Хайдағ даа кізі чон аразында туртухпин чӧрзін
15.11.2023
Хабарлар
Ырҷы Диана Гурцкая Хакасияның олғаннарынаң хада
Кічіг хырлас айының 13-ҷі кӱнінде – Кӧрбинчеткеннернің чоннар аразындағы кӱні. Республиканың харах оды уйан олғаннарның школа-интернадында 300-ке чағын пала ӱгренче, оларның 30-ы хакас. Ағбаннаң ырах чуртапчатханнарға интернатта орын пирілче
Россияның саблығ ӱгретчізі Зинаида Топоева пу ӱгредіг организациязында 20 чыл азыра тоғын парир. Аның хайиинда пасталығ класстардағы ӱгренҷілер. Ідӧк ол школада хакас тілінҷе факультативтер апарча. Ол харах оды уйан паза пір дее кӧрбинчеткен олғаннарны хакас тілінең пазарға паза хығырарға ӱгретче.
Аннаң пасха, пу ӱгредіг организациязында олғаннарға аймах кружок-секциялар иртірілче: шахмат, шашка, волейбол, конструирование паза даа пасхазы. Хайди чоохтапча Зинаида Геннадьевна, коррекционнай школаа чӧрчеткен олғаннарны олар кинекке санабинчалар. Аннаңар пасха палаларны чіли ӱгретчелер паза аймах чидіглерге чидерге полысчалар. Іди пу школаның ӱгренҷізі Елизавета Кириченко чалтырама ӱгренген ӱчӱн школаны «Знак отличия» медальнаң тоосхан. Ол алтын медальға тиңнелче. Хызыҷах Пии аймаанаң. Таныхтирға кирек, халғанҷызын мындағ чидіг 10 чыл мының алнында полған, неке. Елизавета амды ХГУ-ның искусство колледжінде теелбек саларға, сарнирға ӱгренче.
Ідӧк пу школаны тоосханнар Новосибирсктегі, Томсктағы, Хызылчардағы вузтарда ӱгренчелер. Олар ӧӧнінде массажист профессиязын алчалар. Хай піреезі ӱгренген соонаң пуох школазар тоғынарға килче.
Ӧӧні – паланың ӱгренерге хынғаны. Аннаңар ӱгретчілер оларны санирға паза хығырарға ла нимес, ідӧк адаптация иртерге ӱгретчелер. Олар чон аразында постарын тудын поларға киректер. Ӧрініске, амғы туста пу пӧгіннерні толдырарға прай оңдайлар пар: диктофоннар, «чоохтасчатхан» компьютер клавиатуралары, сыңырапчатхан меспектер паза даа пасхазы.
Ӱгретчі Зинаида Топоева школаның чайаачы олғаннарына уғаа поғдархапча. Ӱр ниместе школаның «чылтызахтары» «Белая трость» чоннар аразындағы 14-ҷі фестивальға пар килгеннер. Ол пӱӱл чарыс айында Москвада ирткен.
– Андар Айима Троякова, Иван Павленко, Диана Дубинина, Степан Стародубцев паза школа устағҷылары чӧргеннер. Хайди піске пу фестивальға пар килер оңдай табылған? Пӱӱл пастағызын на ырҷы Диана Гурцкаяның харындазы Роберт Гудаевич Ағбанзар кил парған. Аннаң пасха, школабыссар хазнаның коррекционнай школаларының устағҷылары килгеннер. 45 регионның делегады полған. Мында олар, тӧрт кӱн чуртап, иң ағырсымнығ сурығларны ӱзӱргеннер. Ідӧк анда Роберт Гудаевич «Белая трость» фестивальға чайаачы олғаннар аразында таллағ иртірген. Марығда 15 пала араласхан. Олардаң ағаа пір ле паланы таллап аларға кирек полған. Че Роберт Гудаевич тӧрт паланы таллап алған! Хайди ол таныхтаан, пасха регионнарның коррекционнай школаларында Хакасиядағы осхас ол син кӧп чайаачы пала чоғыл. Аннаңар марығда тӧрт пала араласхан.
Фестивальда пістің палаларыбыс «Крокус Сити Холл» залда Россияның «чылтыстарынаң» хада сарнааннар. Ол санда Shаmаn ырҷынаң хада «Моя Россия» сарынны толдырғаннар. Аима Троякованы уғаа ӧріністіг паза поғдархастығ полған кӧрерге. Ол сценаа хакас кип-азахтығ сыххан, – палалар ӱчӱн ӧрінче Зинаида Топоева.
Итсе-де, улуғ аалҷылар Хакасиязар килбесчіктер дее, неке. Школа директоры Дмитрий Павленко кӱстенібіспеен полза. Ирткен чылда пу ӱгредіг организациязының ӧмезі «Успешная школа» марығда араласхан. Анда тиксі 600 школа полған. Финалда 16 школа кӱзін сынаан. Оларның аразында Хакасияның коррекционнай школазы пастағы орынға турысхан! Пір миллион салковайға грант утып алған!
– Піc олғаннарны аймах чирлерзер экскурсияа ал чӧрерге кӱстенчебіс. Кресен-фермер хоныхтарынзар, СШГЭС-сар, музейлерзер. Городтағылар ӧӧнінде фермерлернің хоныхтарынзар чӧрерге хынадырлар. Анда олар пызоларны, хойларны тутхлап алчалар. Музейлерде, тізең, палаларға ол-пу нимее теңерге чаратпинчалар. Харах оды уйан алай кӧрбинчеткен палаларға анзы кирек нооза. Аннаңар марығда утхан ахчаа школабыста тактильнай музей азарға чаратхабыс. Аны «Прикоснись к истории» адап алғабыс. Ол хакас паза орыс культуразына чарыдылған. Хакас ибіҷегін тӧстирге піске «Читіген» театрның артизі Алексей Сагатаев паза кӧгҷі Сергей Чарков полыс пиргеннер. Олар піске улуғ нимес пубай, палтыҷах, тырбос, азыр, кӧг тиріглерін паза даа пасха тудынҷаң-хабынҷаң ниме-ноо ит пиргеннер. Прайзы наа, пик. Палалар оларны хорыхпин тутхлап, істезіп алчалар. «Успешная школа» марығда утып алғанда, піс «Белая трость» фестивальның устағ-пастаа хайиин тартхабыс,– поғдархапча ӱгретчі.
Кічіг хырлас айының 13-ҷі кӱнінде Кӧрбинчеткеннернің чоннар аразындағы кӱні. Пілдістіг, ол пайрамнығ кӱн нимес, аны теелбек-сарыннарнаң таныхтирға кирек чоғыл. Хайди тіпче Зинаида Топоева, пу кӱн піске, олаңай кізілерге, пістің арабыста кӧрбинчеткен кізілер парын хатап сизіндірче. Андағ кізілер позын кинекке санабас, чон аразында туртухпин чӧрер ӱчӱн, школа оларға 12 чыл піліс пирче.
– Піс олғаннарыбысты чон аразында иптіг чӧрерге паза пілістіг поларға ӱгретчебіc. Минің сағызымда, полған на кізі чон аразында туртухпин чӧрерге паза хыйға поларға кирек. Пасхазы чоғыл – хазых кізізің син алай чох. Мин палаларыма тіпчем, кинделер кӧп хығырбазаңар, пілістерің тӧбін полар, андада сірер чон аразынзар кір полбассар. Олох туста, хыйға ползаңар, аны чонға кӧзіт поларға, туза ағыларға кирексер. Ідӧк мин палаларны иптіг тонан чӧрерге ӱгретчем. Иптіг кӧрімніг кізі – улуғласта.
Амғы туста хазии уйан олғаннарға хазна синінде алынҷа хайығ айландырылчатханда, чӱрекке истіг. Андағ полбаан полза, пістің «чылтызахтарыбыс» мындағ чалтырама чидіглерге чит поларҷыхтар ба? Москвазар хайди чидіп ал турарҷыхтар? Школада чахсы ӱгренер оңдайлар полбаан полза, Лиза Кириченко школаны алтын медальға тоос поларҷых па? Ағаа хоза, палаларға паза іҷе-пабаларға хомай нимес ахча тӧлелче. Анзы сӧбірее чахсы хабазығ, – сағызынаң ӱлесче Россияның саблығ ӱгретчізі Зинаида Топоева.
Чонға, тізең, хазии уйан кізілерге алынҷа хайығ айландырарға кирек. Кирек полза, полыс пирерге. Итсе-де, халғанҷы чылларда чон сыдамах пол парғанға тӧӧй пілдірче. Амды чон пасхалалчатхан кізее чапсыбинча, чарханминча. Кізі андағ тӧреен ӱчӱн пыролығ нимес нооза. Саайға кірген алай ба ағырған соонаң андағ пол парчалар. Полған на кізее андағ хыйалға кір парарға ӱр нимес, аннаңар хайди чонда тидірлер, улуғ чоохтанарға чарабас. Анзын чон сизініп одырарға кирек.
Сом школаның архивінең
Автор :
Оксана Сунчугашева
Пн | Вт | Ср | Чт | Пт | Сб | Вс |
26 | 27 | 28 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде