Виктор Пермяков ӱрееніне чобалчабыс
07.11.2023
Хабарлар
“Хакас чирі” газета редакциязының öмезі Хакасияның журналисттер пірігізінің араласчызы, “Земля таштыпская” газетаның редакторы полған Виктор Александрович Пермяковтың ӱреенінең чобалчатханын туған-чағыннарына паза хада тоғынған арғыстарына читірче.
Виктор Пермяков кічіг хырлас айының 5-ӌi кӱнінде ах чарыхтаң парыбысхан. Аны республикада паза пасха регионнарда öткін кізіні чіли пілгеннер.
Виктор Александрович 1949 чылда Ростов облазында Малая станицада тöреен. 1950 чылда аның іӌе-пабазы Абаза городсар туған-чағыннарынзар кöсче.
Школа соонаң Виктор Кемеровтағы физическай культура техникумынзар ӱгренерге кірче. Тöреен школазынзар айланып, ӱгретчі тоғызына сыхча. Армия службазына хығыртылча. Анда ол 42 кізідең спорт ротазын тöстепче. Старшина атха читче. 1982 чылда
КПСС-тың Таштыптағы райкомының пастағы хачызы Афанасий Иванович Кыжинаев Пермяковты пастап пропаганда паза агитация пöлиинзер инструктор тоғызына, анаң аймахтың Культура туразынзар устағӌы орнына турғысча. Олох туста Виктор Александрович аймах газетазынзар хабарлар пазыбыс турӌаң. 1989 чылда ол КПРФ ЦК-зының социальнай устағ институдында “политолог-журналист” специальность алча. Телевидениеде паза печать сығарыстарында істенген.
Хайдағ-да туста В.А.Пермяков Центрально-Азиатский банк пöлиинің устағӌы орынӌызы полған. 1994 чылда Таштыпта казначейство тöстеліп пастаан, Виктор Александрович аның пастағы устағӌызына турғызылған. Ол кирекке Новосибирсктегі хазна устанызы академиязында “Финанстар паза бюджет» специальностьха öнетін ӱгренген. 2015 чылдаң сығара пӱӱл от айына теере “Земля таштыпская” газета редакциязынаң устаан.
Виктор Александрович ачых-чарых, хаӌан даа чалахай, кізее паарсах паза öткін полған. Хакасияның журналисттер пірігізінде аның полызиинаң республикадағы СМИ öмелері удур-тöдір танысханнар паза ынағласханнар.
Таңда, кічіг хырлас айының 8-ӌi кӱнінде, 11.00 часта Таштып аймааның культура туразында В.А.Пермяковты тӱгенӌi чолына ӱдезерлер.
Сом “Земля таштыпская” газета редакциязының ВКонтакте социальнай сетьтегі страницазынаң
Автор :
“Хакас чирі” республика газетазының редакция öмезі
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде