Хакас тілін пілчеткеннерге – аарлас паза ахча
10.11.2023
Хабарлар
Марығ. Асхыс аймааның Калининдегі ортымах школазында 1-ғы класстағы ӱгренҷілернің тіл марии ирткен
Андар тӧреен тілінең чоохтас полчатханын кӧзіт пирер ӱчӱн Асхыс, Таштып паза Пии аймахтарының олғаннары чыылысханнар. Тиксі 60 азыра пала полған. Нинҷе-де олған кил полбаан. Чылдаң чылға Асхыс аймаанаң иң кӧп араласчы полча. Ідӧк полған на чыл пу муниципалитеттің Ӱс чул аалдағы школазының паза аның филиалларының ӱгренҷілері пӱкӱлее класснаң марығда араласчалар. 1-ғы даа, 5-ҷі дее класстағы олғаннарны марыға ӱгретчілер паза паба-іҷелер чахсы тимнеп килчелер. Олар хаҷан даа хакас кип-азаан кизіп, чазан салчалар, хызыҷахтарға сӱрместер ӱр пирчелер паза платтар тарт пирчелер. Кӧксілерінде, тізең, ачыныстығ поғолар.
Пӱӱл пу ӱгредіг организациязынаң хатап кӧп ӱгренҷі араласты паза олар пазох тілні чахсы пілчеткенін киречілеп алдылар. Сизінгенде, ӧӧнінде оолахтар тӧреен тілінең чахсы чоохтасчалар, хызыҷахтар – сала уйан. Хыйғаҷахтар! Іди ле кӱстеніңер, олғаннар!
Асхыстағы лицей-интернаттың ӱгренҷілері тіл мариинда ідӧк чыл сай араласчалар. Оларның тіл пілчеткен cині пасхалалча. Сизінгенде, ааллардаң аймах кінінзер кӧскен сӧбірелернің палалары пирілген сурығны оңарчалар, орта нандырчалар. Асхыста ӧскеннерге, тізең, аар пілдірчеткенге тӧӧй полған.
Пӱӱл Таштып паза Пии аймахтарынаң асхынах олған килгені сағыссыратча. Ікі муниципалитеттең 10-ҷа олған полған. Пос тілінең чоохтасчатханнары ідӧк пір син нимес. Бондаревтегі паза Пыдырахтағы нинҷе-де ӱгренҷі тӧреен тілін ортымахти пілчеткенін кӧзіткен.
Киҷее, тізең, Н.Ф.Катановтың адынаң национальнай гимназияда Ағбандағы олғаннар чыылысханнар. Паза оларға Орджоникидзе аймааның ӱгренҷілері хозылғаннар. Таныхтирға кирек, пу муниципалитеттің олғаннары пастағызын на марығда араластылар. Олғаннар Майрастар аалдаң килгеннер. Олар Камилла Сулекова паза Иван Кобыжаков.
Марығның салтары кічіг хырлас айының 15-ҷі кӱніне теере искірілер. Иң кӧп балл чыып алған 60 олған чиңісчі полыбызар. 1-ғы орын ӱчӱн 25 муң салковай пирілер, 2-ҷі – 23 муң салковай, 3-ҷі – 21 муң салковай. «Иң артых чоохтазығ» номинацияның чиңісчізіне хоза 10 муң салковай алып алар оңдай пар.
Ідӧк пӱӱн хакас тілінең чоохтас полчатхан хакас нимес чуртағҷылар аразында марығ иртче. Ол республикада ікінҷізін иртірілче. Анда аралазардаңар Хакасияның национальнай паза территориальнай политика министерствозынзар 9 пічік кірген, оларның 5-і Асхыс аймаанаң, 4-і – Ағбаннаң. Нациялары хоостыра кӧрзе, пис орыс, пір узбек, пір мордва, пір литва паза пір алтай. Ирткен чылда ідӧк 9 кізі араласхан, оларның кӧбізі алтайлар полған. Пу марығның чиңісчілері ідӧк ахчалығ сыйыхха турызарлар.
Хакас тілінҷе марығлар Хакасия пазы Валентин Коноваловтың пастаа хоостыра «Хакас тілін хайраллиры паза тилідері» хазна программазынҷа иртірілчелер. Аның ӧӧн пӧгіні – республиканың ікінҷі хазна тілін хайраллиры, тилідері паза аны сӧбіреде сабландырары.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде