Тӧреен нимес тілні пілчеткеніне – улуғлас
15.11.2023
Хабарлар
Тіл марииның араласчылары
Тіл марии. С.П.Кадышевтің адынаң чон чайаачызы кінінде хакас нимес, че хакас тілінең чоохтас полчатхан чуртағҷылар аразында тіл марии ирткен
Пу марығ пӱӱл ікінҷізін иртті. Аның тӧстегҷізі Хакасияның национальнай паза территориальнай политика министерствозы полча. Пӱӱл марығда сигіс кізі араласты. Олар Ағбан городтаңнар паза Асхыс аймаанаңнар.
Амды марығ араласчылары постарынаңар чоохтапчатханнаңар хысхаҷахти:
Роман Лежнин (Ағбан г., орыс):
– Мин тадар чирде пис час чуртапчам. Мағаа 33 час. Тадар тілін пис час ӱгренчем, ХГУ-да хакас кафедразында. Минің ипчім Кызластаң, хазинем ӱгретче палаларны тадар тіліне. Мин хазаада, чазыда тоғынчам, чистек, миске теерчем, арых тастапчам.
Римма Топоева (Асхыс аймаа, литва):
– Мегее 60 час. Мин Полтах аалда чуртапчам. «Хакас чирі» газетаны хығырып, тадар тіліне ӱгреніп алғам. Мин ағаа хынчам.
Светлана Бодрихина (Асхыс аймаа, орыс):
– Изеннер, ағбандағылар! Мин тадарзым. Мегее 36 час. Хозяйство тутчам. Таңағастар, сосхаҷахтар пар. Апчаам Барашков. Піс чарба ӱгре хайнатчабыс, хан итчебіс. Чир чистегін депутаттарға сатчам.
Татьяна Казынгашева (Ағбан г., орыс):
– Минің тӧреен-ӧскен чирім Аңчул аал. Хакас палаларынаң ойнап, пілін килгем –тадар тілін чахсы пілчеттірзім. Оларнаң сананаң чылып, суға кіріп, тадар тілін пілінмин ӱгреніп алғам. Школада хакас палаларнаң тиңнең тиңе хакас тілі паза литература уроктарына чӧрҷем.
Холмурот Кансаров (Асхыс аймаа, узбек):
– Тоғзон чылларда Хакасиязар кӧскем. Кӧп палалығ сӧбіре полчабыс. Амды пістің он читі парха. Олар прайзы хакас тілінең чоохтасча. Аалдағылар мині «тадар узбек» адапчалар.
Олег Иванов (Ағбан г., орыс):
– Изеннер. Минің адым Олег. Ууҷам мині оолағым адаҷаң, арғыстар, таныстар мині «Альбертыч» адапчалар.
Николай Шестопалов (Асхыс аймаа, мордва):
– Минің тӧреен чирім Ылырсы аал. Позым ам Асхыста чуртапчам. Мал имҷізі полчам. Мордвин дее ползам, ылырсыдағылар мині тадар тіліне ӱгрет салғаннар.
Айас Косточакова (Ағбан г., алтай):
– Чалахай кӱннең! Минен тӧреен чирім силик Алтай! Тоғзон тоғыс чылда Ағбанзар килгем музыка колледжінзер ӱгренерге. Мында палаларымның пабазынаң танысхам. Ирім Паза чирінең. Кидегес сӧӧгінең сыххан.
Марығ араласчыларын хакас тілінҷе эксперттер паалааннар: эксперт чӧбінің кнезі, «Хакас чирі» газетазының ӧӧн редакторы, филология наукаларының кандидады Радион Сунчугашев, кнес орынҷызы – «Хакасия» ГТРК-ның телевещание программаларының хабарҷызы Алексей Боргояков, чӧп хачызы – «Хакасия» ГТРК-ның радиовещание хабарҷызы Инна Тодинова, эксперт чӧбінің кізілері – ХакНИИЯЛИ-ның устағҷызы, филология наукаларының кандидады Нина Майнагашева паза Н.Ф.Катановтың адынаң Хакас хазна университедінің ИГИСАТ-тың ӧӧн наука тоғынҷызы, филология наукаларының докторы Мария Чертыкова.
Марығның иң чапсых паза хынығ чардығы чарғыҷыларнаң чоох алысханы полған. Ідӧк араласчылар орыс чоохтағларны хакас тіліне паза хакас чоохтағларны орыс тіліне тілбестееннер паза чайаачы номер кӧзіт пиргеннер.
Прай марығ чардыхтары ирт парғанда, жюридегілер орыннар ӱлестіргеннер. Іди 3-ҷі орында полыбысханнар: Роман Лежнин, Олег Иванов, Холмурот Кансаров, 2-ҷі – Светлана Бодрихина, Римма Топоева, Николай Шестопалов, марығ чиңісчілері Татьяна Казынгашева паза Айас Косточакова полыбысханнар! Хайди таныхтаан марығ чарғыҷыларының кнезі, «Хакас чирі» газетаның ӧӧн редакторы Радион Сунчугашев, чарғыҷыларның араласчыларға турғысхан баллары тӧӧй пол партыр. Ідӧк Радион Дмитриевич прай марығ араласчыларына ӧнетін сыйыхтар читірген. Ол газетаа 2024 чылның пастағы чардығына тикке пазыныс, «90 чыл чоннаң хада» кинде паза «Ноға-ноғаҷахтар» олған журналы.
Марығ чиңісчізі Айас Косточакова чоохтапча:
– Марығда аралазардаңар ӱр сағынғам. Мин Хакасияда 23 чыл чуртап парим, хакас тілін ам даа чахсы пілбинчем. Мағаа уйадыстығ полған.
Уйадыстығ? Сағынчам, ағаа уйадыстығ полбасха кирек. Ағаа тӧреен нимес тілнең морсымнығ чоохтасчатхан ӱчӱн поғдархирға кирек! Ідӧк Татьяна Казынгашеваа. Ол ідӧк хакас тілінең тудығ чох чоохтасча. Итсе-де, андағ полбаан полза, олар чиңісчі поларҷыхтар.
Хакас тілі марии Хакасия пазы Валентин Коноваловтың пастаа хоостыра «Хакас тілін хайраллиры паза тилідері» хазна программазынҷа иртірілче. Аның ӧӧн пӧгіні – республиканың ікінҷі хазна тілін хайраллиры, тилідері паза аны сӧбіреде сабландырары.
Марығда чиңіс тутханнарға сыйыхтар кічіг хырлас айының 20-ҷі кӱні соонаң пирілер. Хакасия пазы Валентин Коновалов 21 муң, 23 муң паза 25 муң cалковайға ахчалығ сертификаттар читірер.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде