакасия пазы Валентин Коновалов.
- Россия чуртағӌылары хаӌан даа пірге, сынға тудынчатханынаң пасхалалғаннар. Хада-пірге, чöптіг тудынзабыс, прай чоннарны улуғлазабыс, тиксі чонның кирексіністерін алынӌа кізілернинең пöзік турғыссабыс, піске хайдағ даа сынағлар хорғыстығ нимес, - таныхтапча ол.
Россияның прай регионнары, ол санда Хакасия, 20 чылның аразындағы пос чидіглерін Москвада кöртісчелер. Кöзідігнің полған на араласчызы илбек, хыри-пазы чох хазнабыстың аймах-пасха чоннарның тархынынаң, кибірлерінең паза культура ис-пайынаң таныс полар, программаның тоғыс паза ӱтертіс чардығында аралас полар.
- Пістің республиканың кöзідіг орнында ікі дее бионическай ибіӌек турғызылған. Олар пістің кічіг чир-суубыстың пурунғы паза амғы тиліс тустарын, ирткен паза амғы тустарның палғалыстарын таныхтапчалар. Ибіӌектернің пірсінде хакас хамның ухаанӌыластарын піліп аларға чарир, ікінӌізінде — республиканың тархын, культура ис-пайынаңар паза чапсых орыннарынаңар, - чарытча Валентин Олегович.
Амғы технологиялар, ол санда тузалығ паза хынығ искірігліг сенсор панельлері, Хакасияның тархынынаң паза культуразынаң сала тирең танызарға полысчалар.
- Аарлығ арғыстар! Кічіг хырлас айының 16-ӌы кӱнінде Москвада ВДНХ-да Сибирьдегі федеральнай округының кӱнінде пістің республикабыснаң - пис кӱс чирінең - танызарға хығырчам, ол кӱн Хакасияның туризм оңдайларынаң таныстырарбыс, ідöк кічіг хырлас айының 21-ӌi кӱнінде - кöзідігде пістің регион кӱні иртеріне, - хосча республика пазы.
Олох кӱн Валентин Коновалов Москвадағы чир-суғӌыларыбыснаң тоғасхан. Чир-суғӌыларыбыс “Россия” кöзідіг-форумның тоғызында öткін араласчалар, аалӌыларнаң чоохтасчалар паза республикабыстаңар искірігнең ӱлесчелер. Валентин Коновалов öткін чир-суғӌыларыбысха нандырығлағ хайығ паза полызығ ӱчӱн алғызын читірген паза сурығларына нандырған.
Сомнар Валентин Коноваловтың ВКонтакте страницазынаң
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде