Хада-пірге ползабыс, хаҷан даа Илбек хазна полар
10.11.2023
Хабарлар
Аймах чоннар кип-азаа кӧзідии
Ӱлӱкӱн. Кічіг хырлас айының 4-ҷі кӱнінде С.П.Кадышевтің адынаң чон чайаачызы кінінде Чон пірікчеткен кӱнге чарыдылған «Піс пірге, пісті чиң полбастар!» концерт ирткен
Чон пірікчеткен кӱнге чарыдылған концертке толдыра кӧрігҷі килген. Залда орыннар чидіспинчеткен.
Хакасия пазы орынҷызының тоғызын толдырчатхан Михаил Побызаков ӱлӱкӱн концертін пайрамни асхан:
– Пӱӱн уғаа танығлығ ӱлӱкӱн! Улуғ, илбек ӱлӱкӱнні – Чон пірікчеткен кӱнні – таныхтирға чыылыс парғабыс. Хакасия аймах нациялығ чоннар ынағ чуртапчатхан иң чахсы регионнар санында, анзы оларның мында кибірлерні аарлапчатханын, удур-тӧдір улуғлапчатханын чахсы киречілепче. Хакасияда 100 азыра аймах нациялығ чуртағҷы, этническай кӧстегліг 50-ҷе халых пірігізі саналча. Піс прайзыбыс Хакас Республиканы чуртыбысха санапчабыс.
Прай чуртағҷыларға истіг чуртас паза пілізіс ӱчӱн алғызым читірчем. Піс пасхалалчабыс, че пірге тудынчабыс. Анзы тың аарлығ. Прайзын Чон пірікчеткен кӱннең алғыстапчам! Чахсы кӧңніліг полыңар, Хакасияа, Россияа хыныңар!
Анаң Михаил Анатольевич Россияда чуртапчатхан чоннарның кибірлерін, тархынын, культуразын хайраллирына, тилідеріне паза сабландырарына улуғ хозым итчеткен кізілерге Хакасия пазының алғыстазын читірген. Оларның санында полғаннар: Хакасияның ағас хонии министерствозының арығларны хайраллир тоғысты толдырар паза хазна чахиин толдырар пӧлік пастығы Марина Левченко, ағас хонии министрінің орынҷызы Елена Цыбульская, Н.Г.Доможаковтың адынаң национальнай библиотеканың пасха хан тіллері литература пӧлиинің устағҷызы Олеся Сунчугашева, Ағбан город устағ-пастааның чоннаң паза СМИ-ларнаң палғалысчаң пӧлік устағҷызы Евгения Немкова.
Михаил Побызаков Олеся Сунчугашеваа алғыстас пічиин читірген туста
Олғаннарның наука-істезігліг паза чайаачы оңдайларын тилітчеткен, нациялар аразындағы палғалысты тыытчатхан ӱчӱн, Кӧк хайа аалдағы ортымах школа директоры Ольга Фокинаға паза С.П.Кадышевтің адынаң чон чайаачызы кінінің режиссёр-постановщигі Юлия Моргачёваа ідӧк Хакасия пазының алғыстазы читірілген.
Хакасияның Ӧӧркі Чӧп кнезінің пастағы орынҷызы Пётр Воронин хакас чонның Улуғлар чӧбі паза республиканың Ӧӧркі Чӧбі адынаң регионның прай чуртағҷыларын Чон пірікчеткен кӱннең алғыстаан паза Хакасияның культура министерствозына алғызын читірген.
– Пістің артисттер, чаалазығ парчатхан орыннардағы чуртағҷыларнаң тоғазып, республикадағы прай чонның культуразынаң таныстырчалар.
Чон пірікчеткен кӱн – ол тиксі чоннар аразындағы ӱлӱкӱн. Аарлығ арғыстар, сірерні пу ӱлӱкӱннең алғыстапчам, хазых, ӧңненіс паза амыр чуртас алғапчам! – теен Пётр Воронин.
Концертте чайаачы ӧмелер пістің хазнада чуртапчатхан чоннарның культуразын кип-азахтары паза теелбектері пастыра кӧзіткеннер. «Айас» студия «Анжинская полька» теелбекнең, «Ынархас» студия пӱрӱт чонының теелбегінең, «Настроение» ӧме азербайджан чонының «Яллы» теелбегінең, «Акварель» ансамбль «Якутяночка моя» теелбекнең сценаа сыхханнар. Александр Калин «Піс орыспыс» кибелісті ӧтіг чоохтаан, Виктор Ковалёв «Чир-суум», Ирина Кулагашева Россиядаңар, Гульнара Ухадеева татар тілінең тӧреен тілінеңер сарыннар толдырғаннар. Прай сарыннарда тӧреен чиріне хыныс, поғдархас читірілген.
Концертті «Ынархас» студия «Піс ниместе, паза кем» теелбекнең тоосхан.
Соонаң кӧрігҷілер сағыс-кӧрістерінең ӱлескеннер.
– Концерт кӧңніме уғаа кірген. Ӱлӱкӱн танығлығ полчатханы чон чыылысханынаң кӧрінче. Пу кӱн аймах нациялығ чоныбысты, тархынны ундубин, пірге поларға хығырча. Алнынзар кӧріп, пір чолҷа хада парза, сидік чолларны ирт парыбызарға чарир.
Сценаа сыххан прай чайаачы ӧмелер постарын чахсы, турыстығ кӧзіткеннер. Оларның сіліг теелбектерін, аймах ӧңніг кип-азаан уғаа хынып, ӧкерсініп, хайхап кӧргем.
Мин сағынчам, мындағ пайрам чонға тузалығ. Ол чонны піріктірче паза чағын итче, – теен Ағбандағы 12№ школаның ӱгретчізі Наталья Чертыкова.
– Пу ӱлӱкӱн мағаа уғаа таңнастығ. Аймах-пасха чоннарнаң хада мағаа кӧп тоғынарға килісче. Национальнай библиотекада Хакасиядағы диаспораларнаң, землячестволарнаң тоғыс апарылча.
Концерт кӧңніме уғаа кірген. Пӱӱн чайаачы ӧмелер аймах-пасха чон культуразын кӧзіткеннер. Уғаа сіліг паза аймах ӧңніг концерт полған. Халғанҷы чайаачы номер иң танығлығ, хайзы чоннарны піріктірчеткен, пірге тудынарға, пілізерге хығырчатхан теелбек полған, – ӱлескен Н.Г.Доможаковтың адынаң национальнай библиотеканың пасха хан тіллері литература пӧлиинің устағҷызы Олеся Сунчугашева.
– Чон пірікчеткен кӱн – уғаа танығлығ ӱлӱкӱн. Россия – кӧп нациялығ хазна, аннаңар хада-пірге тудынарға, ынағ чуртирға кирекпіс. Хада-пірге ползабыс, Россия хаҷан даа Илбек хазна полар.
Концерт хынығ ирткен. Артисттер уғаа чайаачылар, таланттығлар.
Хакасияда он муңҷа тува чоны чуртапча. Пістің халых пірігізі оларны хада-пірге тудынарға кӧніктірче, – теен «Энерель» тува чоны землячествозының кнезі Болат Сат.
Пу танығлығ ӱлӱкӱнде С.П.Кадышевтің адынаң чон чайаачызы кінінде аймах нациялығ чоннар кип-азаа, «Піс пасхабыс, че піс хадабыс» хоостар паза сомнар кӧзідии ирткен. Аалҷылар хайиина олғаннарның даа, улуғларның даа тоғыстары сығарылған. Хоостарның кӧбізінде Хакасияда чуртапчатхан аймах нациялығ чоннар, оларның ас-тамаа, флагтары чайал парғаннар.
Сом Дмитрий Сунчугашевти
Автор :
Оксана Челтыгмашева
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде