Ӧӧн пӧгін – чоллардағы саайлар санын хызырары
10.11.2023
Хабарлар
Асхыс аймаанҷа ОМВД-ның ОГИБДД-зының ДПС инспекторы Андрей Артонов
Пӱӱн – Істіндегі киректер органнары тоғынҷызының кӱні. Аны пістің хазнада чыл сай кічіг хырлас айының 10-ҷы кӱнінде таныхтапчалар
Чол-патруль службазының (ДПС) тоғынҷызы Андрей Артонов Таштып аалда тӧреен-ӧскен. Аның пабазы Семён Иванович чуртазын ӱгредіг киреене чарыт салған, 16 № профессиональнай училищеде физкультура ӱгретчізі полған. Тіспен тоғызы ӱчӱн ол «Россияның профессиональнай ӱгредиинің саблығ тоғынҷызы» атха турысхан. Іҷезі Валентина Петровна, Шулбаевтер хызы, олох ӱгредіг заведениезінде столовайның устағҷызы полған. Артоновтар сӧбірезі ӱс оолғын чон аразына турыстыра кир салған. Андрей – тун палазы, аның алтындағызы Иван пабазының чолын пасча, Таштыптағы школада физкультура ӱгретчізі полча, иң кічии Вячеслав ӧрт ӱзірҷең полып істенче.
Школада ӱгренчеткенде, Андрей саналығ чӱгӱріп пастаан, аның пастағы тренері пабазы полған. Пизінҷі классха сыхханда, наа тренер Александр Горенков тоғын сыххан, ол Таштыпсар Хызылчар крайындағы Краснотуранск городтаң килген. Аның холында тимненіп, Андрей пӧзік чидіглерге читкен. Саналығ чӱгӱрерге олғаннар Таштып аалдаң ырах ниместе орныххан пионерлер лагерьінзер чӧргеннер. Анда ікі чол полған, пірсі – пис километрге, ікінҷізі – он километрге. Тағлығ орын олғаннарға устарын таптирға чахсы оңдай пирген. Улуғ класстарда Андрей Хакасияның піріктірілген командазынаң прай хазнаа сабланчатхан Тӧӧ пазы поселоксар сыххан. Анда Сибирьдегі федеральнай округтың марығларында аралазып, ол «Спорт узына кандидат» атха турысхан.
Школаны маңнаныстығ тоозып, Андрей Артонов Олимп резерві училищезінзер кіріп алған, физкультура ӱгретчізінің специальнозын алған. Анда даа ол марығларда ӧткін араласхан. Ӱгредіг тузындох аның чуртазында алызығлар пол парған – Мира Узназакованаң хон салған. Ӱгредиин тоозып, ол тӧреен аалынзар айланған, школада физкультура ӱгретчізі полып істен сыххан. Андартын, 20 частығда, армияа хабылған.
Іди ол стратегия кӧстегліг ракета войсколарынзар кір парған, службазын Ужур городта ирткен. Ибзер айланғанда, школадағы тоғызын узаратхан, чуртас оңдайлары хоостыра чиит сӧбірее Ағбанзар кӧзерге киліскенӧк.
Че 2007 чылда матырыбысты Асхыс аймаанҷа ГИБДД пӧлиинзер тоғынарға хығырыбысханнар. Андрей Семёновичке Асхыссар кӧзерге киліскен, сӧбірезі, тізең, халған. Службазын ол кічіг лейтенант званиеліг пастаан. Андада ОГИБДД пастығы Олег Чертыков полған. Ол чиит иренні тоғыстың прай оңдайларына кӧніктірген. Андрей пастағы пастығын чылығ сӧстернең сағысха кирче.
Пастағы дежурствозына Андрей Артонов Хара нымырха кӱнінде сыххан, аннаң хада чол чӧрізін хорғыс чох идер пропагандаҷа инспектор Наталья Ултургашева полған. Олох кӱнде наа ла тоғынарға пастапчатхан инспектор чолдағы саайны істезерге чӧрібіскен. Асхысты ибірчеткен чолда мотоциклист аңдарыл партыр. Наталья Леонидовна чиит тоғынҷаа протоколны орта пазарға полыс пирген. Харын, водитель хазых халған.
Хайди таныхтапча Андрей Артонов, тынағ кӱннерінде паза ӱлӱкӱннерде ДПС-тағыларның тоғыс оңдайлары тыыдылча, олар изірік водительлерні ілезіне сығарчалар. ГИБДД инспекторларының ӧӧн пӧгіні – чол чӧрізі араласчыларының чуртазын паза хазиин ал халары. Протоколлар пазып, олар чоллардағы саайларны полдыртпинчалар.
– Амғы туста ДПС тоғынҷылары водительлернің ПДД-ның улуғ сайбағларына хайығ айландырчалар. Кӧзідімге, руль кистінде ізілік чӧрчеткеннерге алай палаларны тутчатхан одырчыхтарны хаптырбин тарт чӧрчеткеннерге. Піс протоколлар пасчатсабыс, палаларны тарт чӧрчеткен водительлернің піреезі пырозын оңарча, хайзы-да – чох. Піс чоохтапчабыс, олар палаларының чуртазына хорғыс ағылчалар, – службазынаңар чоохтаан право хайраллаҷаң органнар тоғынҷызы.
Андрей Артоновха чол чӧрізі араласчыларының чуртазы ӱзілген саайларға сығарға киліскенӧк. Андағ кирек пол парза, ол хайда-да уйан тоғыныбыстым тіп сағынча. Халғанҷы андағ кирек ӱр ниместе ле пол парған. Ағбан – Ах тобырах чолның 65-ҷі километрінде кізіні пасхладыбысханнар, ол харасхы туста чолҷа парчаттыр.
ГИБДД тоғынҷыларына сайбағҷыларны удаа сӱрізерге килісче. Ӧӧнінде андағ киректер изірік водительлернең палғалыстығ полча. Россия МВД-зында 2012 чылда реформа иртірілгенде, ДПС тоғынҷылары службазының оңдайлары чахсылан парған. Матырыбыс тоғысха наа ла килгенде, пӧліктің автопаркы уйан полған. Служебнай автомобильлер удаа сайбалҷаңнар.
– Мағаа служебнай машинаны позыма тыхтирға киліскен. Реформа кирілген соонаң пӧлиибістің автопаркы чахсы нааҷылал парған. Позыңар сизінче поларзар, хайдағ машиналығ ДПС тоғынҷылары чӧрчелер. Тиксі чоохтаза, оңдайлар чахсы полыбысхан, – хосхан ДПС инспекторы.
Служба тузында Андрей Артонов наркотиктер тарт чӧрчеткен кізілерні кӧп хати ілезіне сығарған. Андағ рейдтер уголовнай тілег тоғынҷыларынаң пірге иртірілче. Сайбағҷыларны тудынчатханнары хоостыра піліп аларға чарир.
– Кӧзідімге, піс машинаны тохтадыбыссабыс, чарабас нимелерні тарт чӧрчеткеннер чӱрексіп сыхчалар. Кӧп чыл тоғын салғаннар андағ хылыхты табырах сизін салчалар. Андада піс машинаны ніндібізерге чаратчабыс. Ол тоғыс сыбыра киречілер кӧзіне иділче, – узаратхан Андрей Семёнович.
Хайди чоохтапча улуғ лейтенант, изірік водительлерге хатығластар тыыдылған даа полза, ізілік чӧрчеткеннер саны хызырылбаан, Асхыс аймаанда водительлер мирҷеңнер, неке. Олох туста руль кистінде ікінҷізін ізілік тутырғаннар уголовнай нандырыға тартылчалар. Сайбағҷылар харибге одырыбызарға айабастар.
Андрей Семёнович улуғ арғыстарын алғыснаң сағысха кирче. Ол право хайраллаҷаң органнар ветераны Владимир Кокошниковнаң хада кӧп чыл тоғын салған. Аннаң чол чӧрізі правилоларын сайбапчатхан водительлер матап хорыхчаңнар. Ол тузалығ чӧптернең чиит инспекторға кӧп хати полыс пирген. Позының тоғызын, тізең, хаҷан даа чахсы толдырған.
Пӱӱнгі кӱнде Андрей Артонов хада хонғанынаң часкалығ чуртапча, сӧбіреде ӱс пала. Тун оолғы Семён пабазының чолынҷа парарға чаратхан, ол Россия МВД-зының Барнаулдағы юридическай институдында істезігҷі специальнозын алча. Хызы Алина 10-ҷы класста ӱгренче, Милана – 4-ҷі класста.
– Семён, школа тоосчатханда, ӱгредиин хайда узарадарынаңар чоохтасхабыс. Мин ағаа теем: «Кӧңнің чатчатса, юриcтке ӱгренерге пар. Алай хынған пасха специальность таллап ал. Мин синің чарадииңнаң чаразарбын». Амды оолғым ӱзінҷі курста ӱгренче, – чооғын тоосхан Андрей Семёнович.
Чахсы службазы ӱчӱн Андрей Артонов кӧп сыйыхха турысхан. Ол Россияның істіндегі киректер министрі Владимир Колокольцевтің холы салылған ікі грамотанаң таныхтатхан, ідӧк республика синіндегі ведомство сыйыхтарына турысхан. Аннаң пасха ол Асхыс аймаа пазының сыйыхтарын алған.
Сом Максим Ахпашевти
Автор :
Антон Чертыков
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
