Олар прайзы – пістің матырларыбыс
10.11.2023
Хабарлар
Орденнең паза медальнаң сыйыхтатхан Дмитрий Мамышев сӧбірезінең хада
Сыйыхтас. Хакасияның чааҷы комиссариадында, чардыхти мобилизацияҷа хығыртылып, ӧнетін чаа операциязында араласхан чааҷыларға хазна паза Россияның арачыланыс министерствозының ведомство сыйыхтары пайрамни читірілгеннер
Мероприятие пасталар алнында Хакасияның чааҷы комиссары, подполковник Николай Видяйкин паза чааҷыларның командирі (аның ады-солазы адалбаан, ол ідӧк подполковник званиеліг, хакас оол), чааҷыларны сомға суурчатса, сырайларын азарға ба алай аспасха ба тіп чӧптескеннер. Анаң командир сырайларын чазырбасха чарадығ алыбысхан. Залда чааҷыларның іҷелері, ипчілері, палалары, ідӧк юнармеецтер полғаннар.
Чааҷыларзар Хакасияның мобилизация тоғызынҷа паза хазна чазыттарын арачылирынҷа хазна комитедінің кнезі Виктор Бармин хысха чоохнаң айланған:
– Сірер піске прайзыңар – матырзар! Улам Хакасияа сірер – ікі хати матырзар! Сірер, республикадаң ӧнетін чаа операциязына парып, пістің чирібісті арачылап, махачы чааласчазар. Амды кем, фронтсар парбин, мында халар, оларға амыр, чахсы чуртас алғапчам. Кем мының соонда фронтсар пазох айланар, оларға оң ползын, ибзер чиңіcнең табырах айланзыннар.
Чааҷы комиссары Николай Видяйкин чааҷыларзар алғыc cӧстерінең айланған:
– Улуғ алғыс прайзыңарға! Сірер, ӧнетін чаа операциязында аралазып, махачы чаалазып, Чир-суубысты арачылапчазар. Чааҷы пӧгіннерін толдырып, уғаа турыстыра тудынчазар. Ідӧк улуғ алғыс сӧстерін читірчем чааҷыларның туғаннарына, іҷелеріне, ипчілеріне мында оларға ізестіг тыл тутчатхан ӱчӱн. Прайзыңар ибзер, амыр чуртассар хазых айланыңар!
Чааҷыларның командирі сыйыхтар алар чааҷыларның, ады-фамилияларын адабин, чаалазығда тузаланылчатхан солаларын на адаан. Олар прайзы хакас ооллар, пір ле орыс полған. Чааҷылар фронтсар айланарлар, аннаңар оларны толдыразынаң адирға чарадылбинча. Піреезі отпускка килген, пасхазы, палығладып, госпитальда имненген соонаң фронтсар пазох парар. Че Дмитрий Мамышевтің ады-солазын адирға чарир – палығлатхан соонаң аны СВО-зар паза ыспасха чарадығ алыл партыр. Аның солазы – «Красавчик». Сыйыхтасты аннаң пастааннар.
Россия президентінің пӱӱл 9 октябрьда алылған Указынаң Дмитрий Васильевич Мамышев Мужество орденінең сыйыхтатхан. Ідӧк ағаа «Центр» войсколарның командующайы приказынаң «За воинскую доблесть» 2-ҷі степеньніг медаль читірілген.
Россия президентінің 23 августта 2023 чылда алылған Указынаң миномет батареязының «Хакас» солалығ чааҷызы «За отвагу» медальнаң сыйыхтатхан.
Россия президентінің 21 июльда 2023 чылда алылған Указынаң «Батыр» солалығ чааҷы «За отвагу» медаль алған. Ағаа хоза ол «Центр» войсколарның командующайы приказынаң «За воинскую доблесть» медальнаң сыйыхтатхан.
«Центр» войсколарның командующайы приказынаң «Молчун» солалығ чааҷаа «За боевое отличие» медаль читірілген.
Россия президентінің 4 сентябрьда 2023 чылда алылған Указынаң «Барс» солалығ чааҷы Cуворовтың медальынаң сыйыхтатхан, «Центр» войсколарның командующайы приказынаң – «За боевое отличие» медальнаң. Пу сыйыхтас тузында «Барс», палығладып, госпитальда имненчеткен, аннаңар сыйыхтар ипчізіне читірілгеннер.
Хайди искірген чааҷыларның командирі, сыйыхтар алған чааҷылар аның мотострелковай батальонында служба ирткеннер. Комбат прайзына алғыc cӧстерін читірген.
Чааҷыларның военкоматсар килген ипчілеріне сіліг чахайахтар читірілген. Виктор Бармин «Барсха» госпитальда табырах хазыхтанарға алғаан.
Сыйыхтас соонаң Дмитрий Мамышевнең чоох алысхабыс. Аның сӧстерінең, ол Таштып аймаандағы Кічіг Арбыт аалда 1985 чылда тӧреен. Амды сӧбірезінең Ағбанда чуртапча. Ипчізі Елена Борисовна городтың имнег туразында тоғынча, хызы аал хонии колледжінде ӱгренче, ағаа 16 час толған.
Ӧнетін чаа операциязы пасталған соонда чардыхти мобилизацияа хығыртыпчатхан повестка Дмитрий Васильевичке пылтыр 26 сентябрьда килген. Мобилизацияа хығыртылған кізілерні чығҷаң пункттаң оларны 28 сентябрьда Омсксар апарғаннар. Анда чаа ӱгредіглері иртірілген, чааҷы частьтары тӧстелген, удур-тӧдір танызып, чааҷылар хайызығларны иптестіргеннер. Фронтсар парар алнында Дмитрий Ағбандағы квартираларда потолоктарға пленка тартар тоғыста пос алынҷа істенген.
Ол Донбасстағы Авдеевка город хыринда чааласхан, андох палығлатхан. Ыырҷының снаряды, учух киліп, чара чачыраанда, чааҷы пазынаң, хол-азаанаң палығлатхан. Ағаа тӧрт госпитальда имненерге киліскен: Ростовта, Москвада, Сергиев Посадта паза Иркутскта. Халғанҷы госпитальда имненген соонда чаа-имнег комиссиязы ағаа ІІІ группа кинегі статузын пирген, чааҷы службазына чарабастаңар чарадығ алған.
«Амды «гражданкада» турамны читіре пӱдіріп аларға пӧгінчем. Тураны Ағбанда позым пӱдірчем, ол тимге сых таа парған, істіндегі чазағлығ тоғыстар толдыр саларға халған...» – тіпче матыр «Красавчик». Хайда паза хайди чааласханнаңар чоохтирға тың хынмаан, анзы чарабас таа полар.
Сом Альбина Чистогашевани
Автор :
Николай Султреков
| Пн | Вт | Ср | Чт | Пт | Сб | Вс |
| 25 | 26 | 27 | 28 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
