Марығлазып, чааҷыларға хабасчалар
10.11.2023
Хабарлар
Марығ хазыр парча
Спорт. Кічіг дзюдоисттер «Піс хадабыс!» полызығлығ турнирге чыылысханнар
Дзюдо Хакасияда ӧӧн спорт кӧрімнері санына кірче. Аннаң республикада 1,5 муң кізі айғасча. Пістің оол-хыстар аймах-пасха синде иртчеткен марығлардаң медальлар чох айланминчалар. Амғы туста кӱстіг спортсменнерге Михаил Мамаев, Дарья Жданова паза Александра Аскарова саналчалар. Мамаев алтынҷы чылы Россияның піріктірілген командазынзар кірче. Пӱӱл чиит кізі Университет спортының чоннар аразындағы фестивальында кӱмӱс медаль холға кирген. Жданованаң Аскарова пылтыр Россия первенствозында сыйыхтығ орыннарға сыхханнар.
Пір сӧснең, дзюдо Хакасияда чахсы тиліпче. Мында спорт федерациязының хозымы улуғ. Пірігіc Ӧӧркі Чӧп депутады Вячеслав Лесковтың устаанынаң республикада аймах марығлар иртірче. Ідӧк халых тоғызынаң оортах турбасха кӱстенче. Дзюдоисттер «Библиотекаа кинде сыйлап пир» чӧрімде, экология акцияларында ӧткін араласчалар. 2022 чылда ӧнетін чаа операциязы пасталғанда, спортсменнер «Чааҷаа пічік» чӧрімге хозылғаннар, чир-суғҷыларыбысха чылығ кип-азах ысханнар.
Пӱӱл 4-5 ноябрьда, тізең, Харатаста «Піс хадабыс!» полызығлығ турнир ирткен. Арға-мӧрій Чон пірікчеткен кӱнге чарыдылған. Аның ӧӧн пӧгіннері – Ада чир-суубысха хынысты тыыдары паза ӧнетін чаа операциязы (СВО) араласчыларына хабазары. Чечіме кӱнде республика марии ирткен. Анда Ағбанның, Харатастың, Саяногорсктың паза Орджоникидзе аймааның спортсменнері араласханнар. Тиксі алза, 170 артиинаң кізі. 2013-2014 чылларда тӧреен олғаннар татамиде прай кӱстерін салып харбасханнар. Позырахта Харатас городтың марии полған. Ол 2015-2016 чылларда тӧреен палаларға кӧрілген. Кічіг дзюдоисттерні марыға сығарғаннар «Ах Барс», «Шахтер», «Сибиряк», «ЦСКА-Хакасия», «Хакасия-Спорт» клубтар. Город турнирінің араласчыларынаң София Чочиеваны паза Мирон Арчимаевті махтирға чарир. Хакас хызыҷах 22 кг кӧдірімде кӱмӱс призер полыбысхан, Арчимаевтің хола медаль. Ол 26 кг кӧдірімде харбасча. Пу арға-мӧрійде 200 пала кӱзін cынаан.
«Піс хадабыс!» полызығлығ марығда аралазар ӱчӱн, полған на спортсменге ахча (взнос) тӧлирге киректелтір. Аның синін Вячеслав Сергеевич иcкірерге ынабаан. Че ахча хомай нимес чыылтыр. В.С.Лесков теен:
– СВО-да араласчатхан чааҷыларға Харатастаң нинҷе-нинҷе ӧме полысча. Олардаң иң ӧткін хайынча «Чааҷаа чылығ сыйлап пир» ӧме. Аннаң устапча Елена Таркина. Ипчілер чир-суғҷыларыбысха мелейлер паза пӧріктер палғапчалар, иргі тоннардаң жилеттер, чылығ хурлар тікчелер. Олар хуруғ душ идіп аларға ӱгреніп алғаннар. Ӧмедегілер иснең, ирілген тӱкнең хабас пирерге сурынғаннар. Кирек материалларны чыылған ахчаа садызып аларбыс. Ипчілер иткен ниме-нооны Украиназар «Русич» фондтың кізізі Анатолий Карпенко апарар. Ікізі дее марығлар пайрамни азарында араласханнар.
Чоохтирға кирек, «Чааҷаа чылығ сыйлап пир» ӧме Харатаста пылтыр кӱскӱзін, мобилизация чарлалғанда, тоғынарға пастаан. Чағбан чӱректіг ипчілер пастағы палғаан чулухтарны пістің чааҷыларға Омсксар ыстырлар. Ӧткін араласчыларның санында Тамара Тахтобинаны адирға кирек. Ус холлығ чир-суғҷыбыс 47 кізее чулух палғап пирген, аның ӧӧрезі Галина Новикова – 37 чааҷаа. Ольга Куманеева 41 пӧрік палғаан, Светлана Никитина – 13 пара ӱс cалаалығ мелей. Ідӧк проект араласчылары пір чыл аразына 140 чӱленҷең сетка тимнеп салғаннар. Амды олар госпитальда имненчеткен чааҷыларға ӧнетін частыхтар тікчелер.
Сом Вячеслав Лесковти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
