Хайди депутаттарзар айланарға чарир?
15.11.2023
Хабарлар
Ӧӧркі Чӧп. Чон айланыстарынаң тоғынары Хакасияның Ӧӧркі Чӧбінің ӧӧн кӧстеглерінің пірсі полча. Республика чуртағҷыларының амды депутаттарзар айланҷаң хоза оңдай пар
Иң чапчаң оңдай – Хакасияның Ӧӧркі Чӧбінің официальнай сайтындағы «Чуртағҷыларның айланыстары» вкладканаң тузаланып, айланыс ызары. Аннаң пасха, «Хазна полызығлары. Хада пӧкчебіс» сервис пастыра электроннай айланыс формазынаң тузаланарға чарир, ол республика парламентінің официальнай сайтында ідӧк пар.
«Ол наа, че олох туста тоғысха истіг сервис. Чуртағҷылар айланыстарынаң тоғысты улам айныдыбысчаң оңдай. Аның улуғ тузазы – айланыс кірген соонаң, ол сурығҷа тоғыс изерістіре сыныхтағда тудылча, толдырығҷаа аның тузынаңар сизіндіріп. Олох туста айланған кізее айланызы хоостыра тоғыс хайдағ чардыхта парчатханынаңар искірілче», – чоохтап пирген чуртағҷылар айланыстарынаң тоғыстың координаторы Андрей Алеев.
Республика парламентінзер пічік полызиинаң айланарға чарирӧк, тимнелген айланысты пу почта адрезінзер ызып: 665019, Ағбан г., Лениннің пр., 67. Олох туста айланған кізінің фамилиязы, ады-солазы, нандыра пасчаң почта адрезі хайди даа кӧзіділ турарға кирек паза чапчаң палғалыс тударына телефон номері кӧзіділгені – чахсы.
Ідӧк тимнелген айланысты Ӧӧркі Чӧп пічіктеріне тимнелген ячейкада (республика правительствозы туразында пастағы хадылындағы холлда) артыс саларға алай, 25-95-42 телефонҷа сығдырадып, специалистке пирібізерге чарир.
Аннаң пасха, депутаттар тӧреміл теестезіп чуртағҷыларнаң тоғазығлар иртірчелер. График ідӧк Хакасияның Ӧӧркі Чӧбінің официальнай сайтында турча.
Депутаттарның айланыстарҷа тоғызының салтарлары амох пар. Іди Тӧӧ пазы чуртағҷыларының терапевт имҷі чох полған. Чуртағҷылар депутат Галина Елистратовазар айланған соонаң ол социальнай сурығны хайдағ-да тусха пӧгібіcчең оңдай табылған. Тӧӧ пазындағы имнег туразынзар терапевт полған на четверг чӧр турар, 10.00 частаң пасти халғанҷы пациентке теере тоғынар. Мыннаң мындар поселоктың имнег туразына кадрларны табар сурығ Хакасияның хазых хайраллаҷаң министерствозынаң хада пӧгілче.
Сом Интернеттең алылған
Автор :
Хакасияның Ӧӧркі Чӧбінің хабарлар пӧлии
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
