Полған на хорадығ сыныхталча
10.11.2023
Хабарлар
Валентин Коновалов Хакасия пазының алғыстазын Александр Кыстояковха читірген
Пайрам. 100 чыл мының алнында Россияда финанстар министерствозында сыныхтағ-ревизия органнары тӧстелген
Хакасияның сыныхтағ-ревизия органнарының тоғынҷылары пу пайрамны таныхтирға Л.Р.Кызласовтың адынаң Хакас национальнай чир-суғ ӱгренҷең музейде чыылысханнар. Оларны алғыстирға кил парғаннар Хакасия пазы Валентин Коновалов, Ӧӧркі Чӧп кнезі Сергей Сокол, регионҷа федеральнай казначейство устанызының устағҷызы Рамиль Аввязов, республиканың финанстар министрі тоғызын толдырчатхан Игорь Тугужеков паза пасхазы.
Россияның финанстар министерствозының сыныхтағ-ревизия аппарадының тархыны 1923 чылның чарыс айының 23-ҷі кӱнінең пасталча. Ол кӱн СССР правительствозы Чон финанстар комиссариадында андағ ӱлгӱ органын тӧстирдеңер чарадығ алыбысхан. Аның алнында предприятиелерде паза учреждениелерде ревизия иртірерге пӧгін турғызылған. Тиксі алза, наа органның тоғызына кірген: тиксі хазна бюджедінің парыстар паза хорадығлар пічіктерін сыныхтиры, прай нандырығлығ кассаларның паза учреждениелернің ахча паза ис-пай айланызын хайығда тудары. Правительство турғысхан пӧгіннернің чуртасха кирілчеткенінең, тізең, тоғысчы-кресен инспекциязы айғасхан.
Пӱӱнгі кӱнде Хакасияда сыныхтағ-ревизия тоғыстарынаң айғасчалар финанстар министерствозындағы сыныхтағ-право департаменті, республикаҷа федеральнай казначейство устанызы паза пістің регионның сыныхтағ-сананыс палатазы. Хакасияның устағҷылары паза ӧӧн министерство-ведомство устағҷылары, сыныхтағҷыларның тоғыстарына пӧзік паалағ пиріп, алғыс сӧстерінең чоох тутханнар.
– 100 чыл аразына Россияның сыныхтағ-ревизия органнары илееде алыс парғаннар, че сірер хаҷан даа туснаң тиңнең тиңе хаалаазар паза наа технологияларнаң тоғыстарыңда маңнаныстығ тузаланғазар. Сірернің хазна программаларын паза национальнай проекттерні тирең, ситкіп ӱзӱрчеткеніңер піске чыл сай оларны уламох чуртасха чахсы кирерге полысча, – таныхтаан Хакасия пазы Валентин Коновалов. – Арғыстар, Россияның сыныхтағ-ревизия органнары тӧстелгенінің 100 чылынаң прай чӱреемнең алғыстапчам! Сірерге пик хазых, часка паза прай чахсы киректерде талаан алғапчам.
Валентин Коновалов сыныхтағҷыларға хазна сыйыхтарын читірген. Хакасияның иң пӧзік сыйиина – «Хакасияа чахсы киректері ӱчӱн» орденге Рамиль Аввязов турысхан. Нинҷе-де тоғынҷы Хакасияның Аарластығ пічиин паза республика пазының алғыстазын алған, оларның санында полған регионҷа федеральнай казначейство устанызының сыныхтағ-ревизия пӧлиинің улуғ сыныхтағҷы-ревизоры Александр Кыстояков.
Ідӧк Россияның сыныхтағ-ревизия органнарының 100 чыллығ пайрамына ӧнетін медальлар сығарылғаннар. Олар Рамиль Аввязовнаң Игорь Тугужековха читірілгеннер. Алынҷа хайығ ветераннарға айландырылған. Хакасияның сыныхтағ-ревизия органнарын тӧстиріне паза тилідеріне иткен хозымнары, тіспен тоғыстары паза улуғ опыттарынаң ӱлескен ӱчӱн оларға алғыс сӧстері паза сыйыхтар читірілген. Хакасияның сыныхтағ-ревизия органнарынаң хада-пірге тоғыс апарчатхан министерство-ведомстволар паза право хайраллаҷаң органнар ідӧк алынҷа алғыстастарға турысханнар. Кӧзідімге, Хакасияның финанстар министерствозының ӧӧн чӧпчізі Юлия Чугунекова республика прокуроры алғыстаан тоғынҷылар санында полған. Ол министерствоның сыныхтағ-право департаментіндегі сыныхтағ-ревизия пӧлиинде тоғынча.
Таныхтирға кирек, Хакасияҷа федеральнай казначейство устанызы пу пайрамнығ кӱнге чарыдылған кинде сығарыбысхан. Пайрам араласчылары аннаң ідӧк танысханнар. Киндеде сыныхтағ-ревизия органнарының тархынынаңар пазылча, чарыдығлар пирілче, тоғынҷылар паза ветераннар тоғыстарынаңар чоохтапчалар.
Сом Альбина Чистогашевани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
